Ganbak plantxan

Hasier Etxeberria  | 
2004ko abenduaren 05a

Osagaiak:

-2 kg ganba
-Oliba olioa
-Gatz larria

Uretan pasa eta lehortu egingo ditugu ganbak. Olioz igurtzi eta gatz larri ugari emango diegu ondoren. Plantxa edo padera handi bat su bizian jarri eta hartan utziko dugu ongi berotu arte. Batetan edo hainbat txandatan erreko ditugu ganbak, haien tamaina da kontua. Hondo beroan ipiniko ditugu, ongi ordenatuak, beroak berdintsu har ditzan. Gorritu eta barruko haragia maneatzen hasi arte edukiko ditugu, minutu batez alde bakoitzetik, tamainaren arabera. Ez dugu kanpotik erreko diren beldur ari behar. Ez ditugu ganbak erregosi behar, baizik eta ongi txigortu. Erretiratu eta limoiarekin, maionesarekin edo bixigarri den beste saltsaren batekin zerbitzatuko ditugu ganbak.

Labean nola erre

Gero eta maizago ikusten ari gara, haragia edo arraina labean sartu ondoren, ahantzi egiten dela jendea egin behar duenaz eta errezetak zehaztutako denbora igaro arte, hantxe egoten dela labeari jaramon egin gabe. Ezer ez dago okerragorik.
Erreki on batek hezetasuna behar du beti labean dagoen bitartean. Hau da, jakia erretzen ari den erretiluak ura edo isurkariren bat behar du beti hondoan, jakia lehor ez dadin. Ura, ardoa edo unean uneko marinada izaten da isurkari hori. Lurruntzearen poderioz lehortzen ari dela sumatu orduko, isurkariz hornitu beharko dugu erretilua eta zuku harekin haragia edo arraina aldiro-aldiro busti.
Inork uste badu erre beharrean pieza egosi behar zaiola, hona hemen irtenbide batzuk. Lehenengoaren arabera, pare bat edo hiru zurezko koilara garbi jarriko ditugu erretiluaren hondoan, isurkarian, eta haien gainean jarriko dugu pieza, isurkaria uki ez dezan. Bigarren aukera dugu pieza labearen parrillaren gainean pausatzea eta erretilua beherago, zukua jaso dezan. Horrela eginez gero, etengabe garaztatu eta busti beharko dugu errekia.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Azkenak
ASTEKARIA
Azkenak
EGILEAK
Eguneraketa berriak daude