BERTSOAK ETA MUSIKA
BARRICADA, Berri Txarrak, Dikers, Petti, Skalariak, Maider Ansa, Aire Ahizpak eta Dank dira Nafarroako Bertsolarien Elkarteak martxan jarri duen proiektuan parte hartuko duten bakarlari eta taldeetako batzuk. Guztira, hamabost izango baitira urrian grabatuko den diskoan parte hartuko dutenak. Talde eta kantari bakoitzak bertsolariek aurrez prestatutako doinu eta bertsoen interpretazioa egingo du lan honetan. Eta diskoa Gor-ek plazaratuko du datorren udazkenean.
LATINOAMERIKAKO ZITA
HAMAR urte betetzen ditu aurten Biarritzeko Latinoamerikako kultura eta zinemaren «La Cita» Jaialdiak. Hainbat alor jorratuko dute bertan urriaren 1etik 7ra bitartean. Zinemari dagokionez, 9 luzemetrai eta 9 laburmetrai lehiatuko dira Sekzio Ofizialean. Horrez gain, orain arte eginiko jaialdietan Urrezko eguzkia irabazi duten filmak ikusi ahal izango dira. Brasileko laburmetraiak, Venezuela, Colombia, Ecuador, Peru eta Boliviako filmak, pelikula espainiar eta portugesak, euskaraz azpititulatutako zenbait film eta hainbat dokumentalek osatuko dute egitaraua. Literaturan, Latinoamerikako idazleen belaunaldi berriak jorratuko dira. Eta musikan, hainbat kontzertu eskainiko dute Latinoamerikako taldeek.
BILBOKO ARTE EDERRAK
BILBOKO Arte Ederretako Museoko lanak amaitu ondoren, urriaren 27an zabalduko ditu berriz ateak. Berrikuntzen artean, erakusketa gunearen zabalpena, sarrera berriak eta auditorio baten sorkuntza aipa daitezke. Museoak «Gaur, Hemen, Orain» erakusketarekin hasiko du ibilbidea, non Euskal Herriko sormen artistikoa arakatuko den. Hain zuzen, besteak beste, Txomin Badiola, Ana Laura Alaez, Pello Irazu, Sergio Prego, Dario Urzay, Francisco Ruiz de Infante eta Itziar Okarizen lanak izango dira ikusgai.
ARGAZKIEN JOKOA
JOKO gisa izan da ikusleei aurkeztua Iruñeko Zapateria 40ko aretoan urriaren 21a arte paratu den «La mirada compartida» erakusketa. Bertan, nazioarteko 19 artisten argazkiak jarri dituzte. Artista hauetako batzuk argazkiak ateratzen hasi diren eskultore eta pintoreak dira. Besteak, eskultura eta pinturaren alorrean lanean hasi diren argazkilariak. Bisitariaren eginkizuna, hauxe: deskubritzea argazki bakoitzaren atzean zer nolako artista dagoen. Argazkiak, nolanahi ere, gorputzen, objektuen edota paisaien erretratuak dira.
EUSKAL ZINEMA INDUSTRIARANTZ
SAROBE Arte Eszenikoen Zentroak euskal ikusentzunezkoak sustatzeko eta bateratzeko gune bat sortuko du Oiartzunen. Bertan, bi plato eraikiko dituzte eta inguruan, sektore honetako enpresak kokatuko dira euskal zinema industria sortzeko. Bestalde, Sarobek zine eta telebistako kurtsoak eskainiko ditu. Proiektua Donostiako Zinemaldian, hilaren 24an aurkeztuko da.
