Eroski eta Consumerren banaketaren teoria politikoa
Eroskiren eta Consumerren banaketaz prentsa ohar bateratua egin zuten bi taldeek eta banaketarena Valentziako kooperatibak bultzatutako erabakia zela zioten, Eroskirekiko gero eta bertikalismo handiagoa ikusten zuela eta bere izaera galtzeko beldur zela. Ez da erraza halakoetan zer dagoen jakitea, baina Espainiako zenbait komunikazio gunetan, aldiz, zentzu politikoa eman nahi izan zaio erabakiari. Lozenzo Contreras kazetari eskuindar ezagunak gaia jorratzen du Estrella Digital egunkari elektronikoan eta galdetzen du ea honek esan nahi ote duen Espainiako gizarteko sektore desberdinetan enpresa eta merkatal erantzun bat ematen hasi den euskal merkatu taldeekiko. Iradokitzen du, halaber, egoerak horrela jarraitzen badu jarrera hori Kataluniako taldeetara heda daitekeela.
Nafarroa Bai eta Batasuna, bakoitza bere aldetik
Beren eremuan erreferentzialak diren pertsona ugari, idazkiak sinatu bai ala ez ibili da asteotan Nafarroan. Joan den larunbatean 200 bat pertsonak Nafarroa Bairen aldeko botoa eskatu zuen eta duela bi beste 30en bat pertsonak Nafarroa Bai eta Batasunaren aldeko akordioa eskatu zuen. Azkenean, baina, akordioa ez da gauzatu, eta koalizioko eta Batasunako buruzagien arteko akusazio gogorrak egiten ari dira. Pentsa liteke, gainera, akusazioen tonuak gora egingo duela martxoko hauteskundeak gerturatu ahala.
Estatuaren espioitza lanak Euskal Herrian
Carod-Rovira auziak Estatuaren espioitzaren gaia plazaratu du berriz ere kalera. Euskal Herrian alderdiek eta beste erakunde askok ez dute zalantzarik egiten ari zaien espioitzaz. Kontu zaharrak dira baina, esate batera, Gara egunkariak joan den igandean gizarteko eragile politiko eta sindikal ugarik espioitzarena nola bizi duten azaltzen zuen. EA, EAJ, Ezker Batua, Batasuna, ELA, LAB eta beste eragile askoren kasuak aipatzen diru. Canarias Ahora egunkari digitalak Estatuko espioiek BNG, ERC, EAJ eta EA etengabe nola espiatzen dituzten jakinarazi du, eta Carod-Rovira eta ETAren elkarrizketa horrela jarraitu zutela eta ez ERCko satorragatik. Filmetako espioitza lanak gogora ekarriz, Kanarietako egunkariak dio bilera gunearen inguruetan hamar etakide armatu zirela bilera babesten, eta harrigarria dela nola ez ziren jarri lanaren jakinaren gainean Frantziako zerbitzu sekretuak eta guztiak atxilotu.
Batasuna, ausardia eta arriskua
Azken asteotako gertakizunek iragartzen zuten bezala, joan den udal eta foru hautekundeetan hartutako bidea errepikatuko dela jakinarazi du Batasunak. «Autodeterminazioari bai» eramango duen boto papera erabiliko du horretarako. Legez kanpo egonda eta beste indar politikoekin akordiorik lortu gabe, gaur gaurkoz alternatiba gehiegirik ere ez du Batasunak: edo beste norbaitentzat botoa eskatu edo abstenitu edo ofizialki baliogabeak izango diren botoak bultzatu. Bistan da ez duela botoa beste norbaitentzat eskatuko, eta abstentzioa eta botoa eskatu artean, bigarrenak joko politiko gehiago eskaintzen diola, maiatzean ikusi ahal izan zen bezala. Bere hautesleriarengan konfiantza handia jartzen du neurri honekin, baina hartzen duen arriskua ere handia da, jarduera politikorako baldintza oso zailetan, gainerakoenak bezala kontatuko direlako bere boto ofizialki baliogabeak.
Hizkuntz gutxituak kaltetuta Frantzian
Frantziako ikastetxe eta lizeoetan irakasle izateko egin behar den CAPES azterketako zuzentzaileek gobernuak hizkuntza gutxituen inguruan hartutako erabaki berriak salatu dituzte, gobernuko kideek hizkuntza horiekiko azaldutako mespretxua gaitzetsiz. Gobernuak jarritako baldintza berri horien arabera, orain arte euskara, bretoiera, katalanera eta okzitaniera irakasten zituzten irakasleen kopurua erdira, herenera edo laurdenera murriztuko da. Herrialde osoan hizkuntza gutxituetako irakasleak Frantziako %45a baziren, neurri berrien arabera %27a izango dira hemendik aurrera.
EHE eta Azkarraga bildu dira
Hainbat bider bilera eskatu ondoren, azkenean, joan den astean, erdietsi zuen EHEk Azkarraga Justizia sailburuarekin biltzea. Bileraren helburua sailburuari Gernikako epaitegiko egoeraren berri eta EHE abenduaren 20tik Gernikan egiten ari den gose grebaren berri ematea zen. EHE kezkatuta agertu zen Gernikako epaitegiko epaileek eta bertako langileen %83k euskara ez dakitelako. Azkarragak Justitzia euskalduntzeko eskuduntza guztiak ez dituela adierazi zuen. EHEk, Jaurlaritzak dituen eskuduntzen arabera, Justizia euskalduntzeko neurri eraginkorrak hartzeko, euskaltzaleak desobedientzia egiteagatik ez zigortzeko eta Madrilen aurrean jarrera irmoa agertzeko eskatu zion Azkarragari.
Salaketa jarri die demoei Auzitegiak
Urtarrilaren 8an epaituak izan ziren 65 demoen kontra salaketa jarri du Baionako Auzitegiak, Auzitegiak demoek mehatxuak egin izana, epaileak iraindu izana, oldartze bateratuan parte hartu izana eta auzitegiko egoitza hondatu izana argudiatu du salaketa jartzerakoan. Joan den asteko ostegunean lau demo polizia etxera joateko deitu zituzten eta atxilotuak egon ziren hiru orduz. Haiei jakinarazi zietenez, urtarrilaren 8an epaitutako guztiei jarriko diete salaketa.
Ingelesez Nafarroako Parlamentuan
Aralarreko Patxi Telletxea ingelesez aritu zen joan den astean Nafarroako Parlamentuan, Gobernuaren hizkuntz politika salatzeko asmoz. Parlamentuko presidenteak gaztelaniaz edo euskaraz hitz egiteko eskatu zion berehala. Telletxeak bedel lanpostu baterako euskararen ezagutza ez balioestea eta ingelesaren, frantsesaren eta alemanaren ezagutza aintzat hartzea kritikatu zuen modu umoretsuan.