Bero-beroan


2021eko uztailaren 28an

Borondatea, konfiantza eta akordioa

Hauteskundeen aurretik ere baziren aldaketa haizeak, zantzu batzuk bederen bai. Ondoren ordea, haize bolada Euskal Herri osora hedatu da, eta Estatuan ere ari da zabaltzen pixkanaka. Zantzuak, duela hilabete zeuden bertsuak dira, baina hauen proiekzioa biderkatu egin da. Jadanik akordio, elkarrizketa, hiru erpinak, prozesu, eta halakoak zentralitate politikoaren ardatz bihurtzen ari dira. Ez dago zalantzarik lehenengo giroa sortu behar dela, ondoren eragile desberdinen artean konfiantza sarea ehundu eta gero edukiak datozela. Oinarrizko osagai horiek bederen behar dira gatazka politiko bortitza gainditu eta beste garai batera jauzi egiteko. Halako egoeratan akordioa da helburu nagusia, baina ezin da ahaztu akordioak negoziazio prozesuen ondorio direla eta hauek indar harremanen arabera erabakitzen direla. Nola metatu, beraz, indar hori abertzaletasunaren helburu historikoak norabide egokian jartzeko, akordio ahalik eta zabalena urratu gabe? Galdera horri erantzun beharko diote Eusko Legebiltzarrean nagusi diren indar abertzaleek.


Gara-ren aurka berriz

Gara inprimatzen duen KIE enpresari egotzi zaio Hernani inprimategiak (Egin argitaratzen zuena) zuen zorra eta gerta liteke Orain SAren zorra (Egin argitaratzen zuena) Baigorriri (Gara argitaratzen duena) bizkarreratzea. 2003an Espainiako Gizarte Segurantzak, enpresa jarraipena argudiatuta, Baigorriren eta KIEren bizkar utzi zituen Orain SAri eta Hernaniri leporatzen zien 5,1 milioi euroko zorra. Harrezkero, Gara-z arduratzen diren enpresak ordainketa etenarekin aritu dira eta prozesu korapilatsua jarraitu dute epaitegietan. Jarrita zegoen helegite bati erantzunez, Auzitegi Nazionalak Gizarte Segurantzaren alde ebatzi du Hernani eta KIEren kasuan, eta dagoen susmoa da Orain SA eta Baigorrirekin berdin jokatuko duela. Hala izatekotan, Gara-ren proiektu informatiboa eta 200 lanpostu inguru kolokan leudekeela salatzen ari dira egunkaria kaleratzen duten bi enpresetako arduradun eta langileak.


Ermuko Foroaren leherketa

Popular eta sozialisten artean bizi den giroaren isla da Ermuko Foroaren inguruan gertatzen ari dena. Batasunaren azaroko Anoetako Belodromoaren ekitaldiaren harira Ermuko Foroak jarritako salaketan Odon Elorza salatu izanak azaleratu du enfrentamendua. PPren eta PSE-EEren arteko zangak eta auzi honetan agertutako doinuak adierazten dutenagatik, Miguel Angel Blancoren omenez sortutako erakundearen etorkizuna kolokan dago, behintzat bere sorreratik gaurdaino izan duen izaerarekin.


Frantziak ezetz esanez gero...

Hipotesi desberdinak egiten ari dira maiatzaren 29ko erreferendumean Frantziak Europako Konstituzio-Itunari ezezkoa emanez gero sortuko litzatekeen egoerari buruz. Baiezkoaren aldekoek erabiltzen ari diren beldurraren estrategiaren aurrean interesgarri da Atacceko lehendakari eta kazetari ezaguna den Bernard Cassen-ek dioena: «Juridikoki ez da ezer gertatuko». 2004ko maiatzaren 1etik indarrean dagoen Nizako akordioak eta bere aurrekoek jarraituko lukete indarrean, edozein eratan ere, itun honek jarraituko bailuke 2009ra arte eta zenbait alorretan 20014ra arte. Politikoki »Cassenen ustez» ondorioa litzateke beste itun bat negoziatu beharko litzatekeela eta aukera legokeela hau baino sozialagoa litzatekeen ituna ateratzeko, batez ere beste estatu batzuek ere ezezkoa emango balute. Herbehereetan, esate baterako, ekainaren 1ean egingo da erreferenduma eta orain arteko inkestek ezezkoa gailenduko dela diote.


