Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
asteazkena 2024ko maiatzaren 08an
«NICOLAS REDONDOK ARRAZOI HIERARKIKOAK ERABILTZEN DITU»
Alderdi sozialista autonomoagoa agertzean PP bakarrik gelditzeko beldur dela esan duzu orain gutxi. Hori udal krisian biziriko inpresio bat da edo inpresio orokor bat?
PPren politikarekiko PSOE autonomoago batez ari nintzen, baina euskal alderdi sozialistarentzat balio du ere bai. Hau da, EAEko alderdi sozialista Espainiako alderdi sozialistarekiko burujabeagoa agertzen denean PP beldurtzen da. Hala ere, Nicolas Redondok predikatzen duena ikusita, badirudi alderdi honek ez daukala batere interesik autonomoago izateko. Batzutan, arrazoirik ez daukanaren arrazoia atera nahi du Redondok, eta arrazoi hierarkikoak erabiltzen ditu. Euskal sozialistoi aukera gehiago eman behar zaigu. Kataluniako sozialisten -Pascal Maragallena bereziki, sentsibilitatea Espainiako alderdi sozialistaren barruan nagusia izan dadin euskaldunon laguntza behar du. Gure ildoa EAEn nagusitzea ezinbestekoa da Espainia mailako alderdi sozialistan benetako aldaketa eman dadin.
Nicolas Redondoren ordezkorik ba al dago euskal sozialismoan?
Ez naiz kapaz hori esateko.
Odon Elorza alkatearen ondokoa zara. Ehuneko ehunean sostengatzen al duzu alderdian daraman jokamoldea?
Bai. Odon Elorza ondo kokatua ikusten dut alderdi sozialistaren eztabaidan, une honetan posible den puntu eta muturreraino eramaten ari da bere estrategia.
Odon Elorzak Konferentzia Politikoa baino ezohiko Biltzar Nagusia eskatu dio alderdiari. Elorzak eta bere ildokoek ba ote duzue indar nahikoa alderdiaren norabidean eragiteko?
Kalkulu organikoak egiten desastre samarra naiz eta alderdi hau ezagutzea kosta egiten zait oraindik. Kanpotik imajinatzen oso zaila den funtzionamendu tradizional bat dauka. Nik ezohiko biltzar bat izatea nahi nuke. Horrek onartuko den diskurtso politikoarekin guztiz ados dagoen zuzendaritza bat bermatuko bailuke, eta ez oraingo zuzendaritza iritziz aldatzera behartu. Sinesgarritasun gehiago edukiko luke barrura nahiz kanpora begira. Ez ohiko batzar bat burutzea oso zaila ikusten dut, hala ere.
Jesus Egigurenek Konferentzia Politikorako idatzitako dokumentua nahita egindako filtzazioa izan al da?
Nahita eta interesatua. Filtrazioak beti dira interesatuak.
Zein asmoz egina kasu honetan?
Alderdiaren barneko eta honen inguruko jendearen tenperatura hartzeko asmoarekin egin dela iruditu zait. Iritzi azterketa eta gizartearen ikuskera hautemateko asmoarekin egin da nolabait.
Dokumentuak ez duela alderdi sozialista islatzen esan du Rodriguez Zapaterok. Odon Elorzarekin ere ez du aparteko elkartasunik izan udal krisi garaian.
Ziur nago Rodriguez Zapatero Odon Elorzaren ildotik erosoago ibiliko litzatekeela. Kontuan hartu behar da Donostiako udal krisia eta Egigurenen dokumentua, Elkarri-ren Konferentziarekiko Odon Elorzak erakutsitako atxikimendu unean eta Galiziako hauteskundeen kanpaina garaian izan direla. PSOEko idazkari nagusiaren jarrera ez da berdina izango Galiziako hauteskundeen testuingurutik kanpo .
Galiziako hauteskundeek zerbait argitu al dute?
Ez. Hauteskunde bakoitzak bere testuingurua dauka eta Espainia mailan terrorismoak esanahia handia dauka. Terrorismoa dagoen bitartean PPrengandik aldentze guztiak zailak dira. Alderdi sozialista zaharra aldatuko bada -eta aldatzen ari delakoan nago-, Maragallen tesien ingurutik aldatzen hasiko da eta bide berriak urratzen. Zapatero askoz ulerkorrago izango litzateke euskal sozialistek planteatu dezaketenarekin euskal sozialistei makurtze hierarkiko bat eskatzearekin baino. Zapaterok bere zuzendaritzako ordezkari orokor baten laguntzari eutsi behar dio, ordea, Redondoren botoa behar du une honetan.
