Gaztelaniaz eta euskaraz idatzitako prosa poetikoz eta bertsoz osaturik dago Amaia Linares gaztearen aurreneko liburuxka. Munduari eta bertan bizi garenoi zuzendutako begirada zorrotza -gudak gudaosteak/eta gu/nazioak/ zenbat hizki dituen eztabaidatzen- hizkuntza bitan azaldu izanaren arrazoia, hitzaurrean ematen du: Elebiduna izatea/mingaina/mihia/ bitan ebakita izatea da/burua bera/bi garunalditan/banatua egotea da.Gizateria zertan dabilen ikusteak ematen dio amorrazioa eta mina: Ez, ez da batere xamurra izango/zutik hiltzea/tiro batez/bi tiroz/bizitza amaitzea... Eta horrela laburbiltzen du bere eginahala: Nire olerkiak/tripakiak dira/sabeleko indarrez/jaiotako jakiak/liseriketan/odol zirimolatsuekin/nahasturiko/bizitza puska txikiak.

Eboluzioaren teoriari buruzko eztabaidek ematen diote hasiera Gaiak argitaletxeak plazaratutako Gaur egungo biologiaren erronkak liburuari. Aztertzen dituen gaien artean, hauexek daude: Lehia eta elkarlana bizidunen munduan; Biziari buruzko ikusmoldea; Bizitza eta heriotza; Genetikaren historia laburra; Informazio genetikoaren balioa; Ea zoria programatuta egon daitekeen; Genearen nozioak izan dituen aldaketak; Biologia eta identitatea; Noiz hasten da bizitza, ernalketan? Gizakia izatea eta pertsona izatea; Sexuen arteko desberdintasuna, biologiaren ikuspegitik; Sexuaren jatorria; Giza espeziea eta eboluzioaren mailak; Natura berez ona al da? Desberdina izatea eta bestelakoa izatea; eta Ez gaude aldez aurretik determinaturik.

Diego Agrimbau eta Diego Garavanoren artean sortutako Egiptoarrak espazioan komiki bildumak ezagutu du jada bere bigarren zenbakia, Faraoiaren garagardoa. Gizah-ko Goi-lautadan adituek egindako aurkikuntza berezi baten berri ematen du. Izan ere, Omar inperio zaharreko hilobi batean zer aurkituko, eta, Keops handiaren erregealdian egiptoarrek dastatzen zuten garagardo bikaina! Hau da, gaur egun faraoitik hasita, Menfis planetakoek hain gustura edaten duten garagardoaren aitzindaria. Baina Menfisko garagardo horri lehiakide maltzur bat sortu zaio: Wandoren garagardo nazkagarria. Eta Wandok menfistarrek Anubis ilargian duten garagardo fabrika erasotzeko asmoa du, Menfiskoen garagardo ospetsuaren milurteko errezeta eskuratzeko. Nola eragotziko dute asmo hori?

Euskalerriaren Adiskideen Elkarteak urtean bi aldiz plazaratzen duen Boletín aldizkariaren azken zenbakian aurki daitezkeen lanen artean Maïté Lafourcadek osatutako La société basque traditionnelle en Iparralde dago eta XIII. mendetik hasiz ia XVIII. mendera bitartean iraun zuen gizartearen ezaugarri nagusien berri ematen du. Bestalde, Mª Rosa Ayerbe Iribarrek Leniz haranak 1495ean izan zituen udal-ordenantzak dakartza kontura El gobierno del Valle de Léniz. Sus primeras Ordenanzas Municipales lanean. Carlos Ortiz de Urbina Montoyak Euskalerriaren Adiskideen Elkartea 1764an sortu zenetik eta 1794an krisia jasan zuen arteraino nolakoa zen aztertu du Amistad, jerarquía y exclusión en los primeros años de la Sociedad Bascongada de los Amigos del País gogoeta sakonaren bitartez.

Siberia aldean sortutako 26 urteko gaztea du Pablo Sastreren Enpleguaren arbola nobelak protagonista. Andoainen bizi da gaur egun gazte hori, eta Euskal Herriko hainbat herritan lan egin ondoren, langabezian dago orain. Halako batean, lan insertzio programa batean sartzeko agindua jaso du. Derrigorrezkoa da. Onartzen ez badu, laguntza guztiak kenduko dizkiote. Programa horren arabera, sei hilabete eman beharko ditu industria garbiketa sektorean lan eginez, gutxieneko soldata kobratuz, hau da, laurehun eta hogeita hamar euro hileko. Eskainiko zaion formazio aldiari probetxua ateraz gero, eta lana gogotik egiten duela ikusten bada, agian enplegu bat izango du azkenean.

Mitxel Muruak idatzi eta Eider Eibar-ek marraztutako kontakizun honetako Pellori oso gauza bitxia gertatzen zaio gauero. Lotara joaten da, zurrungaka hasi, eta handik gutxira igel bihurtzen da, ametsen anparoan. Nolanahi ere, gauero-gauero duen amets beti berdin horretan, Pelloren bi izaerak batzen dira, gizakiarena eta igelarena, eta igel bezala inoiz egingo ez lituzkeen gauzak egitera iristen da, gizalegeak halaxe agintzen duelako. Jakina, horrek arazoak sortzen dizkio igel bihurtutako Pello Telleriari!