Zuetako batzuk Martxoak 31 taldean ibili zineten. Orain, 6 urte taldean. Zer esanahi du denborak?
Izenak zirkunstantzialak dira, ez diogu denborari garrantzi gehiegirik ematen, nahiz eta egia esan gure lehenengo abestietan sarri agertzen zen gai bat zen. Batek daki! Agian inkonszientean daramagu, bizitza denboraren joana besterik ez da, ezta?
Zelako jauzia izan da Estoldetan sortzea? Zer abantaila eta desabantaila ditu?
Jauzia handia izan da, artistikoki eta egindako lanean ere. Abantailak asko izan dira, prozesua gure gain izatean guztiaren kontrola izan dugulako, eta desabantaila handiena denbora gehiegi galdu dugula musika ez diren asuntoetan. Musika talde batentzat egokiena abestiak egin eta jotzea da, baina autoprodukzioan beste mila gauzataz ere arduratu behar zara eta indarrak dispersatzen zaizkizu.
Hitzek metafora oso gutxi dute eta erabat zuzenak dira, baita musika ere.
Bai, aurreko diskoekin alderatuta alderik nabarmenena da. Hitzetan eta musikan zuzen jo dugu, gauzak argi egin eta esanez, mozorrorik gabe.
Nahiko zenukete zuen kantuekin norbaitek Abesti galduak-en esaten duzuen sentipena izatea? Zer behar du kantu batek hori lortzeko?
Bai, noski! Abesti batek ezin dezake gehiago lortu. Abestia entzulearen bizitzaren parte izatera helduz gero, ez da inoiz hilko eta hori da musikariaren ametsa. Hori lortzeko, abestiak transmititzen duena entzuleak propio sentitu behar du, musikoak soilik doinua jarri balio bezala.
Disko honetan beste sonoritate batzuk gehitu dituzue: rock-and-rolla, ukitu elektro-dantzagarriagoak, rock kañeroagoa...?
Bai, ez dugu beti berdina egin nahi. Aurreko bi diskoen artean bazegoen aldea eta oraingoan ere. Gitarren soinua erabat eraldatu dugu, ahotsaren tratamendua, estilo ezberdinak sartu ditugu... Gorputzak eskatutakoa egin dugu eta ezin gusturago gaude.
* * * * * * * * * * * *
Jauzia
Sei Urte
estoldetan
Iraupena: 36'37"
10 euro
Pop-rock dotore bezain bizia
Berrizko laukote honek ustekabe handia hartu zuen Metak diskoetxeak ateak itxi zituenean. Hala ere, konbentzimendu handiz erabaki zuten diskoa egitearen prozesu guztia beraiek hartzea eta jauzia bakarrik egitea. Oso lan txukuna kaleratu dute, orain arteko anitzena. Dagoeneko badakite zer nahi duten eta etxeko marka den pop-rocketik aldendu gabe beste doinu batzuk ere beraien eremura hurreratu dituzte: hala nola, rock&rolla (Seiko belaunaldia), Ariel Rothen saga elektronika zipriztinekin ezkonduko lituzketen Superstar eta Gauaren garen heinean, edota TV Show kañeroa idatziz. Bestalde, aztiak dira kantuei melodia oso bereziak, harrapatzen zaituzten erritmoak eta gitarra aberatsak janzten, Britainia Handiko pop-rock dotoreena aberastuz edota Euskal Herriko pop-ari buelta erdi emanez. y