ARGIA.eus

2020ko uztailaren 08a

Liburutegia

Pilar Iparragirre
2007ko urtarrilaren 21a
El perro en la niebla
Róger Lindo
Verbigracia
233 orrialde
15 euro


El Salvadorreko iraultza hura

Roger Lindok idatzitako El perro en la niebla nobelan, El Salvadorren 70eko hamarkadaren amaieran indarrean zegoen diktaduraren aurka altxa ziren emakume eta gizonezkoen historia islatzen da. Narratzailea, hemeretzi urterekin langileen mugimenduan sartzea erabakitzen duen ikasle bat da. Besteek baino gehiago jakingo duelakoan, hitzaldi bat ematera gonbidatzen dute une horretan daukaten egoitza sindikal bakarrera. Hitzaldiaren ondorioak ez dira inorentzat oso gogoangarriak izango, baina mutilaren bizitzan zeresan handia izango dute. Besteak beste, harrezkero erakunde hartako partaide bilakatuko da, langileen eta nekazarien mugimenduan parte hartuz, El Salvadorren eratuta dagoen mugimendu klandestinoaren kide bezala.

Nire zakurrarekin
solasean Frantziaz eta
frantsesetaz
Joan-Lluís Lluís
Gatuzain
140 orrialde / 10 euro


Katalan batek frantziarra ez izateko dituen argudio sendoak

Joan-Lluís Lluís Perpinyàn jaio zen 1963an, eta 1993an argitaratu zuen Aljeriako gerlan girotuta zegoen bere lehen eleberria, Els ulls de sorra. Sona handia lortu zuen lan horrekin, Ipar Kataluniako literatura katalanaren birsorkuntzaren adierazlea bilakatuz. 2002. urtean, Conversa amb el meu gos sobre Franç i els francesos liburua eman zuen ezagutzera, orain Edurne Alegriaren itzulpenari esker Gatuzain argitaletxeak Nire zakurrarekin solasean Frantziaz eta frantsesetaz izenburuarekin aurkezten diguna. «Liburu hau panfleto bat da», aitortzen du egileak ezer baino lehen, bere asmoa Frantzia eta frantziarrak era errealistan azaltzea dela esanez, askotan errealitatea estaltzen duten hainbat mito, klitxe eta irudi tipikoetatik ihes eginaz.

Supositorioak otsoarentzat
Miren Agur Meabe,
Eider Eibar
Giltza
30 orrialde
7,80 euro


Gaixo dauden haur txikiei eskainia

Miren Agur Meabek sortu eta Eider Eibarrek marraztutako kontakizun samur hau bost urte inguru dituzten haurrei zuzendua dago eta ohean ondoezik sentitzen den umeari gerta dakizkionak islatzen ditu. Hauxe, adibidez: «Sukarra baduzu, eta eztul eta eztul ari bazara, bi gauza gerta litezke: supositorio bat ipintzea, edo ez ipintzea. Ipintzen ez badizute, lasai, ez da ezer gertatzen. Baina supositorioa ipintzen badizute, bi gauza gerta litezke: eztula eztitzea eta zu lokartzea, edo eztula ez eztitzea eta zu ez lokartzea». Okerrenera jarrita, eztularengatik eta sukarrarekin ondoezik dagoen haurrak izan ditzakeen amets gaiztoetan sortutako hainbat beldur bazterrera uzteko erak irudikatzen ditu. Esate baterako, gaixo dagoen umea beldurraren eraginez arrantzaka has daiteke, otsoa esnatuz, edo ez esnatuz.

Senez, 30. zenbakia
Batzuen artean
Cedro, Eizie
190 orrialde

Itzulpenari buruz egindako gogoeta

Senez itzulpen aldizkaria da, eta dagokion bezala, itzulpengintzaren gainean gogoeta egitea ezin atzeratuzko auzia dela irizten dio. Are gehiago, Euskal Herriaren antzera, egunero-egunero hizkuntza batean baino gehiagotan bizi beharrean dagoen herri txiki batean. Gauzak horrela, gogoeta hori egiteko hainbat gai eskaintzen dizkigu: Gerardo Markuletak euskaratu dituen Vicent Andrés Estellés valentziarraren poemetatik batzuk; Karlos del Olmok osatu eta Nahia Zubeldiak transkribatutako Lau belaunaldi euskal itzulpengintzaren inguruan; Erika Gonzalez eta Iñigo Errastik Roda P. Roberts-i egin dioten elkarrizketa; Bego Montoriok Itzul Baita euskal itzulpengintza zentroa dela-eta egin duen lana; eta bereziki interesgarria den Maite Imazen Itzulpengintzarako tresna informatiko lagungarriak, besteak beste.

Bilbao. Ehun paisaia
Jorge Moreno
Sua
128 orrialde
18,50 euro

Bilbaok erakutsitako ehun aurpegi

Bilbao ez da oso handia, munduko beste hiriburu batzuekin parekatzen badugu, baina Euskal Herriak duen hiririk handiena da, dudarik gabe. Jorge Morenok Sua argitaletxearen bidez eskaintzen dizkigun irudi ederrei esker, Bilbaok dituen ehun aurpegi desberdikin gozatu ahal izango dugu: hainbat eskultore ospetsuk hirian agertzeko espreski egindako lanekin, Areatzako zubia eta Arriaga antzokiarekin, San Antongo eliza eta zubiarekin, Bilbaok dituen hainbat kairekin, Guggeheim museoa gauez eta egunez ikusita, Erriberako merkatuarekin, Kafe Antzokiarekin, Bidebarrietako liburutegiarekin, Marijaiarekin alai doazenak begietsiz, Artxanda menditik ikus daitekeena geure eginez...


Graak!
Anjel Lertxundi, Antton Olariaga
Elkar
44 orrialde / 7,25 euro

Etxeko leihotik loroa sartu zitzaion mutikoaren istorioa

Triste eta kalera joateko gogo handiarekin somatzen zaio Anjel Lertxundik sortu eta Antton Olariagak marraztutako istorio honetan etxeko terrazatik kanpora begira aurkitzen dugun mutikoari. Arazotxo bat sortu zaio bere gurasoekin, eta zigortuta dago. Zer, eta terraza hortatik bertatik sartu zen loroari gertatu zaionagatik. Mutiko horrek asko maite du loroa, baina bere gurasoek uste dutenen kontra, ez daki non dabilen orain. Maureen OÆHara eta Errol Flynn protagonista diren film batean ikusi nahi luke.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2007ko urtarrilaren 21a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude