Beste hainbat herrik bezala, Getariak ere badu bere herri aldizkaria. «Artzape» du izena, bi hilabetez behin kaleratzen da oraingoz eta maiatzean atera zen lehen aldiz. Herriko gai nagusiak biltzen ditu bere orrialdeetan, herriko hizkerari ere bere tartetxoa eskainiz. Bolondres talde batek eramaten du aurrera Gure Txeru elkartearen laguntzaz. Jon Illarramendi koordinatzailearekin mintzatu gara argitalpen berri honetaz.

Duela hilabete batzuk Getariako Udalak Kazetaritza, Diseinua eta Filologiako lizentziatu batzuk elkartu zituen herrian euskarazko argitalpen bat kaleratzearen ideia aurkezteko. Herri informazioa, irakurzaletasuna eta euskara bultzatzearen beharra nabari zuten eta inguruko herrietan (Orio, Zumaia) dauden aldizkarien arrakasta ikusita, haietako batzuk animatu ziren erronkari aurre egitera.
Gure Txeru kultur eta kirol elkarte beteranoarekin harremanetan jarri eta bere lokalean jarri zuten aldizkari berriaren egoitza. Elkarte honek zenbait ikastaro eta mendi irteera antolatzen du eta 300 bazkide baino gehiago ditu ia 3.000 biztanle dituen herrian. Asmoarekin batera, lehen bultzada gisa, Udala materiala (ordenagailua, eskanerra, argazki kamera) eta lehen hiru zenbakietarako inprimategi eta maketazio gastuak ordaintzera konprometitu zen. Horrekin batera herriko dendari, tabernari eta enpresen publizitatetik eta harpidetzetatik (50 harpidedun inguru dituzte) lortu dituzte orain arteko diru sarrerak.
Jon Illarramendi eta Oinatze Cilveti arduratu dira orain arte talde gazte hura (17-33 urte artekoak) koordinatzeaz. Idazten, argazkiak ateratzen eta maketatzen aritu diren lagunen artean atera dituzte jada hiru zenbaki kalera, lehena maiatzaren bukaeran, bigarrena uztailean eta azkena pasa den hilean. "Aurrerantzean hilabetekaria izatea nahiko genuke, batez ere Eusko Jaurlaritzak eta Gipuzkoako Diputazioak hala eskatzen dutelako bere diru laguntzak lortu ahal izateko, baina oso zaila ikusten dugu. Lan guztiak borondatez ari gara burutzen, baina hilabetekarirako pausoa ematen dugunean pertsona bat kontratatu beharko dugu egun erdiz-edo" adierazi digu Illarramendik. Bera Filologian lizentziatua da eta udal langileei euskara klaseak ematen aritu da orain arte.
Herriko kontuak getariarrez. Aldizkariari izena jartzerakoan buruhauste dexente izan arren, azkenean Artzape izena aukeratu zuten, portuaren gainean dagoen lekua, "getariarrak moilari begira komentario ugari egiteko biltzen garen tokia". A4 neurriko bi koloretako azalean eta zuri-beltzeko orrietan, guztira 28, herriko gaiak jorratzen saiatzen dira: udal gai nagusiak, arrantza, elkarrizketa, erreportaia, inkesta, gazteak, kultura, kirolak eta agenda. Euskara batua da nagusi, baina inkesta eta beste orrialde bat getariarrez idatzita daude. Irailaren bukaeran atera zen 3. zenbakian erreportaia berezia atera zuten koloretan denboraldiko errebelazioa izan den Zumaia-Getaria arraun taldeari buruz, Zumaiako «Baleike» aldizkariarekin elkarlanean.
Lehen zenbakiaren 700 aleak herriko plazan banatu zituzten egileek, baina bigarrenetik aurrera etxeetako buzoietan banatzen da «Artzape». Aldizkariaren arrakasta ikusita, azken zenbakiaren tirada handitu egin dute, 900 alera pasatuz. Badirudi herriko berriak herritarrengana iristarazten asmatu dutela Artzapeko bultzatzaileek