Aurtengo ikastolen jaiak lekeitiarren kutsua du: dzanga egitera gonbidatu gaituzte R. M. Azkue ikastolakoek. Horrela baitio aurtengo ibilaldiaren leloak. Dzanga geurera "hitz joko musikala" da, azaldu dute antolatzaileek. Altuera jakin batetik uretara buruz behera salto egiteari dzanga esaten zaio Lekeitio eta Ondarroan. Lelo horren bitartez, herriko ateak zabaldu nahi izan dizkigute, maiatzaren 18an eurekin batera Bizkaiko ikastolen festan parte har dezagun.

Kostaldean ohikoa den balearen irudiak osatzen du 2003ko Ibilaldiaren logoa. Izan ere, Lekeitio nahiz Ondarroako armarrietan agertzen den ikurra da. Oraingoan, berriz, beste esanahi bat hartu du baleak. Logoaren diseinatzaileek euskara eta euskal kulturarekin parekatu nahi izan dute. Horren ildotik, "balea zaindu ezean, desagertzeko arriskuan dago, gure hizkuntza eta kultura legez", adierazi dute. Era berean, balea "animalia sendo eta handia da, taldean doana, gure ikastolen mugimenduaren antzera". Herri arrantzaleen ikurrak, beraz, ezin hobeto islatu du Ibilaldiaren muina.

Lekeitioko ikastolako ikasle, irakasle, guraso eta lagunekin batera, ikasle ohiek ere parte hartu nahi izan dute Ibilaldiak eskatzen duen lan eskergan. Ikastolan ikasitako Peru Aranburu bertsolari gazteak idatzi du 2003ko Ibilaldiaren kanta. Ondoren, Txapelpunk talde lekeitiarrak musikatu eta kantaria bideoklipean azaldu da. Herriko portuan eta atalaian filmatu du Koldo Lenizek, Goenkale telebista saioko errealizadore eta ikastolako ikasle ohiak. Aipaturiko bideoklipean, Iñigitok bale bat ikusi eta portura abiatzen da, hura harrapatzeko asmoz. Damutu egiten da, baina, eta balea hil ordez, ikastolarantz jotzea nahiago du, han jaia dago-eta. Balea libre geratzen da, azken finean, haren omenez ospatzen baitugu ikastolaren jaia.

R.M. Azkue ikastolaren proiektuan parte hartu dutenen artean banatzeko aldizkari monografikoa prestatu dute han ikasitako bi kazetarik: Leire Akarregik eta Esther Murelagak. Herrian, beste herrietako udaletxeetan eta gainontzeko erakundeetan ere banatuko dute aldizkaria. Azpimarratzekoa da edizio lan osoa R.M. Azkue ikastolari lotutako pertsonek egin dutela. Adibidez, guraso asko eta ikasle izandakoen gurasoak ere aldizkariaren publizitateaz arduratu dira. Antolatzaileek azaldu bezala, "ikastolaren komunitatea inplikatu da Ibilaldiaren proiektuan": kanta, bideoklipa, aldizkaria eta jaiak berak eskatzen duen antolamendua.

Maiatzaren 6tik 18ra bitartean Euskal Herriko ehun bat artistaren lanak ikusi ahal izango dira Ibilarte izeneko arte erakusketan. Igandeko jaiaz gain, Ibilaldiak urte osoko kultura mugimendua ere bultzatzen baitu