Eusko Jaurlaritzako Hezkuntza Sailaren eskariz, Euskal Autonomia Erkidegoko Lehen Hezkuntzako 6 . mailako ikasleak euskara azterketak egiten ari dira. Urrian hasitako lanak azaroan bukatutzat emango ditu ebaluazioa aplikatzearen ardura hartu duen Irakas-Sistema Ebaluatu eta Ikertzeko Erakundeak. Euskararen ebaluazioa egiteko erabilitako metodologia 2004ko azaro-abenduan Derrigorrezko Bigarren Hezkuntzako 4. mailako ikasleekin erabilitako berbera da, alegia, Europako Kontseiluko Hizkuntzen Errefentzi Markoaren irizpideak jarraitu dituzte orain ere. 2004koan B2 mailaren araberako ebaluazioa egin zieten ikasleei eta orain B1 maila ezarri diete 12 urtekoei. Ebaluazioaren emaitzak gutxienez 2007ko martxoa arte ez dira izango. 16 urteko ikasleei egindako ebaluazioaren emaitzak ez ziren poztekoak izan (askorentzat ezta harritzekoak ere): A ereduko inork ez zuen azterketa gainditu, B ereduko %33ak gainditu zuen eta D ereduko %68ak.
Hezkuntza Sailak iragarria du hizkuntz-ereduen sistema aldatzeko proposamena 2007ko lehen hilabeteetan egingo duela. Izango dute eragina bi ebaluazioek proposamen horretan.

1992. urteaz geroztik argitaratzen du Hizkuntza Politikarako Sailburuordetzak Berripapera. 174. zenbakia itxuraz zein edukiz berrituta kaleratu du. Euskalgintzako berriak zabaltzeko euskarri asko dagoela-eta, Berripapera HPSren informazioa hedatzeko erabiltzea erabaki dute, beti ere gaiak sakon landuz. Zenbaki berrituan Elebideri buruzko informazioa dator eta baita Igone Etxeberria Euskara Sustatzeko zuzendariari Berripapera berriari buruz egindako elkarrizketa ere.

Kontseiluak Bai Euskarari Ziurtagiriak kudeatzeko elkartea otsailerako jarriko du abian. Elkarte berriaren helburua ziurtagiriak kudeatu eta hedatzea izango da; haren edukiak garatu eta gizarteratzea; ziurtagiria eskuratu duten erakundeei segimendua egitea eta entitate horien ahalegina saritzea, besteak beste. Kontseilua osatzen duten eragileekin ez ezik, beste entitate batzuekin partekatu nahi dute proiektua.

Euskaltzaindiaren laguntzaz, gazteleraz gain beste hizkuntza batean irakasteko baimen ofiziala lortu zuen Espainiako lehen ikastetxea izan zen Azkue ikastola (orain Lauro ikastola). Urriaren 27an, Euskaltzaindiak R. M. Azkue ikastola legeztatu zeneko 40. urteurrena ospatu zuen.