Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
astelehena 2024ko apirilaren 29an
HERIOTZAKO ETA ERRETIROKO ASEGURUEK DUTE ESKAERA GEHIEN
Hego Euskal Herriko biztanleak gehiago kezkatzen ditu heriotzak etorkizuneko bizimodu erosoago batek baino. Datuek erakusten dutenez, %24k dauka heriotzako asegurua, %13,4k erretiroko planen bat eta %6,5ek bakarrik aurrezki asegurua. Hegoaldeko bizilagunetan, seme-alabak dituztenek daukate bizi aseguruen bidez aurrezteko joera handiena. Erretiroko aurrezkiei dagokienez, klase ertaineko jendea 25 bat urtez aritzen da, gehien jota, horrelako inbertsioak ordaintzen. Ondorio horiek ageri dira, antzina ez dela Intergallup España enpresak Agrupación de Vida y Pensiones de Union Española de Entidades Aseguradoras y Reaseguradoras (Unespa) taldearentzat egin duen ikerketa batean.
Inkestek eta azterlanek duten balioa dute. Tendentziak seinalatzen dituzte jeneralean, eta ezin zaie balio absoluturik eman. Hala eta guztiz, datuak emendatzen dituzte, zenbaitetan harrigarriak gainera, ikertutako herri edo sektoreari buruz. Arrazoitze hori guztia Unespak duela gutxi eginiko azterlan baten harira dator: lan hori Espainiako Estatuko biztanleen aurrezteko joerei buruzkoa da, eta guk oinarri gisa hartu dugu erreportaje hau lantzeko. Aipatu azterketa gauzatzeko, zenbait autonomia erkidegotan ere egin dituzte galderak, eta, horrenbestez, EAEko eta Nafarroako biztanleen aurrezteko ohituren gaineko argibide batzuk ere badira testuan. Bistan denez, guretzat aski mugatua da azterlana, ez baitakar Euskal Herri osoko biztanleei buruzko daturik. Horrez gainera, bereizirik daude EAEko eta Nafarroako datuak; dena den, aski antzekoak dira.
HERIOTZAKOAK ETA ERRETIROKOAK.
AURREZKI PRIBATUAREN KONTZIENTZIA GUTXI.
Azterlanaren arabera, badirudi, nahiz eta Hegoaldeko biztanleak aurrezki pribatuaren garrantziaz eta aukerez kontzientzia hartzen aritu, oraindik ere oso gutxi jabetzen direla benetan. Dena dela, Espainiako biztanle gehienak ere epe luzeko aurrezkietan dauden hainbat eratako formulen hartzaile bihurtuko dira denbora gutxian; zehazkiago esanda, bizi aseguruen hartzaile, aukera-aukerako aurrezki osagarriak izateko diseinatuak baitaude.
EAEn, heriotzako asegurua da bizi aseguruetan hartzaile gehien duena, betiere Unesparen arabera. "Arriskukoa" izendatzen dute teknikoki, eta aseguratuaren heriotzagatik, baliaezintasunagatik eta abarrengatik indemnizazioa eskakizun duten aseguruak biltzen ditu. Eremu horretako hamar biztanletatik bik baino gehiagok (%22,7k) aitortzen du aurreikuspeneko formula hori erabiltzen duela. Nafarroan, berriz, are handiagoa da ehunekoa: nafarren %25ek dauka horrelako polizaren bat. Hurrena, erretiroko bizi aseguruek dute eskari handiena, hau da, arruntean "erretiroko planak" deritzenak: aurrezpen sistematikoko produktuak dira, jeneralean epe luzeko bermea dutenak eta, prestazioari dagokionez, lanetik gelditutakoan jasotzekoak. Kasu honetan, antzeko ehunekoa ageri da EAEn eta Nafarroan: Hego Euskal Herri osoan, %13,4k adierazi du horrelako asegururen bat kontratatua duela.
Besstalde, badirudi Hegoaldeko biztanleek bestelako bizi aseguruetan ere dezente kontratatzen dutela. EAEn, adibidez, biztanleen %7,6k omen dauka erretirokoa ez den aurrezki asegururen bat, baina aurrezpen sistematikokoa eta garantizatukoa dena. Nafarroan, ordea, %5,8ra jaisten da ehuneko hori. Beste bizi aseguru batzuetan, bezeroak hartzen du bere gain inbertsioaren arriskua. Bada, EAEn, biztanleen %5ak omen dauka mota horretako polizaren bat; Nafarroan, aldiz, %2,3k soilik.
31 URTETIK AURRERA.
Aipatu azterlanean azaltzen denez, 31 eta 40 urte bitartean sortzen da aseguratzeko kezka handiena. Alde horretatik, hala Hego Euskal Herriko biztanleak, nola Espainiako Estatukoak, Europako beste zenbait herritakoak baino adinez zaharxeago direla hasten dira aurrezten. Europako herri horietan askoz hedatuago omen dago etorkizuneko diru baliabideak bermatzeko kultura, eta, ondorioz, handia omen da bizi aseguruetako inbertsioa.
30 eta 40 urte bitartean, bizi aseguruen artean, heriotzakoa omen da kontratatuena. Erretirokoetan baino poliza gehiago egiten da heriotzakoetan. Bi dira, nonbait, horretarako arrazoiak: batetik, pertsona askok adin horretan urruti ikusten dute erretiroa; bestetik, guraso izateko, etxebizitza propioa erosteko... sasoia da hamarkada hori, eta faktore horiek pisuzkoak dira heriotzako edo baliaezintasunezko arriskuei aurre egiteko aseguruak aukeratzeko.
