KORRIKA degu abian eta
kontentu gaude benetan
Bi urtean behin izaten baita
gainera fetxa hauetan.
Udaberrian normalena da
irrifarra zuhaitzetan
KORRIKArekin bat jarriko da
euskara ere loretan.


Martxoan zehar ere KORRIKA
kulturalean barrena:
gure Pernando, gure Txirrita,
Xenpelar, Arozamena.
Nahiz koadrila hau korrikarako
ez zen izango onena;
bertsolaritzak jaso berri du
merezi zuen omena.


Berriz KORRIKA badatorrela
oroitzen gera goizero
denok hartu nahi baitegu parte
denak baikaude hain bero.
Diego Gartzian markak hausterik
nahiz ta ez dugun espero
berriro forman jarri beharra!
ia bi urte ta gero.

Nafarroan galdu omen gintezke:
hango seinale ta arau
ardo gorriak gida gaitzala
helmugara arte ri-rau!
Ibil gaitezen han eta hemen
egunik egun, gaurik gau
batzuk mantsotzen saiatu arren
euskarak korrika dirau.


"No sé euskera" dioteneri
jarri gintezke begira
eurentzat ere izan liteke
mezu emaile, sikira.
Euskararikan jakin ezean
ezin heldu urrutira:
etxetik irten korrika eta
handikan euskaltegira!


Abiadura gauza ederra
ez da izandu sekula
orduko zenbat hartuko dugun
ezin nezake kalkula
nahiz ta KORRIKA ez joan korrika
ta izan martxa ahula:
Euskal Herriko txoko guztiak
bixitatu ditzagula.