Kmk'03 Lzko. Honela adieraziko genuke telefono mugikorren mezu laburren bitartez Kilometroak 2003 Lazkaon egingo dela eta horixe da, hain zuzen ere, ikastolen festak logoa eta leloa sortzeko erabilitako grafia. Euskarak teknologia berrietan duen gabeziari erantzutea eta gaurkotasun kutsua ematea izan dira horretarako erabilitako irizpideak. Aurtengo festa herriko San Benito ikastola laguntzeko izango da. Berrogei urte betetzear, Lazkaokoa da Goierrin sortutako lehenengo ikastola. Urriaren 5ean egingo den festa honekin, helburu aunitz bateratu nahi ditu ikastolak, besteak beste, ikastolaren mugimendua eta bere proiektuak ezagutaraztea, euskara sustatu eta normalizazioan aurrerapausoak ematea, euskal kulturaren transmisioan laguntzea eta erdal hiztunak euskarara hurbiltzea. Ikastolari begira, beharrizan berriei erantzuna eman nahi zaie; besteak beste, azpiegitura egokitu eta berritu eta eskaintza zabaldu nahi da. Eraikuntza berri bat egiteko asmoa ere agertu du ikastolak.

Adin eta gustu guztiei zuzenduriko egitarau zabala eskainiko du aurtengo festak, hala nola, musika kontzertuak, antzerki emanaldiak, haurrei eskainiriko gunea eta jan eta edateko txokoak izango dira. Berrikuntza gisa, Goierriko ekonomiaren motorea erakusteko "Enpresen Parkea" antolatu da. Herriko plaza nagusian ikastolak duen eraikuntzako patioan kokatuko da parkea. Tokiko alor sozial, kultural eta ekonomikoak ezagutaraztea izango du helburu gune honek. Hala, herriko eta eskualdeko enpresa eta instituzioek euren produktu eta zerbitzuak erakusgai ipiniko dituzte.

Ekitaldi horiek giroturik ikastolan inplikazio handia izan duten lau lagun omenduko dira. Ikastolaren sorkuntzan funtsezkoak izan ziren hauek: Aitor Murua Mendiaraz (gurasoa), Jaxinto Fernandez Setien (abadea), Mari Ixabel Aldasoro eta Mari Karmen Eizagirre (irakasleak).


"Euskrz 2zi ny dt" (Euskaraz bizi nahi dut) lemapean, teknologia berriak euskaraz erabili daitezkeela aldarrikatu nahi du ikastolen festak. Unai Iturriagaren lelo hori ardatz harturik Kilometroak 2003ko abestia egin dute Alaitz eta Maiderrek. Ikastolak Lazkaorekin zerikusia zuten musikari eta musika talde guztiei kantua egiteko proposamena luzatu zien. Azkenik, epaimahaiak segapotoak hizpide dituen Alaitz eta Maiderren kantua aukeratu zuen. Abesti ofizialarekin eta lehiaketara aurkezturiko abesti guztiekin CDa argitaratu dute.


Teknologia berrien erronkari jarraituz, Interneten ere egin diote txokoa Gipuzkoako ikastolen festari: www.kilometroak.org. Web gune honek ikastolari buruzko informazioa eta atzera begirakoa, alkatearen agurra, Kilometroak-en historia eta babesleen aipamena biltzen ditu, besteak beste. Urriaren 5ean gune bakoitzean izango diren ekitaldien berri ere ematen da bertan. Era berean aipatzen dira urtean zehar antolaturiko ekimenak, egunean bertan egingo den auto zozketaren inguruko informazioa eta arropa salmentari eskainiriko atala. Abestia irakurtzeko aukera ere eskaintzen du web guneak.


Aurtengo Kilometroak-en leloa deigarria da: "Euskrz 2zi ny dt", (Euskaraz bizi nahi dut). Lelo hau euskara teknologia berrietan gehiago erabiltzeko deia da. Hain zuzen, horregatik, San Benito ikastolako Ikasleen Euskara Batzordeak pentsatu zuen interesgarria izan zitekeela liburuxka bat kaleratzea sakelako telefonoetako hizkera lantzeko. Asisko Urmenetak ARGIArekin argitaratutako «Mantxut» ezagutzen zuten, baita gaiaren inguruan Antton Olariagak «Berria»n argitaratutako Zakilixuten tirak. Bestalde, Kike Amonarrizek gazte hizkerari buruzko hitzaldia eman zuen San Benito ikastolan. Besteren artean, hiru hauek osatzen duten Zazpiak Batman taldeari eskaera egin ziotenean, beraz, berehalakoan jaso zuten baiezkoa eta horrela, «Segapotoen mezu sekretuak» liburuxka argitaratu dute.