Uztailaren 16an Abiadura Handiko Trenari buruzko herri kontsulta egin zuten Arabako Urbina herrian. Emaitzak honezkero jakingo dituzue. AHTren kontrako urteroko kanpaldia uztailaren 21etik 31ra egingo dute Urbinan bertan. Eta aste gutxi dira, Donostian AHTren aurkako manifestazioa egin zutela.

Oraintsu Espainiako eta Gasteizko Gobernuek lanak hasiko zirela esan dute, 4.100 milioi euroko inbertsioekin. Gasteizek eztabaidarako urteak pasa direla dioen arren, aurretik inolako eztabaidarik izan gabeko inbertsioa da hori, herriko talde ekologistek, sozialek, sindikatuek eta politikoek behin baino gehiagotan eskatu badute ere. Gure lurra eta gure geroa arriskuan jartzen duen inbertsio estrategikoa da hau, eta ezin da inposatu, are eta gutxiago proiektu estrategiko nazional baten barruan ez dagoenean. Lemoizko zentral nuklearra, Boroako zentral termikoa edo Itoizko urtegia inposizioaren adibide garbiak dira. Horrexegatik herri mugimenduak kalera irten dira behin baino gehiagotan. Nori egiten dio mesede AHTk? Dudarik gabe, ez gure ingurumenari, ezta lurralde antolamenduaren orekari ere, herri txiki eta ertainak bakartzen baititu. Ez dio mesederik egiten gure lursail eta nekazaritzari ere, birrindu egingo baititu. Ezta herritar xumeei ere, garestia izango baita. Ez dio mesederik egiten ohiko trenbideari ere, berau hobetzeko inbertsioak kenduko baitizkio... mesede egiten die lobby multinazionalei eta interes eta negozio pribatuei.