Nafarroako Gobernuaren Industria eta Teknologia sailaren asmoak betetzen baldin badira, Nafarroak independentzia elektrikoa lortuko du 2010. urtean, energia berriztagarrien erabilerari esker (eguzki energia, eolikoa, hidraulikoa eta biomasa). Urte honetan bertan, 2005ean, aipatutako Nafarroako Gobernuko sailaren kalkuluen arabera, herrialde euskaldun honetako teknologia berriztagarrien potentzia kontsumo elektriko osoaren %95ekoa izango da. Potentzia horrek aurreikusitako kontsumo elektrikoa gaindituko du 2010. urtean eta Nafarroak independentzia elektriko osoa izango du.
Hego Euskal Herriko beste herrialdeetan, dagoeneko badira hiru parke eoliko (Elgea eta Urkilla Araban eta Oiz Bizkaian), aurreikusitako Badaia eta Ordunteko parke eolikoen proiektuek zenbait oztopo bizi badituzte ere: lehenengoaren kasuan Arabako Foru Aldundia da eragozpen nagusia eta bigarrenean zenbait talde ekologista eta herritar. EAEko Gobernuaren asmoen arabera, parke eolikoen energia ekoizpenak urtean 654 megawattekoa izan beharko luke 2010erako eta horretarako aurreikusitako inbertsioa 510 milioi eurokoa izango da urte horretara arte. Egun martxan dauden instalazioek ia 85 megawatt ekoizten dituzte. Horren guztiaren berri testu honen bigarren atalean emango da. Iparraldeari dagokionez, instalazio isolatu batzuk salbu, ez da inolako planifikazio eolikorik ezagutzen.
483 milioiko inbertsioa hamar urtetan
Egoera ez da gauetik goizera besterik gabe sortu. Honaino iristeko, planifikazio bat beharrezkoa izan da, apustu sendo eta inbertsio ekonomikoez gain. Energia berriztagarrien garapenean lanean diharduten 40 enpresa nafarrek 483 milioi euro baino gehiago inbertitu dituzte azken hamar urteotan energien ustiapen sistema eta instalazioetan, Nafarroako Gobernuko Industria eta Teknologia Sailak emandako datu ofizialei jarraiki.
Inbertsio horren banaketa honela egin da: inbertsioen %81 (392,14 milioi euro) instalazio eolikoetan erabili da, %11 (51,09 milioi) biomasa instalazioetan, %7 (36,49 milioi) eguzki energia instalazioetan, eta %1 (5,14 milioi) instalazio hidraulikoetan. Nafarroako Gobernuak inbertsioon sustapenerako emandako diru-laguntza erregionalak 55,75 milioi eurokoak izan ziren aldi berean.
Gaur egun 40 enpresa baino gehiagok egiten dute lan sektore honetan Nafarroan. Enpresok 3.600 lanpostu sortu dituzte; horietatik 2.400 enplegu zuzenak dira eta besteak industria inguruko arloei dagozkie. Gainera, industria horien ezarpenak diru-iturri berriak eratu ditu nekazal giroko zenbait eremutan eta horietako asko eta asko ekonomikoki biziberritu ditu.
Mila haize-errota urte bukaerarako
Nafarroa bisitatzen dutenek erraz ikusiko dute lurralde osoko zenbait eremutan parke eoliko ugari daudela. Bertako 28tik gora parke eolikoek mila haize-errota edo aerosorgailu izango dituzte urte bukaerarako (936 megawatt aurreikusten dira). Horretaz gain, Nafarroak Espainiako Estatuko planta fotovoltaiko handiena dauka Tuteran (1,2 megawatteko potentzia). Zangozak Espainiako Estatuko biomasa instalazio garrantzitsuenetako bat du, lasto erreketaren bitartez elektrizitatea sortzen duena (25 megawatt). Badira beste 120 instalazio hidrauliko lurralde osoan zehar sakabanatuak. Azkenik, biodiesela sortzeko lantegi bat martxan jarri berri da Caparroson; 20 milioi euro inguruko inbertsioaren fruitua da eta urtero 30.000 tona sortzeko gaitasuna izango du.
Apustu energetiko garbi hori aurrera ateratzeko, arlo ezberdinetako enpresak daude. Batzuek energia berdea eskuratzeko mekanismo teknikoen optimizaziorako ikerketan lan egiten dute. Besteek pala-aerosorgailuak eta bestelako tresna eolikoak sortzen dituzte. Bestalde, parke energetiko garbien sustapen eta kudeaketan diharduen enpresa ugari dago ere.
Eolikoa, garrantzitsuena
Zalantzarik gabe, Nafarroan ekoizten diren energia berriztagarrien arteko garrantzitsuena da energia eolikoa. 2003. urtean, berriztagarriek sortutako energia elektrikoa Nafarroan kontsumitutako elektrizitate guztiaren %61 izan zen (3.800 gigawatt/ordu/urte). Energia horren %43,6 eolikoa zen, %12 hidraulikoa, %5,3 biomasari dagokiona eta %0,05 eguzki energiari dagokiona. 2005 urterako Nafarroako energia berriztagarrien potentzia kontsumo elektriko osoaren %95ekoa izango da eta 2010 urterako aurreikusitako kontsumo elektrikoa gaindituko du, erabateko independentzia elektrikoa lortuz.