Azken urteotan gure hizkuntzak bilakaera handia izan du, bere inguruan egin ikerlanei esker, eta badira zenbait talde, erakunde eta enpresa arau-gogoeta berriak bildu eta euskara hobetzeko ikastaroetan eskaintzen dituztenak. Birziklatze ikastaro hauetan egunero euskara jatorra erabiltzeko beharra edo nahia dutenak matrikulatzen dira.

Itzulidatz enpresak, esate baterako, orain 12 urte euskaraz zuzen idazteko eta itzultzeko ikastaroak eskaintzeari ekin zion. Ildo horretan, urte dezente daramatza Idazkuntza eta Itzulpengintza ikastaroa eskaintzen, baina datorren urtean UEUrekin elkarlanean antolatzeko eta titulu ofiziala eskaintzeko asmoa agertu dute. Horrez gain, Itzulidatz Eusko Jaurlaritzarekin ere elkarlanean ari da, Irale eta Garatu programen bidez, urte luzetan euskararen arauak bereganatu ez dituzten irakasleei idazkera jatorra irakasten baitie. Udalekin ere zenbait ikastaro sinatu izan ditu Donostiako enpresak: deialdi zabalekoak eta tokian tokiko euskaltegietako irakasleak trebatzeko direnak. Halaber, hedabideetan eta unibertsitatean klaseak eman ohi dituzte, kazetari eta ikasleen beharretara egokituz.
Prezioari dagokionez, alde handiak izaten dira ikastaro batetik bestera, baina antolatzaileek diru laguntzak jasoz gero, irakasleari merkeago aterako zaio, noski.
Bestalde, irakasle, kazetari eta euskara lan tresna erabiltzen dugun zenbaitzuk gure hizkuntza hobeto erabiltzeko beharrean gara. Izan ere, Itzulidatzeko kide eta irakasle Julia Marinek dioenez, "ikastaroak martxan jarri genituenean, klaseetan euskaltegietako irakasleei eta Kazetaritza edo Filologia fakultateetatik etortzen zitzaizkigun ikasleei zuzenean idazteko eta itzultzeko eskatzen genien. Gabezia handiak zituztela ohartu ginen". Izan ere, ikasleek testu ulergarriak idazteko zailtasun handiak dituzte eta ez dituzte puntuazio zeinuak behar diren tokian jartzen. Ikastaro hauetan, gainera, ahoskera edo prosodia ere lantzen dute, eta irakurtzerakoan erabili beharreko musika naturala irakasten zaie.
Itzulidatzeko kideek, euskaldunen gramatika akats ohikoenak bildu eta sistematizatu ondoren, "Hizkuntz kalitatearen oinarriak" izeneko lana diseinatu dute. Behin lan horren mamia menderatuta, ikaslea idazkuntzari heltzeko prest dago, baita itzulpengintzaren teknika nagusienak bereganatzeko ere.


Helduen Alfabetatze eta Berreuskalduntzerako Erakundeak ere bere sorreratik euskara ikastaroak eskaintzen ditu urteroko prestakuntza-ekitaldien baitan. Ikastaro hauek, batez ere, euskaltegietako irakasleei zuzendurik daude, klasean euskara zuzenean idatz eta hitz egin dezaten.
Halaber, talde bereziei zuzendutako ikastaroak direnez, talde bakoitzaren beharretara egokitzen ditu egitasmoak HABEk. Erakunde honetako teknikariak tokian tokiko euskaltegietara joaten dira, bertako irakasleei klaseak emate aldera. Ikastarook urritik maiatzera bitartean eskaintzen dira.
EHUrekin lankidetzan, esaterako, 1992tik 1997ra bitartean "Bigarren Hizkuntzen Irakaskuntzarako Irakasleen Formazioa: Euskara" izeneko ikastaroa paratu zuen, graduondoko Memoria prestatzen ari zirenei zuzendua, hain justu ere. Memoriako gaia jorratzeaz gain, unibertsitateko irakasleek beren idazmena garatzeko eta euskara teknikoa hobetzeko aukera izan zuten. Aurtengo udan, gainera, Juan Garzia Garmendiaren ardurapean "Itzulpengintza-Oinarrizko trebetasunak lantzen" ikastaroa egin dute, Gipuzkoako Udal Euskaltegiekin batera.
Ikasturte berriari dagokionez, HABEk euskaltegietako irakasleendako "Txukuntzen" mintegia aurreikusi du. Ikasturte berrian euskara hobetzeko ikastaroak on-line egiteko aukera ere izango da. Hiru ikastaro antolatu ditu: "Testuaren dimentsio didaktikoa", "Testuak ikasgelan ustiatzeko bideak" eta "Testuak eta kurrikulua". Honen inguruko informazio gehiago www.habe.org web gunean aurki daiteke.
Bestalde, euskara hobetzeko klaseetan frogatu denez, euskaltegietako irakasleek testu nahasiak idazteko joera dute. Gainera, eten gutxi jartzen dituzte, eta horrek testuen ulermena zailtzen du. Dena den, HABEko prestakuntza arduradun Joanba Bergarak dioenez, "ikastaroek harrera ona dute, eta euskaltegietako irakasleak oso ikasle onak dira, esker onekoak. 2001/2002 ikasturteko frogen emaitzak ikustea baino ez dago".


AEKri dagokionez, urtero ikastetxeetako irakasleei zuzendutako ikastaroak eskaintzen ditu, eta euskaltegietan bertan deialdi irekikoak. Bizkaiera jator batean mintzatzeko klaseak ere izaten dira AEKn. Izan ere, euskara hobetzeko ikastarootan, batez ere, ahoskera eta irakurketa lantzen dira, betiere zuzentasun gramatikala aintzat hartuz. Iraupen oso ezberdineko ikastaroak daude, klaseetan jorratu beharreko gai guztiek ez baitute denbora kopuru bera eskatzen. Izan ere, badira 10 orduko ikastaroak, eta baita 100 ingurukoak ere. Oro har, talde txikiak osatzen dituzte ahoskera eta irakurketa lantzeko komenigarriak baitira