Zer behar da PSE-EEren Konferentzia Politikoan autodeterminazioari buruzko eztabaida eman dadin?
Euskal gizartearen berme demokratikoa.
n Non dago eztabaida gauzatzeko oztopo gehiago EAEn bertan edo Madrilen?
Ez naiz ausartzen esatera. Batzutan EAEn oztopo gehiago dagoela ematen du, autodeterminazioa eztabaidatu nahi dugunok atzera bota izan gaituzte hemen. Normala ere bada, hemen hainbat jendek ez du bere burua aske sentitzen zenbait gairi buruz eztabaidatzeko. Orduan, baliteke EAEn oztopo gehiago sortzea.
Zer inpresioa duzu EAJk eta EAk autogobernuaren gaiari buruz eraman nahi duten politikaz? Eusko Jaurlaritzaren politika argi bat ikusten al duzu?
Baietz uste dut. EAJ-EA kolalizioak alderdi guztion artean zehaztu beharreko eztabaidagai nagusiak erabakita dituela iruditzen zait. Halaber, une honetan, EAJ eta EA alderdiak jakitun dira ez daukatela nazionalismoaren gehienezko eskaeretara iristerik. Ez dut modu interesatuaz esaten, alderantziz, batzutan nazionalismoaren helburuak maximalizatu egin badira ere, aldi berean helburuak denboran hurbildu egin zaizkigula iruditzen zait, autodeterminazioaren eta independentziaren perspektibak hurbilagoak ditugu, alegia. Une honetan -orain dela bi urte ez bezala-, euskal nazionalismoak euskal gizarteak eduki litzakeen helburuekin bat egiteko asmoa daukala pentsatzen dut. Zentzu honetan denborarekin denok eskertuko dizkiogun mugimenduak egingo dituela espero dut. Juan Jose Ibarretxe lehendakaria norabide horretan ikusten dut.
Euskal nazionalistengan konfiantza gehiago duzu orain bi urte baino?
Nazionalismoa eta sozialismoaren arteko sintesia oso mesedegarria izango litzateke herri honentzat. Jende gehienaren helburuak -urrutien daudenak, denboran lortzeko luzeen direnak barne- lorgarriak izan zitezkeelako. Azken finean, heziketa kontua da. Alderdi sozialistako zahar jendeak pentsatzen duenak ez du zer ikustekorik etorkizuneko alderdi sozialistaren jendeak pentsatzen duenarekin. Gaur egun, alderdi sozialistan dauden gazteak Euskal Herrian jaioak dira, euskal bizitza bat izan dute eta euskararekiko beste sentsibilitate bat dute. Hainbat kontzeptu eta aldaketa politikoren aurrean ez dira izutzen, prest daude gai guztiez hitz egiteko.
Biolentziarik gabe autodeterminazio eskubidea eztabaidatzeko aukera ikusten al duzu alderdi sozialistaren oinarrizko egituretan?
Nire etorkizuneko kalkulua hauxe da: euskal sozialisten umeak ikastolan edo euskal eskolan heziak izan dira, beste harreman bat dute Euskal Herriarekiko eta euskal sentsibilitatearekiko. Independentzia eta autodeterminazioa ez zaizkie kontzeptu arrotzak, kontzeptu horiekiko jarrera irekiago bat hartu dute. Biolentziarik ezak, autodeterminazio eskubidea planteatzen duenari errazago egin ahal izatea baimenduko dio, eta intereseko gaia ez duenak ere askatasun osoz ezetz esatea izango du. Autodeterminazioaren eztabaidan alde guztien nahiaren sintesia bilatu beharra daukagu.
Lizarra-Garazi bezalako beste foro edo mintegi batean ikusten al duzu zure burua?
Bai. Baina, akordio berri horri beste gizarte baldintzak eskatuko nizkioke. Prozeduraren aldetik Lizarra-Garaziko Akordioari ez nioke eragozpen handirik jarriko, baldin haren ondorioz bizi izan genuen prozesu politikoa bizi izan ez bagenu. Nik zenbait jendearengandik bazterketa bizi izan nuen, eta bazterketa hori oso kontziente izanaren sentsazioa daukat oraindik ere. Gure alderdia Lizarran ez egoteagatik guretako zenbaitek prezio garestia ordaindu genuen gizarte bizitzan. Akordioaren kudeaketa famatu hori beste era batera egin beharko litzateke.
Zer iritzi duzu Elkarri-ren Konferentziaz?
Begi onez ikusten dut. Elkarri une honetan zerbait eskaintzen ari bada, lasaitasuna da, eta antolatu duen Bake Konferentzia burutzearen aldekoa naiz. Elkarri ezker abertzalearen mugimendu bakezale bezala hartua izan zen hasieran, gero abertzaleen bake foro gisa. Hala izanik ere, Euskal Herriko herritarrek pentsatzen dutena jakin dadin borondate tinkoa eta argia ikusten diot Elkarri-ri, egin nahi dutena garbi esaten du. Ikasgai handia ematen ari da eta marko hori erosoa iruditzen zait. Nik eskertzen diot bere lana.
Zer pertzepzio dago PSE-EEn Ramon Etxezarretarekiko?
Oraindik ere elementu arraro bat bezala ikusia naiz. Euskaraduna edota euskaltzalea izateaz aparte, baserri munduan jatorria izaki, elementu bitxi bat bezala hartua naiz nonbait. Etorri berria izanaren jitea daukat oraindik,«Nondik etorri ote zaigu morroi hau?» galdetuko balute bezala. Baina ez naiz bakarra PSE-EEn. Odon Elorza ondoan dut, ibilbide historiko bat dauka alderdian eta bera ni baino abertzaleago egina dago kasik (irriak).
Zure eraginez edo?
Odonek konbikzio oso sakonak eta bereak ditu. Gainera, alkatetzak asko laguntzen du herritarrak ezagutzen eta honek herritarren nahikundetara jartzen zaitu nolabait.
Zer garrantzia du Donostiako udalak alderdi sozialistarentzat?
Nolabaiteko garrantzia dauka, alderditik harantzago doan garrantzia eta alderdi sozialistak hori neurtzen jakin behar du. Alderdi sozialistak badaki Donostian badagoela plus bat, alderdi sozialistaren barne sentsibilitate eta ildo konkretu batena, eta hori guztiz kontuan hartu behar duela ere badaki
«Donostiarrek nagusiki gu aukeratu gintuztela onartu behar du PPk»
Donostiako udal gobernua osatzen duzuen PSE-EE eta PPren arteko krisia bizi izan duzue berriki. Zein izan dira krisi honen arrazoiak? Egungo testuinguru politikoaren krisiak ziklikotzat jo behar al dira?
Krisi guztien arrazoiak prozesu baten gailurra izaten dira. PPrekin harremanak inoiz ez dira errazak, gero eta zailagoak egiten ari zaizkigu. Gu proposatzen ari garen oro moteldu helburu dauka. Popularrak datozen hauteskundeen kalkulua egiten ari dira eta gero eta egur gehiago emateko prest daude. Gu prest gaude beraiekin segitzeko baina gure pentsaeraren muina galdu gabe. Krisi honen eragileak bi izan dira: batetik, tasa eta prezio publikoak ez kobratzearekin mehatxatu digu PPk. Esaterako, musika eskola eta haurtzaindegietako prezioak garestitu nahi izan ditu, zerbitzu horiek diru sarrerak ekarri behar dituztelakoan. PPko zinegotzi baten alabak biola klaseak hartzeko 15 mila pezeta pagatzen duelako hilabetean, beste gainontzekoek prezio bera pagatu behar zutela zioten. Ez gaude hori onartzeko prest.
Krisiaren arrazoiak ez al daude politika orokorarri lotuak, PSOE eta PPren Itunaren testuinguruan?
Ez. Nahiz guk -Odon Elorzak konkretuki- Terrorismoaren Aurkako Ituna kritikatu egin genuen bere garaian, udal krisia ez dugu testuinguru horretan kokatzen. Hala ere, egia da, garai berean alkatea Elkarriren Konferentziara joan zen eta Egigurenen dokumentua egunkarietan agertu zen. PSE-EEn piztu den eztabaida ere tarteko izan da eta jende askok hor kokatu du krisia. Zalantzarik gabe aurrerantzean faktore horiek pisua izango dute udal gobernu honetan.
Krisia legealdi osorako itxi al da?
Oraingoz itxi da baina zauriak bizirik daude, eta ez dakit berriro ere berritu daitezkeen. Hala ere, donostiarrek nagusiki gu aukeratu gintuztela onartu behar du PPk, gurea da aukera botatuena. Alkateak ez du inoiz elkarrizketarako bere joera ezkutatu, ezta euskal gizartean eta bere alderdian rol bat jokatu nahia Euskal Herriaren bakegintzaren alde. PPrentzat, ordea, jarrera hori oztopo eta eraso motibo bat da. Etorkizunean hortik hausturaren bat etor daitekeen edo ez, PPk erabaki beharko du.
Krisia gainditzeko ez duzue alderdiaren goi-agintarien aldetiko inolako presiorik sentitu?
Bat: guk ez dugu inorekin ezer kontsultatu. Bi: ez dakit inor ausartu den agindurik ematera; nik dakidala ez. Hiru: Nicolas Redondori gure jarreraren arrazoiez jabetu zedila eskatu genion, zerk eramaten gintuen krisia zabaltzera eta ixtera. Inoiz ez dira estatu arrazoiak ez udal testuinguruaren kanpoko faktoreak izan. Eta hori inori garbi esan baldin badiogu Nicolas Redondo jaunari esan diogu
ABERTZALE EZ NAZIONALISTA
Urrestillan jaioa da. Abertzaletasuna eta sozialismoaren sintesia du helburu, EEn behiala eta PSE-EEn orain. Nazionalismoekin kezkatzeko EEBBen eta Aznarren jarrerei begiratzea baino ez dagoela dio, baita, tamalez, bortizkeria darabilen etxeko nazionalismoari ere. Lurralderik gabe bizitzeko prest dagoela esan digu, baina komunitatea behar duela, oso komunitate sendoa gainera.
Irakurrienak
Matomo erabiliz
#1
Jonathan Cook
#2
Mikel Garcia Idiakez
#3
Xabier Letona Biteri
#4
#5
Euskal Irratiak
#6
Palestinarekiko Erantzukizuna Plataforma
Azkenak
2024-05-12
Urko Apaolaza Avila
Koopfabrika
Kooperatiba eraldatzaileen harrobia
Olatukoopek beste hainbat eragilerekin batera garatu duen proiektu nagusienetako bat KoopFabrika da, ekintzailetza soziala bultzatzeko helburuz 2017an sorturiko programa, eta gaur egun oraindik martxan dagoena.
Hasiera batean, lehenengo ideia izan zen ekonomia... [+]
2024-05-12
Nerea Menor
Ghayath Almadhoun
"Alemania nagusitasun zuriaren piramidearen gailurrean dago, eta lehen holokaustoa ukatu zutenek orain Nakba ukatzen dute"
Ghayath Almadhoun-ekin hitz egin dugu Alemaniako zentsura sistemikoaz eta horren ondorioez. Siriako Damaskon 1979an jaiotako poeta palestinarra, Suediara joan zen bizitzera eta egun Berlinen bizi da. Bere poesiak, ia 30 hizkuntzatan itzulia, maitasuna, tokialdatzea eta nortasuna... [+]
2024-05-12
Estitxu Eizagirre
Amillubiren festa maiatzaren 11n
Lurra taupaka hasiko da
Urola ibaiaren meandroan, Zestoako Iraeta auzoan daude Amilibia baserria eta bere lur emankorrak: 5 hektarea baso eta 4 hektarea laborantza lur. Laborantza ekologikoa sustatzen duen Biolur elkarteak baserria eta lurra kolektibizatu nahi ditu Amillubi proiektuaren bidez... [+]
2024-05-12
Amets Aranguren Arrieta
Pastoral bat Iruñearendako
Herri-antzerki forma bat da pastorala. Sujet edo protagonista bat (hildakoa) hautatu eta bere bizia bertsotan ematen duena. Kantua ere presente dago emanaldian. Taula zuzendaria, taula gainean arituko diren arizaleak eta musikariak aritzen dira pastorala ematen den egunean... [+]
2024-05-12
Urko Apaolaza Avila
'Ekonomia eraldatzailea(k)' liburua
Ekonomiaren adjektibo guztiak
10. urteurrena kari, Olatukoopek bi liburuxka atondu ditu eta labean ditu jadanik, ekonomia eraldatzailearen eta kooperatibagintzaren ingurukoak biak ala biak. Alde batetik, herri-kooperatiben inguruko eskuorri edo gida bat kaleratuko dute, herri kooperatiba bat zer den... [+]
Eguneraketa berriak daude