48 orrialde
500 pezeta
20 libera

Komiki baten sinadura gisa (m) xume bat ikusiz gero, Jon Manzisidor zumaiar gaztearen marrazki lan baten aurrean zaudete. Eta hain zuzen Zumaian argitaratzen den "Baleike" aldizkarian ekin zion bere zeregin honi, duela zortzi bat urte, herri horretako gazte batzuek euskara bultzatzeko asmoz plazaratu zuten hilabetekarian. Testuen lagungarri izango ziren marrazkiak egiten zituen hasiera hartan, baina arian-arian animatu, eta komiki zerrendak eta binetak egiteari ekin zion. Harrera ona izan zuen aldizkariak oro har -laster bilakatuko zen hamabostekari- eta beste hainbeste esan daiteke Jon Manzisidorren marrazkiez ere: herriko gorabeherak jasotzen zituztenez, bertako gazteen hizkera mota erabiliaz, oso ezagunak egin ziren Zumaian... eta baita urrutixeago ere. Hainbeste, halako batean, "Euskaldunon Egunkaria"koen deia jaso zuela, eta geroztik haren orrialdeetan ere ikus daitezke. Orain Baleike kultur elkartearen eskutik kaleratu du bere azken emaitza, "I.U. eta bere lagunak" komikia, non Izaki Unizelularra, Gafosua, Juan Andres eta Maria Eugenia bezalako pertsonaiak agertzen diren, gauza orori eraso egiten ohituak egon arren, aldi berean samurrak izaten dakiten horiek.

97 orrialde
800 pezeta
32 libera

Euskaltzaindiak eta BBK Fundazioak urtero burutu ohi duten Felipe Arrese Beitia olerki saria Juan Ramon Madariaga Abaituaren "Amodioa batzuetan" poemarioak irabazi zuen iaz. Nolanahi ere, ez da hau poeta honek sariren bat eskuratzen duen lehen aldia: 1988an, Bizkaiko Foru Aldundiaren olerki saria jaso zuen "Imentzioaren Pergamuak" poema bildumarekin, eta 1997an, kritika saria, "Argia sortzen den izartegia"rekin. Oraingo honetan, udazkena zer den ulertzen saiatzen da poeta, uste oso hau duelako: "Udagoienean nola, hala agitzen da amodioaren estratan ere". Eta ezustean amodioaren eszenak identifikatzeari ekin zion, derrotaz, aladurez, sofrikarioz, poztasunez beterik agertzen zaion amodioa sailkatzeari, ahalik eta "Amodio batzuetan" poemarioa sortu zuen arte.

188 orrialde
1.000 pezeta
40 libera

Hauxe da Azpeitiko Uztarria kultur koordinadoraren eskutik Enekoitz Esnaolak plazaratu duen liburuaren izenburu zehatza: "Joxe Urbieta 'Takolo', kontrariorik gabeko gizona". Eta bertan, Xoxote mendiaren magalean datzan Takolo baserrian jaio eta bizitza osoan mendizale sutsua izandako Joxe Urbieta "Takolo"ren bizitza kontatzen zaigu. Hamalau urterekin lanean hasi zenekoa, Lagun Onak Mendi Bazkunean lortutako dominak, Auñamendira hemezortzi urterekin eginiko irteera, soldadutza Ferrolen, mendian serio hasi zenekoa, 1967an Mont Blanc, Pako Lertxundiren "desgrazia", Urrejolan egindako eskapada, erreskateetan izandako parte hartzeak, iheslariei emandako laguntza, Everestera zihoan espedizioan onartu zutenekoa, hartan bizitakoak, Himalayako beste une bereziak... eta "Takolo"ren adioa, besteak beste.