Bide Ertzean taldeak bosgarren diskoa grabatu du Andoaingo Garate estudioetan. Esan Bare izeneko diskoa iraila eta urria bitartean kaleratuko du Gaztelupeko Hotsak diskoetxeak.

Imanol Larzabalek hil aurretik zuen sehaska kantuen diskoaren proiektua aurrera eramango du Elkar argitaletxeak. Imanolen 6 kantu eta haren adiskideek grabatuko dituzten beste bost bilduko ditu Bolona-Molona. In Memorian diskoak. Bestalde, Imanolen lagunek omenaldia egingo diote urrian, Donostiako Antigua auzoan.

Ana Diez eta Aitzol Aramaio suertatu dira New Yorkeko LaCinemaFe zinema jaialdiko irabazleak, Galindez dokumentala eta Terminal film laburrarekin, hurrenez hurren.

Joseba Olalde ARGIA aldizkariko argazkilari kolaboratzailea hil zen abuztuaren 22an, bihotzekoak jota. Egin eta Euskaldunon Egunkarian aritua, free-lance ari zen azken urteetan argazkilari arabarra. Bastidan eginiko 60 argazkirekin liburu bat prestatzen ari zen Arabera argitaletxearekin, urrian kaleratzekotan.