ELAko idazkari nagusi Jose Elorrietak publikoki jakinarazi du ELA eta LABen arteko harremanean hoztasun unea bizitzen ari dela, nagusiki hainbat sektoretako negoziazio kolektiboa dela eta. Azkenotan, ELAri elkarrizketarako deia egin diola argitu du LABek komunikatu batean, eta ELAk biltzeari uko egin diola. ELA eta LAB dira euskal esparru sindikaleko bi indar nagusiak, eta azken urteetan abertzaleen arteko elkarlanaren ikur nagusi bilakatu badira ere, beren tentsio uneak ere igarotzen dituzte, batez ere eremu sindikalean bizi duten lehiagatik. Nazio eraikuntza eta gatazkaren irtenbidea dela eta, elkarlan maila batera iritsi dira, baina baita zapai batera ere. Elorrietaren sindikatuaren ustez, burujabetzaren bidean heldu da arre edo so egiteko unea, eta prozesu zibil soberanista bultzatzekotan, ENAM osoak sinetsi beharko luke abertzaleek egun duten indarrean eta ETAk jarduera armatua baztertu beharko luke. ELAren ustez, ENAMek oraindik bete-betean sinesten du prozesu subiranistari ekiteko ezinesbestekoa dela EAJrekin akordioa lortzea, eta hori lehenesten du edozeren aurretik. Beraz, eskema hori gainditu arte, indar guztiak eremu sindikalera bideratuko ditu, are gehiago gaur egun, gatazka soziala gori-gorian dagoenean eta neoliberalismoaren esparruetatik gatazka sozial hori ukatzeko joera gero eta irmoago ikusten duenean. Berezko lehia sindikala eta nazio garapenarekiko ikusmolde desberdinak ere hor dira tentsio horren oinarrian.

Gatazkaren gainditze bidean, azaroaren 14an garrantzi handia izango duen proposamena egingo duela iragarri du Batasunak. Asko dira Batasuna edo bere aitzindariek egindako gisa horretako iragarpenak, baina hala ere, jadanik lortu du komunikabideak eta klase politikoa egun horretan Donostiako Belodromoan egingo duen ekitaldirantz begira izatea. Deia egunkariak aurreratu duenez, Batasunak balizko herri kontsultan erabiliko lukeen galdera aurkeztuko du. Pernando Barrena Batasunako Mahai Nazionaleko kideak zehaztu duenez, ez da proposamen borobilik egingo, aurrera egin ahal izateko ekarpen bat baizik.

Alderdi politiko guztien arteko elkarrizketa bultzatzeko agiria aurkeztu berri du Elkarrik: Alde anitzetako elkarrizketa prozesu baterako ekarpena. Maiatzean hasitako prozesuaren emaitza alderdiei eta erakundeei aurkeztuko zaie orain. PP eta Batasuna ezik, gainerako alderdietako ordezkariek landutako idazkia da, baina aipatu bi alderdiek edukien garapenaren berri izan dute. Batasunak lehen bileran parte hartu zuen, baina berehala aldendu zen, bere indarrak Nazio Eztabaidagunean zentratzeko. Bi ereduek egiten dute elkarrizketa eta gatazka gainditzearen aldeko apustu, baina oinarri desberdinetatik, lehen urratsetan bederen: Elkarrik, alde guztien arteko elkarrizketa eta akordioa bilatzen duen bitartean, Nazio Eztabaidagunea, nazio eraikuntza ardatz, alderdi abertzaleen arteko akordioa bultzatzen ari da, hortik gatazka bortitzaren amaiera etorriko delakoan.

Hiru Sareta izeneko elkartea sortu dute Biga Bai guraso elkarteak, Euskal Haziak eskola kristauak eta Seaskak. Elkarte egituratu berriak Frantziako Hezkuntza Ministerioaren jarrera gaitzetsi nahi du. Bost eskakizun egin dituzte hiru elkarteek: euskararen ofizialtasuna, euskarazko irakaskuntzaren eskaintza sistematikoa, hiru sareentzako medio propioen ezagutza, euskararen presentzia baloratzea ikastetxeetan eta euskara komunikazio tresna gisa bultzatzea. Hiru Sareta elkarteak abenduaren 11n, Baionan, euskarazko irakaskuntzaren aldeko manifestazioa egingo du.

EUSTAT-ek apirila eta ekaina bitartean EAEn egindako inkestaren arabera, lehen euskal bilatzaile eta atari elebakar moduan Aurki.com agertzen da 14. postuan. Lehen euskal web elebakar moduan berriz, Berria.info ageri da 31. postuan.

Osasun zentro eta ospitaleetan euskararen erabilera indartzeko asmoz, Eusko Jaurlaritzak, HABEk eta Herri Arduralaritzaren Euskal Erakundeak (HAFE) zazpi liburu, bideoa eta CDa argitaratu dituzte. Osatuz izena du material didaktikoak eta medikuntza orokorreko eta pediatriako langileentzat da.

Pedro Burillo, Nafarroako Unibertsitate Publikoko errektorearen taldeak, urria hasieran, aurkeztu zuen Abiaburu Agiria, hau da, euskara normalizatzeko plangintza egiteko mugak zehazten dituen txostena. Gobernu Kontseiluak onartuz gero »hala gertatuko da ezustekorik ez bada» litekeena da otsailetik aurrera ikasgai batzuk euskaraz ematea. Dena den, Burilloren planak kritikak jaso ditu «lausoegia eta orokorregia» dela argudiatuta. NUPen egindako inkestaren arabera, irakasleen %10 euskaraz irakasteko gai da, eta ikasleen hirutik batek ikasiko luke euskaraz.

Igandean hil zen apaiz pasionista bidaniarra (Gipuzkoa). Larrartek Koldo Mitxelenaren gidaritzapean egin zuen tesina: «Bait-Tartasen Ontsa Hiltzeko Bidean-n» (1983). 50eko hamarkadaz geroztik euskara irakasle izan zen makina bat tokitan: Gabiria eta Zornotzako pasionisten ikastetxeetan, Urretxuko Ikastolan, Iruñeko Hizkuntza Eskolan eta Bergarako UNEDen, besteak beste.