Makina bat elkarrizketa egin zuen Mikel Asurmendik Donostiako Herri Irratiko Komatxo artean literatur irratsaioan, bere gidaritzapean egon zen sei urteetan. Utriusque Vasconiae argitaletxearen eskutik plazaratu berriak dituen izen bereko liburu bien hitzaurrean euskal literaturaren paisaian murgiltzeko berealdiko aukera izan zela aitortu du. Gainera, 1997tik 2006ra iraun zuen irratsaioaren nondik norakoak eman ditu kazetariak –1999ko urritik egon zen programa bere ardurapean–. Elkarrizketa sakon haietako batzuk irakurtzeko aukera izan dute jada ARGIAko irakurleek, aldizkarian plazaratu baitzituen Asurmendik. Orain haietako hogeita zortzi bildu ditu Komatxo artean 1 liburuan.