Berrogei urteko emakume batek ume bat izan du. Horrela irakurrita ez da hain harritzekoa, gaur egun 40 urteko emakume askok izaten baitituzte haurrak. Baina emakume horrek lehendik bihotza transplantatua zuela jakiteak eransten dio berezitasuna albisteari. Bai, horixe!

Kordoban gertatu da, eta aurrenekoa izan da Espainian, noski. Erditzea hiri andaluz horretako Reina Sofia ospitalean gertatu zen, eta medikuek amaren izena isilean gorde badute ere, familiak horrela eskatuta, jakin ahal izan da haurdunaldia normaltasun osoz joan zela, kasuak ematen dizkion berezitasun guztiekin, hori bai, eta haurdunaldiak bederatzi hilabete iraun zuela.
Umea neskato bat izan zen, eta jaio zenean 3,400 kilogramo pisatu zituen. Haurtxoa, erabat osasuntsu, zesarea bidez etorri zen mundura. Ospitale horretako kardiologiako zerbitzuburua den Jose Maria Arizón medikuak jaiotze hori aprobetxatu zuen organo emateak ekartzen dituen mesedeak goraipatzeko: "ez bakarrik hartzailearentzat; izan ere, kasu honetan emailearen bihotz zabaltasunak, bi bizitza salbatzeko modua eman baitzuen".
Kasu honek badu beste gauzatxo bat aipatzeko modukoa. Hau izan da mundu osoan lehenengo erditzea, ama everolimus izeneko botikarekin tratatua izan ondoren gertatzen dena. Everolimus botika hori nahiko esperimentala da oraindik, eta Espainian Madrileko Puerta de Hierro klinikan, A Coruñako Juan Canalejo ospitalean eta Kordobako aipatu Reina Sofia ospitalean bakarrik erabiltzen dute, esperimentazio fasean, transplanteen ondotik gorputzak substantzia arrotz baten aurrean eman dezakeen erantzuna gutxitzeko. Eta teorikoki fetuan akatsak eragin zitzakeela uste zen. Zorionez ez da horrela izan