Hegoalde osoan hautes plataforma abertzale bateratua aurkezteko ahaleginean ari den ezker abertzaleak bere egitasmoarekin jarraituko duela iragarri du eta helburua lortzeko egin beharreko ahalegin guztiak egingo dituela jakinarazi. Egin zaizkion kritiken artean, egungo proposamenean ETAren jardueraren arbuiatzea ez azaltzea da esanguratsuena. Nafarroari dagokionez, Aralar, EA eta EAJk eratu duten koalizioaren zerrenda lantzen ari dira jadanik eta ikusi beharko da zer gertatzen den Batzarrerekin eta, batez ere, Batasunarekin. Mundu abertzalean zurrunbilo handia sortu da aipatu bi ekimenekin, eta Nafarroako ekimena aurrera doan moduan, Bergaran aurkeztutako ezker abertzalearen proposamenari irtenbide zaila ikusten zaio sukalde lanetan ETAren jarduera armatuaren etena lortzen ez bada. Erakunde armatua zerbaiten zain egon daiteke, eta alderantziz, alderdi abertzaleak ere hark zer egingo zain. Bitartean, bakoitza berean.

Euskerea nire bizitzan liburua plazaratu du Karmelo Etxenagusia gotzainak Labayru ikastegiarekin. Izenburuak dioen bezala, euskarak haren bizitzan izan duen lekuaz dihardu Etxenagusiak. Argitalpenaren lehen zatian, bere bizitzaz hitz egiten du elkarrizketa formatuan. Bigarrenean, euskara eta euskal literarturaren gaineko idazkiak bildu ditu eta azken atalean erlijioa gaitzat dutenak.

Euskara normalizatzea eta euskalgintza babestea du helburua azaroan Euskararen Gizarte Erakundeen Kontseiluak abiatutako Akordio Sozio-politikoak, euskararen normalizazioa moteldu dela eta euskalgintzak jasandako erasoek eragin duten kezkaz ohartuta. Akordioaren lehen fasean, iazko amaieran, sindikatu eta alderdi politikoei aurkeztu zizkieten akordioaren 40 neurriak (26 euskararen normalizaziorako eta 14 euskalgintza babesteko). Bigarren fasean alderdi eta sindikatu bakoitzak akordio proposamenari buruzko hausnarketa egingo du eta denen artean gutxieneko adostasuna erdiestea da asmoa, otsailaren amaiera alderako. Hirugarren fasean, gutxieneko neurri horiek indarrean jarri nahi ditu Kontseiluak.

Abenduaren 20tik baraualdia egiten ari dira Gernikako kultur etxean, Euskal Herrian Euskarazek deituta. Txandaka, hamar astez, hainbat eragilek Gernika-Lumoko epaitegiko jarduera euskalduntzea aldarrikatuko dute baraualdiaren bitartez. Eskualdean 2.000 pertsona baino gehiagok aitortu dute dagoeneko euren burua epaitegi horrekiko intsumiso eta aurrerantzean zer egin erabakitzeko hausnarketa egingo dute. Otsailaren 28an, baraua utzi eta manifestazioa deitu dute Gernikan. Bestalde, nazio ekitaldia egingo du EHEk larunbat honetan, urtarrilak 10, Tolosako Leidor zineman, arratsaldeko 18:30ean. «Atzo, gaur eta bihar, euskaraz» lelopeko ekitaldiak euskararen alde indarrak metatzea du helburu. Euskararen bilakaerari erreparatu eta aurrera begira zer egin landuko dute.

Euskara aplikazio tekonologiko berrietara zabaldu asmoz, hitzarmena sinatu dute Eusko Jaurlaritzako Kultura Sailak eta Belgikako BVBA enpresak. Enpresa belgikarrak TTS eta ASR softwareak euskarara egokituko ditu, euskarazko ahotsa testu eta testua ahots bihurtzeko.

Nazio Eztabaidaguneak orain arte landutako Euskal Herriaren diagnosi orokorra onartu zuen abenduaren 27an egindako foroaren I. Osoko Bilkuran. Euskal gizarteko sektore desberdinetako eragileak ari dira lanean Nazio Eztabaidagunean. Alderdi eta sindikatuei dagokienez, Batasuna, EA, AB, LAB, EHNE, ESK eta HIRUko ordezkariak aritu dira orain artean. EAJ, Aralar eta ELAko ordezkariek oraingoz bederen ez dute partehartzen eztabaidagunean. Otsailaren 14an bigarren ekarpen foroa egin nahi da eta martxoaren bukaerarako bigarren osoko bilkura.

Ez da datu zehatzik baina genero indarkeria deitzen denak nabarmen egin du gora Nafarroan eta bertako auzitegiek biolentzia mota horrekiko salaketak bideratzen eman dute bere denboraren zati handi bat. ARGIAren 1925. zenbakian, honen aurrekoan, tratu txarrak jasan dituzten emakumeak hartzeko Nafarroako babes etxean lan egiten duen Mertxe Arza Navarro adituak, gai honetan diren klabe ugari eskaintzen ditu, oso modu ezohikoan gainera. Besteak beste, «tratu txarren atzean maitasun istorio bat» dagoela azpimarratzen du eta tratu txarrak gizarte matxistaren ondorioa dela baiesteaz gain, horietako kasu bakoitzean emakume ahul bat dagoela gaineratzen du. Erabat gomendagarria den elkarrizketa da genero indarkeriaren zenbait klabetara modu ezohiko batean hurbiltzeko.

PSE-EEko Idazkari Nagusi Patxi Lopez izango da lehendakarigai datozen EAEko hauteskundeetan, alderdiko beste inor aurkezten ez bada. Odon Elorza Donostiako alkateak aukera serio aztertu duela aitortu du, baina azkenean Jose Luis Rodriguez Zapatero eta Patxi Lopez ez kaltetzeko atzera egin duela. EAEko hauteskunde autonomikoak 2005eko udaberrirako aurreikusita daude, baina PSE-EEren ustez, hauteskundeak 2004ra aurreratuko dira. Ez da txantxetakoa hausnarketa, azken hilabete hauetan guztietan aipatzen den aukera baita, batez ere Ibarretxe planak eta Eusko Legebiltzarra eta Espainiako Auzitegi Nagusiaren artean dagoen auziak hauteskundeen aurreratzea ekar dezaketela pentsatzen baita. Ibarretxe lehendakariaren proposamenari buruzko erreferenduma legez zigortua egoteak, gainera, hauteskundeak herri kontsulta bilakatzea ekar dezake.