Beste baten etxean

Castillo Suarez @casti_suarez
2006ko uztailaren 23a

Ez zaizu gustatzen oporrak beste norbaiten etxean igarotzea.

Ez zaizu gustatzen etxeko jabeak hozkailuan janaria utzi baldin badu. Bere arrastoa utzi duela ematen du. Nolakoa den jakin dezazula egin duela iruditzen zaizu, nahiz eta badakizun adeitasunez egin duela, besterik gabe. Gainera, ziurrenik ez dizu berak jango lukeena erosi, baizik eta bere ustez zuk edo zuk bezalako batek jango lukeena: alkoholik gabeko garagardoak, Belgikako bonboiak eta era guztietako frutak, gehienak garestiak.

Ez zaizu gustatzen oporrak beste baten etxean igarotzea zurean egingo zenituzkeen gauza berberak egiteko baldin bada, baina, ez dakizu nola, gonbidapena onartu duzu. Eta hiri handi batean zaude, terraza handi bateko hamakan, gehienetan lotan eta besteetan irakurtzen, eta gezurra badirudi ere, ez duzu inorekin hitz egin nahi. Telefonoak jo du baina ez duzu hartu. Ez duzu hartuko hamaika hilabetez beti hartu izan duzulako telefonoa.

Eta ongi zaude. Oroitzapenak ezabatzen eta antolatzen. Eta kezka bakarra duzu: laneko lehendabiziko egunean zer esango diezun lankideei, besteek zeri buruz hitz egiten duten, horixe ahaztu nahian pasatu dituzulako azkeneko egunak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
ASTEKARIA
Azkenak
EGILEA
Eguneraketa berriak daude