Aabenduaren 19an aurkeztu zen Sustatu.com Web gune jaio berri hau, batik bat, ekonomiaren alorrean lan egiten duten profesional euskaldunentzako albistegia da. Euskararen presentzia indartzea beti helburu bada ere, Sustatu ez da soilik euskara bultzatzeko ekimen bat, gai profesionalei buruz aritzen den zerbitzua baizik. Goiena Komunikazio Zerbitzuak eta Code & Sintax enpresen semetxoa dugu Sustatu, Goiena da bere adar editoriala eta Code & Sintax, berriz, adar teknikoaz arduratzen den enpresa da. Gu Iban Arantzabalekin aritu gara hizketan, Goienako kide eta Sustatu.com ekimenaren editorearekin.
Berak eman dizkigu Sustatu.com web guneari buruzko azalpen guztiak eta ekimen berritzaile hau Euskal Herrian orain arte existitzen ez zen eredu bat dela argitu digu: "Sustatu ez da atari bat, Sustatu weblog bat da. Hau da, Interneteko albistegia goitik behera. Modu nahiko automatizatuan antolatzen den albiste-gune bat, alegia". Arantzabalek adierazi bezala, munduko leku askotan oso ondo funtzionatzen duen kontzeptua da weblog-a eta beraiek Euskal Herrira ekarri eta martxan jarri dute. Beraz, Sustatuk eskaintzen duen zerbitzua informazioa da. Arantzabalen iritziz, gaur egun, informazio kopurua oso handia da, baina zatikatua eta desegituratua aurkezten zaigu. Internetek informazio hau erabiltzeko aukera berria eskaintzen digu eta Sustatu, informazio horren sorkuntza eta hedapena eraginkorra izan dadin lan egingo duen kanal berri bat da.
Weblog kontzeptua.
Weblog kontzeptua ondo ulertzeko bere izaera eta ezaugarriak aipatzea berebizikoa da. Izan ere, weblog kontzeptuaren oinarrian jendearen partehartzea dago. Sustatuko berriemaileak irakurleak dira, edonor izan daiteke informazio sortzaile zein iritzi sortzaile bere etxetik, bere ordenagailutik. Sustatu.com albistegiko albisteak edonork idatzi ditzakeelako, edonork bidali dezake albiste bat, iritzi bat, iragarpen bat edota beste albiste edo iritziren bati zuzenduriko erantzun bat eta jarraian Sustatuko kideek zuzendu eta argitaratua izango den ala ez erabakiko dute. Arantzabalek azaltzen digun moduan, "euskaraz badaude beste albistegi batzuk Interneten, paperezko hedabideen edizio jarraituak direnak, eredu tradizionalagoen Interneteko bertsioak, alegia. Baina Sustatu eredu berri bat da, guztiz berritzailea Euskal Herrian. Honela, garrantzitsuena jendearen partehartzea da, jendea da albistegia osatzen duena. Kazetaritza molde berri bat da, non iritzia eta propaganda nahasten diren, eta albistea artikulu soil izatetik, artikulu horri buruz idatzi daitezkeen iritzi, erantzun eta link guztien batura izatera pasatzen den. Informazioa asko aberasten da horrela".
Sustatu.com weblog-a.
Iban Arantzabalek Sustaturen berezko ezaugarriak azaldu dizkigu. Jorratzen dituzten gaiak anitzak dira: Kultura, Irakaskuntza, Internet, Informatika, Hizkuntza, Enpresa eta Bestelakoak. Web gunean dioen lez, Teknologia, Ekonomia eta Kulturari buruzko gunea da. Bere iritziz, gai horiek pantaila baten aurrean dagoen orok oso gertu sentitzen dituen gaiak dira: "Uste dugu badaudela beste web gune batzuk beste gai batzuetara zabalduak. Esate baterako, badakigu kirolak arrakasta izan dezakeela, baina guk ez dugu horrelakorik nahi gure weblog-ean. Aukeratutako gaiak, Sustatu.com proban izan dugun denboran arrakasta izan dutenak dira. Aurrerago, ordea, agian gai berriak gehitzen joan gaitezke".
Gai hauei guztiei buruzko edozein albiste, iritzi, erreferentzia, iragarpen edo erantzun bidal dezake erabiltzaileak Sustatun argitaratua izan dadin. Albiste hauek moderatzaile baten eskuetatik igarotzen dira argitaratu baino lehen, testua zuzendu eta egokitzeko eskubide osoa duena. Iban Arantzabali lan hori egiteko zein irizpide erabiltzen duten galdetu diogunean, zera erantzun digu: "Erabiltzen ditugun irizpideak oso soilak dira. Batetik, albistearen interesari begiratzen diogu. Bestetik, ganoraz idatzita egotea eskatzen dugu, eta noski, astakeriarik ez edukitzea. Hau da, azken finean, errespetuz idatzia egotea besterik ez dugu exijitzen". Bai informazio hutsa den albiste bat idaztean, bai beste medioren batean edo lagun batek kontatutako informazio baten erreferentzia egitean, bai produktu edo zerbitzu baten iragarpena egitean, eta bai beste norbaitek idatzi duen albisteari buruzko iritzia eman edo horri erantzutean, beti errespetu handiz jokatu beharko da. Errespetu falta eta iraina dira, azken finean, Sustatuko galbaheak pasatzen uzten ez dituen gauza bakarrak.
Boletin elektronikoa.
Sustatu.com guneari buruz azaldu ditugun ezaugarriak ez dira gutxi. Baina ez dira hemen bukatzen sarean jarri berria den gune berritzaile honek eskaintzen dituen aukerak. Izan ere, Sustatuk albistegiko albisteak idazteaz gain, hitzorduak egiteko aukera ere ematen du. Hau da, foro bat sortzeko aukera. Albisteak bidaltzea bezain erraza den mekanismoa erabili behar da honetarako eta edozeinek egin dezake, kontuan hartuta, noski, Euskal Herri mailako proiektua dela.
Bestetik, aipatu dugun weblog kontzeptua izateaz gain, boletin elektroniko bat ere bada Sustatu. Hau da, harpidedun egin eta e-postaz jaso daiteke dohainik. Harpidedunak, ordea, ez ditu albistegian agertzen diren artikuluak osorik jasotzen, baizik eta bakoitzaren sarrera bat, abisu soil gisa. Gero, zerbait interesatzen bazaio, bere esku egongo da web gunean nahi duena eskuratzea.
Sustatu.com goitik behera aztertu ostean, Iban Arantzabalen esperientzia oinarri hartuta euskararen osasuna sarean berak nola ikusten duen galdetu diogu. "Uste dut euskararen egoera sarean osasuntsu dagoela, baina ez dago atzera begira egoterik. Euskaraz eginiko ekimen guztiak, ahal baldin bada kalitatezkoak, beharrezkoak dira. Orain eguneroko prentsa euskaraz irakurri dezakegu, hor dago SAREKO ARGIA edo Aurki bilatzailea, edo Bagera elkartearen web-a...Web pertsonalak ere asko eta asko daude eta ez nola nahikoak". Interneteko komunitate euskaldunari dagokionean, komunitate hori gero eta handiagoa dela dio Arantzabalek. Bere iritziz, eguneroko bizitzan euskaraz jarduten dugunok muga bat jartzen dugu Interneteko erabilpenari dagokionean ere, baina gazteak gogor ei datoz eta ez omen die pantaila batek beldurrik ematen. Euskararen erabilera normaltzen doan heinean Interneteko erabilera ere normalduko dela uste du Arantzabalek