Kreditu hipotekarioen tasak negoziatzean erabiltzen den erreferentziako interes-tasa aldagarria da Euriborra. Hortaz, erreferentzia hipotekario nagusia da. Interes-tasa hori zenbat eta txikiagoa izan, orduan eta gastu gutxiago sortuko dira mailegu hipotekarioan. Aldiz, tasa zenbat eta handiagoa izan, orduan eta garestiagoak izango dira maileguak. Orain dela bi urtetik interes-tasa hori handitzen ari da etengabe eta ondorioz, kreditu edo mailegu hipotekarioak egunetik egunera gero eta garestiagoak dira. Hari horretatik, 2005ean Euriborra %2,78koa izan zen, 2002ko abendutik -orduan %2,87koa izan zen- izandako prezio garestiena, hain zuzen. 2006ko urtarrilean, berriz, interes-tasa hori %2,86koa zen. 2006ko ekitaldiaren amaieran, interes-tasa %4koa da ia.

Orain dela urtebete, Espainiako Hipoteka Elkarteak egindako aurreikuspen guztiak bete dira, eta zenbaitetan gainditu ere bai. Epe luzean -bi eta sei urte bitartean- Euriborra Europar Batasunean inoiz izan ez duen mailara iritsiko dela aurreikusi du elkarteak, %6,39ra alegia. Euribor eta antzeko erreferentzia adierazleak nola aldatzen diren gertutik jakiteko lagungarria da oso Espainiako Hipoteka Elkartearen web orrialdea. www.ahe.es atarian hiru hilez behin eguneratzen dira datuak.