16 urteko mutila komisaldegiraz valentzieraz identifikatzeagatik

Xàtivako (Valentzia) polizia nazionalak Corcuera Legea ezarri zion 16 urteko mutil bati apirilaren 18an. Levante egunkariak (2005-05-21) jakinarazi zuenez, Xàtivako polizia nazionala gazteen artean droga bila zebilen eta miaketak egiten ari zen. Francesc Roca gazteak Nortasun Agiririk ez zuenez, poliziak identifikatzeko eskatu zion. Honek valentzieraz erantzun zien. Poliziak «habla en cristiano» esan ziola dio gazteak eta «Játiva esaten ez dakizu ala?» galdetu ziola. Komisaldegira eraman zuten gaztea, nahiz eta eskola aurrean zeuden irakasle batek eta zuzendariak gazteak emandako datuak baieztatu. Familiak salaketa jarri du ustezko legez kontrako atxilotzeagatik eta Valentziako hizkuntza ofizialetako bat ezin erabili izanagatik. Komisaldegiko buruak esan du polizia horiek ez dakitela valentziera eta mutilak ez zuela batere lagundu behin eta berriz valentzieraz egin zuelako.


Nafarroan D ereduak gora egin du eta
haurrentzako gelarik ez dago

Aurrematrikulazio datuek diotenez, D ereduan eta sare publikoan, hiru urteko 1.224 haurrek (iaz baino 38 gehiagok) eman dute izena eta ikastoletan 500ek (iaz baino 15 gutxiagok; iazkoa historikotzat jo zuen Ikastolen Elkarteak). Kopuru igoerak ordea, toki arazoak dakartza bai sare publikoan eta baita pribatuan ere. Iruñerriko ikastoletarako 274 haurrek eman dute izena eta 225entzat zuten tokia. Sare publikoan, berriz, hona bi adibide: Patxi Larraintzar ikastetxeak 75entzat zuen tokia eta 86k eman dute izena. Ezkaba ikastetxean 75entzat zuten tokia eta 97k eman dute izena. Sortzen-Ikasbatuazek masifikazioa salatu du eta zonifikazio berria bertan behera uztea eskatu. Hezkuntza kontseilari Luis Campoyk Cardenal Ilundain ikastetxean 24 haurrentzako D ereduko gela irekiko dutela adierazi du. Sortzen-Ikasbatuazek aurrerapausotzat jo du albistea, baina nabarmendu du ez dela konponbidea.


PSNk hizkuntza ponentzia ez du bertan behera utzi nahi

Nafarroako Alderdi Sozialistak mozioa aurkeztu du Nafarroako Parlamentuan eta Gobernuak eremu mistoa eta ez euskalduna berriz aztertzea lortzea nahi du. Mozioaz gain, ponentzia pizteko proposamena egin du.


Herriko Etxe Euskaldunen Eguna

Maiatzaren 14an bilduko dira Euskara Herriko Etxeetan Akordioa izenpetu duten udaletako ordezkariak. 36 herriko etxek sinatu dute akordioa eta Maulen elkartuko dira.


Azkenak
Ekofeminismoaz, motozerra eskutan

Duela hilabete inguru, unibertsitateko kide gizonezko baten liburu aurkezpenean ginela, egoera bitxi samarra gertatu zitzaigun. Ekologiari buruzko liburua zen eta erreferentzien artean hainbat pentsalari ekofeminista zeuden. Egileak, baina, inongo momentuan ez zuen aipatu... [+]


2024-06-17 | Jakoba Errekondo
Udaberria jan dezagun mikatzetik

Arabako Errioxako udaberriak ez dauzkat ahazteko. Urte dezentetan harrapatu ditut sasoi horretako loraldi betean hango mahastiak eta harrigarria da; laburra da paisaia berria, baina iraupen motz horretan begien sabaia erretzen du eta ordura artekoak ahantzarazten.


2024-06-17 | Nagore Zaldua
Itsas dortokak lozorrotik esnatu ote dira euskal kostaldean?

Udako solstizioa gerturatzen ari den honetan, euskal kostaldean itsas dortokak ikusteko aukerak ugaritu dira. Gure uretan ezagunena Egiazko kareta (Caretta caretta) da. Ale helduen oskolaren batezbesteko tamaina, 120 cm-ko luzera zuzenera eta 200 kg-ko pisura irits daiteke... [+]


2024-06-17 | Garazi Zabaleta
Lurbizi
Lurraren bankua sortzen, nekazaritzarako oinarrizko baliabidea bermatzekoa

Oiartzunen nekazaritza bultzatzeko eta elikadura burujabetzarako bidean pausoak emateko sortu zen Lurbizi egitasmoa, 2016 urte inguruan. “Herritar talde batek denbora zeraman herrian nekazaritzaren eta lehen sektorearen egoera kaxkarraz hausnartzen”, adierazi du Ibon... [+]


AEBek Hamasi leporatu nahi diote su-etena ez adostearen errua

Hamasek akordio proposamenari egindako aldaketa batzuk “ez dira egingarriak”, AEBetako Estatu idazkariaren arabera. Israelek ere ez du ofizialki onartu proposamena, baina AEBek Hamas aurkezten dute oztopo bakar gisa.


Eguneraketa berriak daude