Erretiroari dagokionez, hurrengo hamarkadan azaltzen da kezka; 41 urtetik aurrera-edo. Horrek esan nahi du Hego Euskal Herriko biztanleen batez bestekoak, gehien jota, 25 urteko epea hartzen duela erretirorako aurrezteko (teorikoki 65 urterekin erretiratzen da jendea; hortaz, 41ekin aurrezten hasiz gero, 25 urte dira).
Azterketaren ondorioetan ageri denez, ezkondua izateak ere badu nolabaiteko zerikusia aseguruak kontratatzeko garaian, eta ez da harritzekoa. Aurrezki aseguruak epe luzeko errentagarritasuna bermatzen duenez, formula hori denboran ziurtatutako aurrezmodua da horrelako produktuak dituztenentzat. Familiaren erantzukizuna duten biztanleak, seme-alabak dituztenak batik bat, gerora zer gastu eta baliabide izango dituzten pentsatuz bizi dira sarritan. Ondorioz, aurrezteko formula aseguratuak lehenesten dituzte, arriskuak gutxitzeko.
Bestalde, eta burtsako testuinguruaren eraginez neurri batean, bizi aseguruak epe luzera aurrezteko benetako alternatiba dira, batez ere arriskuaren beldur direnentzat, denbora luzean eroso aurrezteko bidea ematen baitute. Hau da, nork bere diru baliabideen arabera inbertitzen du, eta, nahi izatera, beste arrisku batzuen kontrako aseguruekin konbinatuz gainera (baliaezintasuna, alarguntza...). Dena dela, epe luzea da bizi aseguruaren "berezko lurra"; balio erantsia, berriz, hainbat urtetan edo hamarkadetan interesak izateko garantia
Zenbat eta diru sarrera handiagoa, orduan eta aurrezteko nahiz prebenitzeko plan gehiago
Hego Euskal Herriko biztanleetan, tarteko diru sarrerak dituztenak arduratzen dira gehien erretiroa babesteaz. Horrela dio bederen Unesparen azterlanak. Antza denez, zenbat diru duen batek libratzeko moduan, hainbateko ardura hartzen du prebenitzeko eta aurrezteko. Hau da, zenbat eta diru sarrera handiagoa izan, orduan eta ohartuago babesten du bere burua geroan izan ditzakeen diru estuasunetatik. Alde horretatik, erretiratu eta gero, biztanleek manten dezakete aurreko diru sarrera, baldin aurrez epe luzean pixkanakako diru ezartzea egiten badute. Horretarako, eskaintza handia dute bizi aseguruetako aurrezmoduen eta babesen arloan (erretiroko asegurua, heriotzakoa, "unit linked»-a eta aurrezki asegurua).
Aipatu azterlan horretan, Espainiako Estatuko aseguru eskatzaileek zer profil duten ere ageri da: 40 eta 50 urte bitarteko lagunak dira, gizonak nahiz emakumeak, erantzukizun familiarrak dituztenak eta hiritarrak gehienbat. Bizi aseguruei dagokienez, horixe omen da gaur egungo bezeroaren argazki robota, eta, jakina, horrelako produktuen (heriotzako eta erretiroko aseguruak edo epekako aurrezkia) jabetza ohikoagoa den kategoria sozialen ispilu da.
"Unit Linked" produktuen jabetzaren kasuan, hau da, inbertsioaren arriskua bezeroaren gain geratzen den aseguruen kasuan, gizonak dira hartzaile handienak, 40 eta 50 urte bitartekoak eta hileko 1.500 eurotik gora jasotzen dutenak. Erretiroko bizi aseguruei dagokienez (erretiroko planak, alegia), batez beste seme-alaba pare bat dituzten 40 eta 50 urte bitarteko gizon-emakumeak omen dira bezero ohikoenak. Aurrezteko joeretan, berriz, honako ezaugarri hauek ageri dira: tarteko diru sarrera dutenak dira hartzaile handienak, eta aski sarrera apalekoak ere (720 euro) saiatzen dira horretan.
Heriotzagatiko babesa ematen duten bizi aseguruetan, 30 eta 40 urte bitarteko gizon-emakumeak dira ohiko bezero: ezkonduak dira oro har, seme-alabaren baten edo pare baten guraso eta hileko 1.200 eurotik gora jasotzen dute. Datu hori ikusita, ematen du zerikusi handia dutela ezkontzak, guraso izateak, hipotekak, kredituak eta antzeko gertaerek era horretako babesa erabakitzeko garaian. Aurrezki aseguruen kasuan, berriz, 30 eta 50 urte bitarteko gizon-emakumeak, hilean 1.500 eurotik gora irabazten dutenak, ageri dira gailurrean.
Europan, 1.249 euro inbertitzen dira batez beste urtean bizi aseguruetan. Frantzian esaterako 1.506 euro inbertitzen dira, Espainian 599, EAEn 499 eta Nafarroan367.
Irakurrienak
Matomo erabiliz
#1
#2
Askatasunaren Ontzidiko euskal aktibistak
#3
June Fernández
|
Pikara Magazine
#4
Miel Anjel Elustondo
#5
Kanaldude
Azkenak
Olaia Beroiz: "Emakume errepresaliatuen kemena gogoratzea ezinbestekoa da"
Iruñeko Txantrea auzoko kale-izendegian frankismoan errepresaliatuak izan ziren hamar emakume gogoratuko dituzte. Ekitaldia egin zuten atzo eta auzoaren hegoaldean dagoen plaza bat oroimen gune ere izendatu zuten. "Garrantzitsua da historian gertatutakoa gogoratzea;... [+]
Eguneraketa berriak daude