Argitalpenak


2004ko ekainaren 27an
KilimAmuak
Batzuen artean
Mikelazulo, gakoa liburuak
148 orrialde+ CD
15 euro


Mikelazulokoen Letren kilimak

Dagoeneko badira bi urte pasatxo Oreretako Mikelazulo kultur elkartekoek Letren kilimak ikuskizuna Euskal Herrian zehar eskaintzen ari direla. Ikuskizun horrek esperimentazioa du xede eta hitzordu bakoitzean parte hartzeko prest dauden idazle, musikari nahiz pintoreek erabakitzen dute zein tankerako ikuskizuna egin. Bat-bateko olerkigintzaren ildotik abiatu izan da esperimentaziorako bide nagusietako bat. KilimAmuak liburua eta diskoa Letren kilimak berri bat izateko asmoarekin sortutako lana da. Mikelazuloko 25 pertsonak hamar taldetan elkartuta hilabete batez diziplina artistiko ezberdinak harremanetan jarriz sortu dute, talde bakoitzak pintura, eskultura, poesia, antzerkia edo musika hartu duelarik oinarri gisa.

California’ko bertsolari eta musikari
Pedro Juan Etxamendy
Auspoa, Gipuzkoako Foru Aldundia
295 orrialde


Pedro Juan Etxamendyren bertsoak eta doinuak

Pedro Juan Etxamendyk idatzitako bertso eta konposizioez eta bildutako ele zaharrez gain, Etxamendy beraren bizitzako pasarterik gogoangarrienak ezagutzeko aukera eskaintzen digu Jose Mallea Olaetxek hitzaurrean. 1914an jaio zen soinujole eta bertsolari hau Udirienia baserrian, berez Arnegikoa baina elizaz Luzaidekoa den Ondarrola auzoan. 1950ean Ameriketara joan zen, familiarekin, bizimodua atera nahian. Eta hantxe jarraitu zuen bizitzen 2002ko urriaren 26an hil zen arte, zenbaitetan Euskal Herrira bisitan itzuli zen arren. Musikari bikaina genuen, nahiz eta mutil koskorra zela hiru hatz galdu lehergailu batekin. Konposizio askoren egilea ere izan zen Pedro Juan Etxamendy, eta horietako batzuren doinuak jasoak izan dira liburuan.

Sakanako Hiztegi Dialektologikoa
Jose Luis Erdozia Mauleon
Euskaltzaindia, Nafarroako Gobernua
413 or. / 18 euro


Sakana haraneko lexikoa bilduta

Jose Luis Erdozia Mauleonek lan ugari argitaratu du toponimiaz zein Sakanako dotrina eta herrietako euskara aldaeren ikerketei buruz. Oraingoan, berriz, Nafarroako mendebaldean, Araba eta Gipuzkoarekin muga eginez dagoen Sakana haraneko lexikoa bildu du, jasotako hitzak aztertuz, eta sarrera bakoitzari buruzko hainbat datu esanguratsu eskainiz. Lexikoa biltzeko orduan, oraindik gure artean bizi direnen lekukotasunak baliatu ditu, eta baita aurretik Sakanako lexikoaz argitaratu diren beste lan ugari ere. Frantzisko Ondarra euskaltzainak liburuaren hitzaurrean adierazten duenaren arabera, herriaren ahotik jasotzen ditu hitzak eta hitz inguruak, erreminta bezala euskara batua erabiliz eta Orotariko Euskal Hiztegian hitz bakoitzak duen sarrerara bidaliz irakurlea.

Euskera
Batzuen artean
Euskaltzaindia
1.248 orrialde


Euskeraren 48. liburukia

Euskaltzaindiaren agerkari ofiziala den Euskeraren bigarren aldiko 48. liburukian, Jose Mari Satrustegiri eta Rudolf P. G. De Rijk ohorezko euskaltzain zendu berriari egindako omenaldiak jasotzen dira, baita Euskaltzaindiaren barne-historia (IV), eta erakunde honen azken agiriak ere. Era berean, Manuel Inchausperen mendeurrena eta Bartolomé de Carranzaren V. mendeurrena zirela-eta egile ezberdinek osatutako hainbat lan, Nafarroa Oinez 2003an Euskaltzaindiak antolatutako VII. Jagon Jardunaldietan Xabier Lasak aurkeztutako Euskararen erabilera Nafarroako elizan. Iruñea eta Tuterako elizbarrutietan egiten den euskararen erabilerari buruzko azterketa soziolinguistikoa eta Pello Apezetxeak osatutako Elizaren euskararekiko jarrera Nafarroan.

Bi ipotx gure etxeko sofan
Arantxa Iturbe + Jon Zabaleta
Elkar
44 orrialde
6,65 euro


Ipuinak irakurtzea maite zuten ipotxak

Arantxa Iturbek idatzi eta Jon Zabaletak marraztu duen ipuin honetako kontalariari ezusteko polit bat gertatu zitzaion lehengo batean, eskolatik itzuli zenean. Bi ipotx aurkitu zituen bere etxeko sofan eserita, telebista ikusteko gogo izugarriarekin. Ez zekiten tramankulu hura nola piztu, ordea, eta gure neskatxak piztu zien telebista. Baina ea zer demontre egiten zuten han eta horrelakoak jakin nahirik, galdezka hasi zitzaienean, ez zioten kasu zipitzik egin, hain zeuden telebistari lotuak. Gure neska kezkatzen hasi zen. Izan ere, zer esango zuen bere ahizpa nagusiak ipotxak han zirela ikustean? Eta aitak? Eta amak? Badaezpada, Edurnezuriren ipuina irakurtzea proposatu zien ipotxei.

Hizpide
Batzuen artean
HABE
108 orrialde
5,09 euro


Hizpide aldizkariaren 55. zenbakia kalean

HABEren euskalduntze-alfabetatze aldizkariaren 55. zenbakian aurki daitezkeen lanen artean, Iñaki Pikabearen Ikas-estiloetan eta ikas-estrategietan oinarritutako esku-hartze programa bat, Josu Peralesen Adina eta hizkuntzen ikaskuntza, Mitxel Kaltxakortaren Galdegaia-lekua testu hastapenetan lanaren bigarren zatia, Matilde Sainz eta Pili Sagastaren artean osatutako Eleaniztasunaren konpetentziaren arkitektura eta konplexutasuna, eta Pello Esnalen Preskripzioa: oinarrizko hizkuntza ekintza daude.

Elezaharren bidetik
Marrtin Anso
Alberdania
222 orrialde
13,50 euro


Martin Anso altxor kutxaren barrura begira

Elezahar kontutan oso aberatsa dugu Euskal Herria, eta altxor horretan arakatu zuen Martin Ansok Gara egunkarian argitaratzeko istorio hauek idazteko orduan. Zazpi euskal lurraldeetako legendak dira batzuk, ipuin tradizionalak besteak, gertaera historiko apokrifoak ere ez dira bilduman falta, ez eta beste motako kontakizunak ere. Amodio istorio triste bezain gozoekin batera, badira berean gertaera gogorrak islatzen dituzten makina bat kontakizun, Euskal Herrian ere ez baitira gutxi izan historian zehar gertatutako bortxaketak, mendekuak, horma arteko zigorrak, urkamenduak eta beste abar luze bezain ankerrak. Horietako askoren berri ematen digute Martin Ansok umore ukitu galantaz idatzitako istorio hauek. Chambre d’Amour-en ito ziren gazteen maitasun sutsuarekin hasi, eta hor garamatza, San Adriango bideetan barna, traidoreei aterpe ematera ukatzen den Nafarroako lurretatik, pirata baionar baten gorabeheretara, gauez Maddi eta egunez oreina zen neskatilaren kasua ahaztu gabe, euskal etnologo eta folkloristen liburuetan zein egungo idazleen lanetan aurkitu dituen elezahar polit hauek kontatzerakoan.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude