Lizartzako laborategia
EAJko GBBk erabakita, hiru zinegotzi kargu bere garaian legez kanpo jarritako Axudario herritarren zerrendaren esku geratu dira. Pozik agertu dira Lizartzako ezker abertzalekoak eta ekimen honek laborategi gisa balioko duen ikusteke dago orain. EBBren esku dago erantzuna, baina dagoeneko Josu Jon Imaz buruzagi jeltzaleak aurreratu du GBBren erabakiek ez dutela aurrera egiterik. EAJren barne tentsioak bigarrengoz azaleratu dira egun gutxitan, duela bi aste Odon Elortzak Donostiako Udala elkarrekin kudeatzeko EAJ eta EAri egindako eskaintzaren ondoren. Borborka dabil euskal politikaren lapikoa, eta oraindik urak gainezka egin ez badu ere, epe ertainean orain arteko egoerak norabide desberdina hartuko duela antzeman liteke. Desberdina bai, baina norabidea da zalantza, eta honek gatazka bortitza gainditzeko adinako indarrik izango duen dago ikusgai.
PSN: Lizarbe, Chivite eta Diario de Navarra
PSNk hilaren 17 eta 18an egingo duen kongresuan erabakiko da alderdia Juan Jose Lizarbek gidatzen jarraituko duen edo orain arte honen lan taldean antolaketa idazkari gisa aritutako Carlos Chivitek hartuko duen zuzendaritza. Borroka latza dago jada PSNren baitan, baina batek baino gehiagok »baita PSN-n ere» Diario de Navarraren eskua eta dirua ikusten du Chiviteren jokaldiaren atzean. Foru hauteskundeak urruti dira oraindik baina abertzale eta PSNren arteko balizko aliantzak dardara eragiten du UPNren lerroetan.
Sakabanaketaren heriotzak
Hilaren 8an topatu zuten urkaturik bere ziegan Oihane Errazkin Pariseko Fleury Merogisko espetxean. Datuen arabera bere buruaz beste egin zuen. Beste kontua da zerk bultzatu zuen itzulera gabeko halako erabakia hartzera, eta hor agertzen da euskal preso politikoak eta beren senideen aurka indarrean dagoen sakabanaketa politikaren aurpegirik krudelena. Espetxea suizidioz jositako eremua da, eta ezin esan halakoak guztiz saihestezinak direnik, baina 31 urteko donostiarra Euskal Herriko espetxeetan egon izan balitz, zaila litzateke halako bukaerarik irudikatzea; edota, besterik gabe, presoek bizi dituzten baldintzak pertsonak merezi dituenak balira. 1981etik hamar euskal preso hil dira Frantzia eta Espainiako espetxeetan. Beste zortzi espetxean gaixotu ondoren hil dira kalean. Presoen senide ugari ere hil dira errepide eta auto-burdin hesietan harrapatuak. Sakabanaketarekin bukatzeak ere agenda politikoaren lehen lerroan beharko luke.
Irakasleen egonkortasun akordioa eta hizkuntz eskakizunak
Irakaskuntza publikoan aritzen diren funtzionario ez diren 1.500 irakasleen egonkortasuna bermatzeko hitzarmena sinatu berri dute. Eusko Jaurlaritzako Hezkuntza Sailak eta LAB, ELA eta EILAS-ek sinatutako akordioa ez da CCOO eta UGTren gustukoa izan. Hizkuntz eskakizunak bete ez dituztenez, 158 irakaslek egonkortasuna galdu dute. Horietako 40 irakaslek euskara ikasteko Irale programaren txanda guztiak ahitu dituzte aurrez. Beste 118 irakasleek, oraindik, 2007ko abuztura arteko epea daukate bigarren hizkuntz eskakizuna lortzeko. Helburua betez gero, egonkortasuna berreskuratzeko aukera izango lukete. UGT eta CCOOek ez dute begi onez ikusi akordioa. Lehenak «lan eskubideei egindako lapurreta» dela dio eta bigarrenak lege-neurriak hartuko dituztela eta mobilizazioak egingo dituztela adierazi du.
Kontseiluak administrazioa euskalduntzeko plana kritikatu du
Kontseiluak 1989 eta 2004 urteen artean EAEko administrazioa euskalduntzeko prozesua aztertu du eta azken plangintzaren ezaugarriak kritikatu ditu. Aurreko bi plangintzek emaitza kaxkarrak lortu dituztela dio Kontseiluak eta III. plangintza bide beretik diseinatu izana salatu du.
Emaitza kaxkarren adibideak jarri zituen Kontseiluak. Hona pare bat. Batetik, II. Plangintzaldian hizkuntz eskakizuna bete behar zutenen %41,78k egiaztatu zuen. Kopuru hori (913) plantila osoaren %14,58 zen. Bestetik, langileen %81 40 urtetik gorakoa da eta 45 urtetik gorakoek ez dituzte hizkuntz eskakizunak bete behar.
Kongresuan hizkuntza koofizialak
Ciu, erc, eaj eta Talde Mistoak Kongresuan hizkuntza koofizialak erabiltzeko eskubidearen aldeko proposamena aurkeztu dute. Datorren irailean edo urrian proposamen horri buruzko eztabaida monografikoa abiaraziko dute.
Bestalde, Eleaniztasunaren Aldeko Erakundeak Espainiako Gobernuak iragarri berri duen gidabaimen berria gaztelania hutsean ez jartzeko eskatu dio gobernuari. Katalana, euskara eta galegoa ere erabiltzeko proposamena egin du erakundeak.