Alderdi Popularrak aurrera atera duen Espainiako Kode Penalaren erreformarekin, etakideek edota euskal auziarekin zerikusirik dutelako Espainiako epaitegiek zigortuko dituzten herritarrek 40 urtera arteko kartzela zigorra jasoko dute. Erreformak, teorian, beste erabateko delituak ere ukitzen ditu, baina errealitatean etakideei zuzendua dago. PP eta PSE-EEk ezik, euskal gizarteko gainerako alderdi politiko gehienak neurriaren aurka agertu dira, nagusiki erreforma zigor gisa planteatzen delako, bergizarteratzearen aurkakoa delako eta ezer konpontzera baino, egoeraren korapilatzea ekarriko duelako. Bistan da orain arteko neurri errepresiboek ez dutela arazoa konpondu.

EZ da zalantzarik 2003ko aurreikuspen politikoetan Juan Jose Ibarretxe lehendakariak bultzatutako proposamena eta maiatzeko udal eta foru hauteskundeak izango direla puntu garrantzitsuenetakoak. Eta lotuta daude biak, hauteskundeetan gertatzen denak modu gogorrean baldintzatuko duelako proposamenaren bilakaera. Ez hori bakarrik, jakina, proposamenaren une gorena erreferenduma da eta jadanik Xabier Arzalluzek esan du ETAren jarduera armatuak jarraitzen badu, erreferenduma atzeratu beharko dela, Ibarretxek erreferenduma bake giroan egin nahi duelako.

HASTEAR da Batasuna ilegalizatu ala ez erabakiko duen epaiketa eta oraingoz behintzat Batasuna legez kanpo geratzeko aukera da gehien nabarmentzen dena. Azken urteetan izan dira ezuztekoak Espainiako epaitegietan eta ezin da ezer baztertu, baina euskal klase politikoan eta iritzi publikoan oso sustraitua dago Alderdien Legea Batasuna legez kanpo uzteko egin zela eta, beraz, epaiketatik ere hori ondorioztatuko dela. Ikusi beharko da zein abiadurarekin bilakatzen den epaiketa, baina apirilerako-edo epaiketa kalean izan daitekeela aurreikusten da.

NAFARROAN euskaraz ikasten duten ikasleek puntuaketa hobeagoa lortzen dute beren ikasketetan, hori da Victoria Lumbreras iruindarrak egin duen tesi doktoralean ateratzen den ondorioetako bat. Euskaraz ikasi daitekeen hezkuntza maila guztietan ematen den fenomenoa da, eta Lumbrerasen iritziz hezkuntz arrazoiez gain «seguruenik pentsatu beharko litzateke, halaber, familia eta soziologia arrazoietan». Lumbrerasek Deustuko Unibertsitatean lortu zuen Psikologia Lizentziatura eta bertan egin zuen Hezkuntza berezituaren masterra. NUPeko bi irakasle izan ditu lanaren zuzendaritzan eta EHUko Alfredo Goñi katedraduna buru zuen epaimahaiak onartu dio lana cum laudem kalifikazioarekin.

NABARRALDE elkarteak eta Pamiela argitaletxeak «Navarra. Estado Político de Vasconia» liburua plazaratu dute. Bertan, Anacleto Ortueta bilbotarrak XX. mendeko 30eko hamarkadan idatzitakoen lana biltzen da. Ortueta 1877an jaio zen Bilbon, EAJko kidea izan zen, Euzkadiko gerentea eta geroago ANVko sortzaileetakoa. Ortueta Arturo Kanpionen jarraitzailea izan zen eta Nafarroako Erresumak Euskal Herriaren gauzatze politiko-instituzionalean izan beharreko garrantzia azpimarratu zuen, eta horregatik zabaldu nahi dituzte bere ideiak liburua argitara eman dutenek. Tomas Urzainki historialariak aurkezpenean esan zuenez, «Ortuetarentzat Nafarroa da euskaldunen Estatua eta egungo probintziak konkistatzaileek eragindako zatiketaren fruitu dira».

EGON daitezkeen erantzukizun penalak argitu nahian, Landetako hondartzetara heldutako Prestigeren lehen fuel-olio orbanen laginak epaileen eskuetan jarri dira. Erantzukizun penaletan oso urruti ezingo dela joan pentsatzen da, baina erantzukizun zibiletan agian izan liteke kalte ordainik eta kaltetutako desberdinak prestatzen ari dira.