Txingudiko badian, Plaiaundiko parke ekologikoan

  • Txingudiko badiaren ataltxo bat da Plaiaundiko parke ekologikoa. Parke hau, tren geltoki, Hondarribiko aireportu eta Donostiatik Hendaiara doan errepidearen artean dago. Hori guztia gutxi balitz, erdi-erdian rugby zelai ederra dauka, atletismoko pista eta guzti. Tramankulu eta eraikuntza horien alboan, balio ekologiko izugarria duen hezegunea, Bidasoaren ur geza eta itsasoko ur gazia elkartzen direneko puntua, ingurune baldintza paregabeak, beraz eta leku gutxitan aurki daitekeen aberastasun biologikoa. Gainera, hegazti migratzaileentzat kasu, Europako pasabiderik garrantzitsuenetakoa da.
Txingudiko badiaren zonalde horretan zegoen bizitza mugimenduaz oharturik, 1998an, Plaiaundiko paduraren berreskurapen lanak hasi ziren. Ordura arte, Plaiaundin, eraikuntza hondakinen zabortegia, txabola mordoa, baratze txikiak eta kirol instalazioak zeuden. Baina, urte horretako udaberrian, antzinako padura berreskuratu nahian, putzuak handitu zituzten eta inguruak lurrez babestu, hegaztientzako aproposa den gunea sortuz.

Beraz, N-1 errepide nagusia hartuko dugu, Donostiatik Hendaiako norabidean. Irunera iritsitakoan, errepide nagusia utzi eta eskuinetara hartuko dugu Plaiaundiko Parke Ekologikoa jartzen duen seinalearen parean. N-1aren azpitik pasako gara berriz ere eskuinetara hartuaz. Berehala, ezkerretara parkeko parkinga topatuko dugu aurrez aurre. Parkingean autoa utziko dugu eta interpretazio zentzorantz abiatuko gara. Bertan, parkeko bizidunei buruzko informazioa dago. Astero egiten duten erroldan, behatutako espezieak arbel handi batean apuntatzen dituzte jakinaren gainean egon gaitezen zein hegazti topa ditzakegun une horretan. Nahi izanez gero parkeari buruzko bideoa ere ikus daiteke eta teleskopioa ere eskuragarri dago begiradatxo bat botetzeko... eta hainbat eskaintza gehiago. Aurrez abisatuz gero bisita gidatuak ere badaude (943-61-93-89).
Guk, halere, ibilbidearen mapa eskatu eta bideari ekingo diogu. Ibilbide guztian zehar, habitat desberdinak daude. San Lorentzo eta Txoritegi aintzirak marea artekoak dira, hau da, mareen eragina jasaten dute eta ura uhateen bidez erregulatzen da. Aldiz, Itzaberriko urak, ez du inongo uhaterik, itsasoko ura da. Interpretazio zentroaren bi albotara, ur gezako bi laku daude, euri urez beterikoak, ez direnak inoiz guztiz idortzen. Beste bi gune ere badaude. Bata Jaizubia ibaiaren ibai ertza eta bestea aireportu alboko aintzira. Lehorrean berriz, zelaiak eta zuhaitz eta zuhaixka ezberdinez osatutako guneak. Interpretazio zentrotik eskuinetara hartuko dugu ur gezako bi aintziren artetik. Nahiz hegaztiak mementoro alde batetik bestera mugitzen diren, hor dabiltzan basahateak eta kopetazuriak ikusteko leku paregabeak dira bi aintzira hauek. Aurrera jarraituaz, ezkerretara hartuko dugu errugby zelaia inguratuaz. Eskuinetara Itzabarriko hondartza dugu. Oraingoan, prismatikoen laguntza edukiz gero, hobeto moldatuko gara. Itzaberrin, ubarroi handia, lertxuna, kaioak... topatuko ditugu eta ez geldirik, gehienak, hondarretan ezkutatuta dauden zizare, txirla eta karramarroak harrapatu nahian ibiliko dira. Baina lan horretan abilenak hanka eta moko luzeak dituztenak dira, kurlintak eta kuliskak adibidez, aldiz, txirlen maskor gogorra hausten ez dio inork irabaziko itsas mikari.
Behin Itzaberri pasata, aireportua bistan dugula alboko dorre panoramikora igo gaitezke aireportuko aintziran egoten den arrano arrantzalea ikusteko. Badirudi, arrano honek gustuko duela arraina arrantzatu ondoren zuhaitzean jesarri eta lasai asko bere mokadua irenstea. Arrainetan aipagarria da, arrain hiru arantza, Gipuzkoan Txingudin soilik topa genezakeena.
Bidea jarraituz, laster iritsiko gara lehen behatokira. Hemendik aurrera, zeozer ikusteko beharrezkoa da dorre panoramikoak eta behatokiak erabiltzea. Ibilbidea landaretza pantaila (estalki) baten bidez inguratua dago, gure presentziak hegaztiei sortzen dien inpaktu bisuala ekiditeko. Aireportuak, errepideak eta trenak zarata handia ateratzen badute ere, badirudi hegaztiak denborarekin ohitu egiten direla; aldiz guk sortzen diegun kaltea handiagoa da.
Berehala bidegurutze batera helduko gara. Ezkerretara joanez gero, bigarren dorre panoramikora iritsiko gara eta berehala interpretazio zentrora. Aldiz, aurrera jarraitzen badugu, San Lorentzo aintzira inguratuko dugu.
Landaretza aztertzen badugu, lezkadiak ikusiko ditugu edonon. Oso gustuko dute hegaztiek lezka bai babesteko baita habiak egiteko ere. Lezkari arruntak, adibidez, kabia bertan egiten du. Baina badu Plaiaundin bizi den etsai kanpotarra, koipua. Koipua, Hego Ameriketako karraskari bat da, erabat egokitu dena Txingudira eta belarjalea izanik, lezka da bere bazkaririk preziatuena, hegazti askoren kalterako.
Hemengo landaretzak bizirauteko eragozpen handiak jasan behar ditu; gatz kontzentrazio handiak, substratu aldakorra korronteen arabera, itsas mailaren aldaketak...
Gainera, badago bertakoa ez den espezie bat landare autoktonoak kaltetzen dituena. Baccharis halimifoliak gazitasun handia jasateko gai denez, lezkari eta tamarixak ordezkatzen ditu ondorioz, hauetan babestu eta elikatzen diren animaliak kaltetuz. Hauetaz gain zelai ugari dago eta horiek inguratuz zuhaitz eta zuhaixka ezberdinak: zurzuriak, makalak, sahatsak, haltzak, erramuak...
Hurrengo begiratokian, San Lorentzoko aintzira behatu genezake, aproposa mokozabalak lertxunak eta lertxuntxoak behatzeko.
Aipaturiko hegaztiak nahikoa ohikoak dira gure lurraldean, baina noizik behin Txingudin zenbait bitxikeria gertatzen da. Duela gutxi, Itsaso Gorrian, Pertsiar Golkoan edota Mauritanian ohikoa den lertxun mota bat azaldu zen (Egretta gularis). Zisne basati bat ere agertu zen eta iparraldeko espezie hauek oso-oso arraroa da hemen ikustea.
San Lorentzo aintzirari bira eman ondoren, poliki-poliki berriz ere interpretazio zentrora iritsiko gara gure ibilbidea bukatuz
Parke ekologikoari bisita... baina kontu handiz
Eguraldia okertzen denean edota elikagaia urritu, milaka hegaztik bidaiatzeko joera dute. Udazkenean, Europa iparraldean giroa hozten denean, hegaztiek leku bero eta aproposagoetara migratzen dute. Udaberrian, berriz ere hegoaldetik iparraldera igaroko dira bero sargoritik ihesi kumatzera.

