Horixe egin beharko dute urriaren 23an Donostian egingo den 15/15 Zinema Jaialdian parte hartuko duten lehiakideek: 15 minutuko filmak errodatu beharko dituzte hamabost orduko epean. Zinemaldi hau 2001ean sortu zen eta urtero herrialde ezberdin batean egiten da. Zinema zuzendari berri eta independenteei zuzendutako lehiaketa honek mundu osoko zuzendari eta ikusleen arteko harremana estutzea du xede. Aurkezten diren filmak Larratxoko kultur etxean erakutsiko dira eta ondoren munduko 20 hiritan proiektatuko dituzte, Melbourne, Sidney, Bartzelona eta Bagkoken esaterako.

Abian da jada Euskadiko Orkestra Sinfonikoaren (EOS) aurtengo denboraldia. Guztira 44 lan joko ditu eta horietatik 18 lehen aldiz. Gabriel Erkoreka konpositoreak (Bilbo, 1969) EOSentzat propio sortutako Oceano obra aurkeztu zuten joan den astean Hegoaldeko hiriburuetan, Toru Takemitsuren Quotation of dreamekin batera. Bestalde, hurrengo hilabeteetan C. Lindbergenen Behac Monroh eta Roremen Orkestra eta biolontxelorako kontzertua entzun ahal izango dira lehenbizikoz Euskal Herrian Euskadiko Orkestraren eskutik. Ohi bezala, konpositore klasikoen lanak emango ditu EOSek, baina euskal konpositore garaikideen lanak (Luis de Pablo, Agustín González Acilu eta Luis Aranburu) ez ditu ahantziko.

Urriaren 31 arte hainbat euskal kantarik eskainiko du emanaldia Parisko euskal etxean. Besteren artean Anari, Maddi Oihenart, Basque Dub Fundation, eta Gernikako koroa ikusteko aukera izango dute paristarrek, baita bertan bizi diren 30.000 euskal herritarrek ere. Euskal etxeko musikaren osagarri, Kantuketan erakusketa paratu dute Saint-Merry elizan, euskal kantagintzaren iragana, oraina eta ezaugarriak aurkezteko. Euskal musikaren unibertsoa Parisen ezagutarazteko ekimen hau Euskal Kultura Erakundeak eta Parisko Euskal Etxeak antolatu dute, elkarlanean, eta 30.000 euroko aurrekontua du.

Arteak eman diezaioke erantzunik egungo galdera handienei. Hain zuzen, saiakera hori egin dute Iruñeko Moises Perez de Albeniz galerian bildu diren sei artisten bideo instalazioek. Tokikoak mundu globalizatuan duen eragina aztertu duten sortzaileen artean, hiru euskal artista daude. Ibon Aranbarrik naturaren eta artifizioaren arteko harremanaz egin du hausnarketa Iritegiko kobazuloaren itxuraldaketa jasotzen duen instalazioan; Iñaki Garmendiak Taiwango bost gaztek Kortatu taldearen Kolpez Kolpe kanta nola interpretatzen duten erakusten digu; eta Inazio Escudero nerabezaroaz eta denboraren joan-etorriaz mintzo da bere lanean. Horiez gain, Antoni Muntadas kataluniarraren, Sung Hwan Kim korearraren eta Willie Doherty irlandarraren lanak daude ikusgai Glocal izena duen erakusketan, azaroaren erdialdera arte.

Urrian sartzearekin batera, antzokietako besaulkiak berotzen hasten dira. Eskaintza anitza izaten da eta zaletuek komeriak izaten dituzte, egun beretsuetan izaten baitira bost bat jaialdi. Hurrenez hurren, Getxoko eta Pasaiako Antzerki Jardunaldiak dira lehenak, urriaren 15etik 24ra bitartean. Getxokoen XXII. aldian euskal taldeen azken lanak ikusi ahal izango dira: Deabru Beltzen Adi Adi, Adosen Dekameronea, Tanttakaren Paradero desconocido... Pasaiako XXIII. jardunaldiek, urtero gisa, umorea izango dute ardatz. Besteak beste, Markeliñeren Cuatro de Corazones eta Madrileko Hiporen H. El pequeño niño obeso quiere ser cineasta eskainiko dituzte. Baionako Les Translatines jaialdiak (urriak 19-24) Latinoamerikako eta Frantzia eta Espainiako lanak jasoko ditu (Carniceria teatroren La historia de Ronald el payaso de Mc Donalds, La Tropparen Jesus Betz...). 21etik 24ra, Irungo Gazte Antzerkiaren XX. Erakustaldiak hamaika talderen lanak hartuko ditu (Logelaren Ohe handi bat, Pikorren Zapaldu marra...). Bilboko antzerki eta dantza BAD jaialdiak banguardiari irekiko dizkio ateak 21ean. Hogei ikuskizun eskainiko ditu, Antzerkiola Imaginarioaren Kaputen Kanta eta Suitzako L’ Alakran taldearen Psychophonies de l’âme, tartean.
Prest? Oihala altxatzear da.

Artista gazte irudimentsu talde batek Emancipator bubble burbuila sortu du. Burbuila handi honek, aukera ematen dio gurasoen etxean bizi den gazteari eremu independente bat sortzeko. Etxeko edozein gelatan jarri daiteke, eta ur, argi eta telefono gastuak gurasoen kargu geratzen dira. Ironiaz beteriko ekimen honek debatea piztu nahi du gazteek etxetik joateko dituzten arazoen inguruan. Era berean, gazteen izaera kritikatzeko ere bide ematen du, gurasoen etxeko erosotasun denak mantendu nahi dituztenei zuzenduta baitago produktua. Ikusteko dago zer harrera izango duen gizartean. Dagoeneko, aurkezpenak egiten ari dira. Hurrengoak Gasteizen -urriaren 24 arte- eta Donostian -urriaren 19tik 31ra- egingo dituzte.

* * * * * * * * * * * * * * * * * * * *

Musika talde berrien gida plazaratuko du aurki Gaztesareak (www.gaztesarea.net). Maiatzetik musikari buruzko eztabaidan aritu dira eta merkatuko legeetatik kanpo, musika taldeak eta kontzertuak sustatzeko beharra sumatu dute. Hala, gida horretan diskoetxeekin kontraturik ez duten musika taldeei leku egingo diete »taldearen argazkia, aurkezpen testua eta kontakturako telefono eta posta elektronikoa agertuko dira» eta gaztetxe eta kontzertu aretoak taldeokin errazago izango dituzte harremanak. Denen onerako.