Sondikan ospatuko du UNIMAren Euskal Herriko adarrak aurten Txotxongilo Eguna. Ekainaren 17an izango da gala nagusia, baina ekitaldi andana izango da ostiraletik igandera bitarte herriko kaleetan. Euskal Herriko hamabost taldek (Behi-bi's, Antzezkizuna, Txotxongillo, Azika, Irrintzi...) hamasei ikuskizun aurkeztuko dituzte; batzuk euskarazkoak, beste batzuk gaztelaniazkoak eta bestetzuk hitzik gabeak. Teknika ugarirekin landutako lanak dira: itzal antzerkia, harizko txotxongiloak, hagatxo txotxongiloak... Horiez gain, mundu osoko txotxongiloekin osatutako erakusketa paratu dute eta haurrek txotxongiloak egiteko tailerrak egin ahal izango dituzte. Bergaran ere txotxongilo egunak izango dituzte asteburuan, Taun Taun taldeak bi urtero egiten duen Helduentzako Txotxongiloen Nazioarteko VIII. Erakustaldian. Kalean nahiz areto eta tabernetan arituko dira Pa Sucat (Katalunia), Teatro Urgente (Espainia) eta La Chana (Espainia) esaterako.

Fanfarreentzako, bandentzako eta kale musika taldeentzako nazioarteko lehiaketa antolatu dute Zornotzan: Haizetara. Hogei talde aurkeztu dira eta horietatik zortzi Zornotzako kaleetan ariko dira musika jotzen, ekainaren 23tik 25era: Orkestra Roma (Bulgaria), Bernie's Lounge (Herbehereak), Allegria Brass Band (Frantzia), Kumpa'nia Al-Gazarra (Portugal), Dixie Gang (Portugal), Bloco Dum Dum (Espainia), Banda de María (Espainia) eta Drinking Marching Band (Katalunia). Talde irabazleak 9.000 euro jasoko ditu eta publikoaren saria eskuratzen duenak 4.000 euro.

2004an baino %6,5 gehiago jaso zuen iaz SGAEk EAEn, guztira 20 milioi euro egile eskubideengatik. Hazkundearen arrazoietako bat musika arin eta modernoko kontzertuetako eskubideen hazkundea dela adierazi dute arduradunek eta batez ere iaz U2k Donostian eskainitako kontzertua. Bestalde, taberna, jatetxe eta bestelako aretoek musika grabatua jartzeagatik ordaindutako diruak %10,7 egin du gora. EAEn 15.000 establezimenduk ordaintzen dute musika jartzeagatik edo telebista pizteagatik kuota hori. Irrati eta telebistetatik jasotako diruak ere %17,43 egin du gora. Zinemak eta disko salmentek aldiz behera egin dute, %8,9 eta %4,9 hurrenez hurren. 2005ean EAEko 202 egilek eman zuten izena SGAEn; guztira 3.250 bazkide ditu autonomia erkidegoan.

Pasa den martxoaren 26an, Iñaki Egaña idazle eta Txalapartako editorea atxilotu zuen poliziak New Yorken eta lurraldetik egotzi zuen. Ameriketako Estatu Batuetan euskaldunekin erlazionatutako materiala biltzeko eta, horrenbestez, artxiboetan ikertzeko joana zen Egaña AEBetara. Nazioarteko PEN Klubak AEBetako Gobernuari eskatuko dio Egañari Mario Salegiren inguruko ikerketekin aurrera jarraitzen uzteko eta zergatik atxilotu eta egotzi zuten azaltzeko. Bestetik, Nazioarteko PEN Klubak Eusko Jaurlaritzari ere eskatuko dio hark AEBei azalpenak galdegiteko.

Aisialdia, kultura eta Euskal Herriko txoko eta ibilbide politen berri emango du. Horixe adierazi dute Neu bihilabetekariaren arduradunek. Euskaraz eta gaztelaniaz idatzita dago eta aurrerago euskarazko eta frantsesezko bertsioa plazaratu nahi dute. Lehen zenbakian Ramiro Pinillari egin diote elkarrizketa, Biarritz baletaren entseguetan barneratu dira eta gazta nola egiten den azaldu dute. Bost euro balio ditu eta 20.000 ale plazaratu dituzte.