Hegaztiek oso igarobide egokia dute Txingudi migrazio garaian, inguruko mendikateak saihestuz, behin-behineko destinora heltzeko. Hau guztiagatik, Txingudira hurbiltzeko garairik aproposena udaberria eta udazkena dira. Dena den, zentroa ireki zutenetik gaur arte 212 espezie zenbatzera iritsi dira eta urte osoan zehar bertan bizi diren espezie asko ikus daiteke: kopetazuriak, txilinporta txikia, uroiloak... Plaiaundiko padura babestuta dago, Txingudiko Natur baliabideen Babes eta Antolamendurako Plan Berezian sartua baitago. Plan honen barne, kategori desberdinak daude eta Plaiaundiko parke ekologikoak Babes Bereziko kategoria lortu du. Beraz, ez gara edonola hurbilduko inguru hauetara, araudi bat ezarrita dago eta behar beharrezkoa da betetzea eta errespetatzea honelako inguruak kontserbatu nahi baditugu behinik behin:
Markaturiko ibilbidetik ez gara aterako.
Ezin da ez animaliarik ez landarerik ezta fruiturik hartu.
Ez da komenigarria animaliei janaria ematea.
Zakurrak loturik eta kontrolatuak eraman behar dira.
Isiltasuna eskatzen da, ez musika ozenik ezta oihurik ere.
Ziklomotoreak aparkalekuan utzi behar dira.
Arrantza eta ehiza debekatuak daude.
Ezin da parkearen urertzean ez ontziratu ezta lehorreratu ere.
Debekatua dago akanpatzea eta sua egitea ere bai.

Arau hauek kontuan hartzea ez da beste munduko gauza. Saia gaitezen betetzen eta betearazten urtetik urtera hegaztiek geroz eta gehiago erabiltzen baitute gurea baino gehiago beraiena den Txingudiko «Restopa»


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude