Euskaraz idazten duen orori, sortu ohi zaizkio zalantzak testuak moldatzeko orduan, esapide zuzenak aukeratzerakoan edota hitz forma egokiak hautatzeko garaian. Esaterako, zein irizpide jarraitu beharko genuke "urrats eman" eta "urrats egin" esapideen artean egokiena hautatzeko? Hiztegietako adibideei erreparatzea litzateke aukeretako bat. Zoritxarrez, ordea, hiztegi konbentzionalek ez dituzte hitz edo esapideek testuinguru ezberdinetan izan ditzaketen esanahi edo joskera guztien adibideak lantzen.

Eguneroko bizitzan lagunekin, lankideekin, ikaskideekin edota familiako kideekin mintzatzerakoan erabiltzen ditugun esamolde, egitura eta esaerak geure egiten ditugu eta zerbait idaztera goazenean esapide horien zuzentasun maila zalantzan jartzen dugu. Duda-muda horiek guztiak kontsultatu ahal izateko, Ereduzko Prosa Gaur aplikazio informatikoa atondu du Euskal Herriko Unibertsitateko Euskara Zerbitzuak, Ibon Sarasola idazle eta euskaltzainaren gidaritzapean. Aplikazio hori Interneten da erabilgarri www.ehu.es/euskara-orria/euskara/ereduzkoa web gunean.
Donostiako Euskararen Udal Patronatuak babesturiko egitasmo horrek Sarasolaren ustez eredugarri diren 87 prosa liburu biltzen ditu. Euskaltzainak aukeraketa hori burutzeko aholkulari talde baten laguntza izan du. Juan Garzia, Josu Zabaleta eta Koro Navarro izan dira, besteak beste, talde horretako kide. "Sen subjektiboaren arabera egin dut hautaketa, hau da, nire ustez ondo idazten duten idazleen liburuak bildu ditut. Horrek ez du esan nahi corpusean sartu ez diren liburuak eredugarriak ez direnik. Joskeraren, esaldiaren orekaren, izenen, esapideen eta egituren aldetik ondo idazten duten idazleak aukeratu ditut", adierazi digu Sarasolak. Web gunean txertaturiko liburuak 1998-2002 artean argitaratuak dira, guztira lau milioi hitz baino gehiagoz osatuak.


Ereduzko Prosa Gaur ez da hiztegi bat, ezta gramatika lan bat ere, kontsultak egiteko datu base bat baizik. Esaterako, "ez da samurra" esapidea egun erabiltzen ote den eta nork erabiltzen duen jakin nahi badugu, bertan kontsultatzen ahal dugu. Sarasolaren aburuz, ez da tresna dogmatiko bat. "Erabiltzaileak bere senarekin jokatu behar du 'hau bai, hau ez' esateko". Bilaketaren emaitzak ez du esan nahi joskera edo egitura zuzenena hori denik. Arakatzaileak soilik testu-hitz hori zein idazlek nola erabiltzen duen jakinarazten du.

Euskaraz idaztean zalantzak dituen orori eta ikertzaileei zuzendua dago ereduzko prosaren corpusa. Alde batetik, helburu praktikoa du, hala nola, idazle ereduzkoek eskaintzen dizkieten irtenbideen berri ematea. Bestetik, ikerketa du helburu, hots, euskararen zer-nolakoak aztertu nahi dituenari lanabesa eskaintzea. Sarasolaren iritziz, "euskal hizkuntzaren inguruan ikerketak egiteko dokumentazio eta informazio ugari biltzen du ereduzko corpusak».


80ko hamarkadan Orotariko Euskal Hiztegia egiteko, euskal tradizio osoko corpus zabala eratu zuen Euskaltzaindiak. Horren harian, jarraipena egitea otu zitzaion Ibon Sarasolari eta lan horren ondorio garbia da amaraunean jarri berri duen datu basea. Halaber, egun euskararen normalizazioak dituen premiei erantzuteko beharrezkoa iruditu zitzaion idazle eredugarrien idazlanen bilketa egitea.

Sarasolak liburuak hautatu ostean, Rosetta testu zerbitzuak aplikazio informatikoan integratzeko zentzua duten esaldiak eta testuak zatikatu ditu. Euskarri teknologikoa, berriz, proiektu, antolakuntza eta zerbitzu informatikoak eskaintzen dituen Adur Software Productions (ASP) enpresak landu du. Informazioren eta ezagutzaren kudeaketarako sorturiko Kapsula izeneko sistemaren bitartez, testu-hitz bakoitzari dagokion lema egokitu dio ASPk. Horrez gain, bilaketak egiteko motorra ere garatu du. Bertako arduradunek adierazi digutenez, lematizatzea izan da prozesurik zailena; izan ere, euskarak beste hizkuntzekin alderatuz, zailtasun gehiago baititu. Deklinabide, forma eta egitura ugari eta konplexuak euskara batuko lematizatzailearekin lantzea eginkizun korapilatsua dela azaldu digu Joxerra Aizpurua ASPko kideak. Hori dela-eta, euren etorkizuneko erronka nagusietako bat bilaketak egiterakoan hitzen zentzua ulertuko duen sistema arrakastatsua garatzea dela esan digu.


Ibon Sarasolak jakinarazi digunez, mementoz harrera ona izan du web guneak. Euskaltzainaren aburuz, "oso erabilerraza eta praktikoa da, edonorentzako modukoa". Edonoren esku daude orain ereduzko euskara esapideak.