Euskara munduko unibertsitate gehiagotan ikasi ahal izango da
Eusko Jaurlaritzako Kultura Sailak Europa eta Amerikako bost unibertsitateekin sinatuko du hitzarmena euskara eta euskal kultura irakatsi ahal izateko. Unibertsitateak honakoak dira: Valentziako Unibertsitatea, Berlingo Frei Unibertsitatea (honek Berlingo Humbolt eta Postdameko unibertsitateei zerbitzuak eskaintzen dizkie), Varsoviako Unibertsitatea, Helsinkiko Unibertsitatea eta Mexikoko Unibertsitate Nazionala. Egitasmo honen aitzindariak Txileko Santiagoko eta Valparaisoko lau unibertsitate eskoletan ematen diren eskola mintegiak dira. 300dik gora ikasle ari dira euskara ikasten eta bi heren baino gehiago ez dira euskal jatorrikoak. Bestalde, Euskal Herritik kanpo euskara ikasten ari den bi ikasletik bat argentinarra da. Eusko Jaurlaritzak Euskara Munduan proiektua (Argentinako Euskal Elkarteen Federazioak egindako eskaintzaren ondorioz sortua) Argentinan jarri zuen abian 1989an eta orain 600 ikasle ari dira euskara ikasten. 40 ikasle hemendik bi urtera irakasle aritzeko ari dira trebatzen.
Tabakoaren legeak euskararen hautsak harrotu ditu
Gustatu ala ez, Espainiako Osasun Ministerioak tabakoaren legea abian jarri du eta ez erretzeko edo erretzeko guneak adierazteko oharrak argitaratu ditu. Ez euskaraz, ez katalanez itzulpen txukunik ez zuten egin lehenengo bertsioan (ikus irudia). Bigarrenean katalanez egoki jarri omen dute, baina euskarazkoa egokiagoa bada ere, ez da zuzena. Dena dela, sarean (Sustatu.com eta Erabili.com), Eusko Jaurlaritzak argitaratutako oharrak aztoratu du jendea. «Hemen erretzea dago» esaldia hobetsi du erretzaileek beren plazera edo bizioa lasai bete dezaketela adierazteko. Itzulpen kaxkarra iritzita, bakoitzak bere aportazioak egin ditu sarean: «Hemen erretzea badago», «Hemen erre liteke», «Hemen erre daiteke», «Hemen erretzea ez dago debekatuta», «Hemen erretzea libre dago». Gaizki idatzitakoa edo itzulitakoa identifikatzeak ez dirudi hain zaila, baina egokia zein den erabakitzeak, ados jartzeak, behintzat, lanak ematen dizkigu, inondik ere.
Seaskak Ama Eskola irekiko du Baigorrin ikasturte berrian
Seaskak ez du ikastolarik Baigorrin (Nafarroa Beherea). Baigorriko, Bidarraiko, Irisarriko, Arrosako eta Ortzaizeko haurrak Ortzaizeko ikastolan elkartzen dira. Aurtengo ikasturtean 90 ikasle dira. Irailetik aurrera, Baigorriko Ama Eskolan 15 haur bilduko dira irakaslearekin. Otsail aldera diru bilketa egingo du Seaskak Ama Eskola gauzatu ahal izateko. Bestalde, Ortzaizeko ikastola handitzeko asmoa ere badu Seaskak.
Bakarrizketa barregarrien lehiaketa
Debagune Elkarteak (Debagoieneko Euskara Elkarteen elkargoa) antolatu du Bakarrizketa barregarrien 1. lehiaketa eta «Barre barra-barra» izena jarri dio. Otsailaren 28a baino lehen entregatu behar du partehartzaileak euskara batuan edo euskalkian idatzitako bakarrizketa. Lan onenaren egileak 300 euroko saria izango du eta bigarren onenak 150 eurokoa.