ARGIA.eus

2020ko ekainaren 01a

Liburutegia

Pilar Iparragirre
2006ko urriaren 15a
Izua
Lydia Flem
Alberdania
110 orrialde 11,90 euro

Klaustrofobia eta agarofobiaz

Alberdania argitaletxeak euskaraz eta gaztelaniaz argitaratu duen Lydia Flem psikoanalista eta idazle frantziarraren Panique liburuan, benetakotasun osoz azaltzen da klaustrofobia eta agarofobia atakeak izan ohi dituen pertsonak -emakume bat, kasu honetan- jasaten dituen ondorioak. Ia ezertarako gai ez dela uzten dute izualdi horiek. Zigor-ukaldi batek bezala zartatzen dute, eta okerrena da ezin duela sentitzen duen hori besteei -horrelakorik sekula sentitu ez dutenei- ulertarazi. Berari bakarrik gertatzen zaiolakoan dago, eta maiz, izuarekin batera nagusitzen zaion sentimendua lotsa baino ez da. Bakarrik dago, jakinik inork ezin duela bere alde deus egin, ezen nori axola zaio intimitatearen barruko muturreko esperientzia horrek? Inori ez.

Cocinar de cine
Xabier Gutiérrez, Juan Miguel Gutiérrez
Everest
240 orrialde

Errezeta gozoak eta zenbait film uztartzen dituen liburua

Zinema eta gastronomia uztarturik ageri dira Everest argitaletxeak plazaratu duen Cocinar de cine-n, Xabier Gutiérrez eta Juan Miguel Gutiérrezen artean osatutako liburuan. Arzak jatetxeko ikerketa laborategiko arduraduna dugu Xabier Gutiérrez sukaldaria. Juan Miguel Gutiérrezek, berriz, zinema munduan urte asko daramatza. Sukaldariak proposatzen dituen janari errezeta gozoak zinemagileak irakurlearen gogora dakartzan filmak bezain gogoangarri izatea espero dute egileek. Argazki ederrez horniturik dator Cocinar de cine, gainera. Irudi horiek Mikel Alonso argazkilari bilbotarrari zor zaizkio eta liburuaren diseinua Luis Alonso ilustratzaile eta diseinatzaileari.

Ilargiaren alaba
Toti Martínez de Lezea
Alfaguara/ Zubia
160 orrialde 7,90 euro


1609ko Zugarramurdi hura

Toti Martínez de Lezeak idatzi eta Jose Luis Padrónek euskaratutako nobela da Ilargiaren alaba. Zugarramurdi aldean Inkisizioa martxan jarri zeneko garaira darama irakurlea. Eta azken ohar gisa, Alonso Salazar Frías inkisidoreak idatzitako agiri luze eta zehatza dakar kontura. Logroñoko prozesuan parte hartu behar izan zutenen testigantzak eta salaketak goitik behera aztertu ondoren idatzi zuen inkisidore horrek delako agiria, eta honoko hau frogatu zuen: Akelarreak laborariek dantza egiteko, abesten jarduteko eta neurriz kanpo edan eta jateko egiten zituzten bilerak baino ez zirela; han ez zela gauez hegan ibilitakorik, ezta apo magikorik, nahita ekarritako ekaitzik edota haur bahiturik. Hau da, bidegabekeria galanta egin zutela -erak ere bai, jakina- Logroñon hil zituzten pertsona haien kontra.

Animalien bitxikeriak
Batzuen artean
Ttarttalo
190 orrialde 7,45 euro

Animalien arteko ezberdintasunak

Animaliak gara guztiok, baina, espezie ezberdinekoak. Horixe da neska-mutikoei bereziki zuzendua dagoen Animalien bitxikeriak izenburuko liburuan adierazten dena: lurreko ugaztunak, itsasokoak, intsektuak, hegaztiak, narrastiak, arrainak, anfibioak, moluskuak eta krustazeoak, dinosauroak zein pterosauruak... animaliok elkarren artean dituzten ezberdintasunak. Denek ekiten diote bizitzan hazteari, baina era oso ezberdinean: batzuek aita-amen itxura dute, beste batzuek hainbat fase igaro beharrean dira itxura hori lortzeko. Denek partekatzen dute zer edo zer besteekin, baina besteengandik defendatu beharra ere badute; eta arriskuetatik libratu ahal izateko, defendatzeko moduak eskaini dizkie naturak animalia guztiei. Haien guztien familia bizitza erakusten du Animalien bitxikeriak lanak.

Secundarios de lujo
Juan Velázquez
Erein
160 orrialde 10,81 euro

Bizitzan porrota ezagutu dutenen galeria

Juan Velázquezek Secundarios de lujo osatzen duten hemezortzi kontakizun laburren bidez erakusten duena beste hainbeste pertsonaiaren eta haiekin harremanetan jartzen direnen bizitzaren ilunaldiak dira. Tabernari lanpostutik erretiroa hartzeko batere gogorik ez duen gizona; familiako gorabeherekin zeharo aspertuta egon arren amaren etxera beti biltzen den semearena; atentatu batean hiltzen duten aita baten itxaropen zapuztuak; zoriona lortu duela uste duen neskame batek ugazaba dituenengandik jasandako ezustea; mutil koskor batek bere aitagatik jasota dezepzioa; bizitzan porrota besterik ezagutu ez duena gizagaixoagotzat jotzen duenari egiten ahalegintzen dena...

Amonak nobioa du
Leire Bilbao, Jokin Mitxelena
Elkar
32or. / 6,15 euro


Amonak nobioa du. Eta zer? bildumako kontakizun berria

Zortzi urtetik gorako neska-mutikoei zuzendua dago Elkar argitaletxearen Eta zer? bilduma. Azaldu ohi dituen kontakizunak, hala ere, adin horretatik dezente urrun -gora- egon daitekeen edonork gustura irakurtzeko modukoak dira. Amonak nobioa du izenburua duenak gurasoak banandu zaizkion mutikoa du kontalari. Amonaren etxera bidaltzen du amak, une zehatz batean, eta hara non jakiten duen amonak komeni denean gezurrak ere esaten dituela eta, are, nobioa ere baduela.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak

ASTEKARIA
2006ko urriaren 15a
Azkenak
EGILEA
Argia buletina
Egunaren laburpena
zure e-postan
Eguneraketa berriak daude