Iparraldeko AEK sortu zeneko eta ARGIAk bere "zerukotasuna" galdu zueneko urtea amaitzear zen. Eta Korrika Euskal Herria! izeneko ekitaldi berezia hastear. ARGIAk, kanpaina berezi hau aitzaki, euskalduntze alfabetatzeari eman zion bere 893. zenbakiko azala. Barruan gau eskolen egoeraren azterketaz gain, ekintza berriaren nondik norakoak ere zehazten ziren. "Errelebotako karrera bitxia" bezala definitu zuen Elixabete Garmendia testuaren egileak: "Euskal Herrian zeharreko 1.800 kilometro korrituko dituzte, etengabe, gau eta egun, gutxienez beste hainbeste lagunek". Orduan ere Korrika ez zen lasterketa hutsa izango: "Errelebo karrerarekin batera, beste zenbait ekintza eramango da aurrera bazterretan. 29an bertan, eta karreraren hasierarekin batera, ekintza unitari hauxe egingo da herri guztietan: kanpainaren inaugurazio ofiziala txapligu, bolandera eta txupinazo bat botaz eta minutu bateko kanpaijotzeaz. Segidan, gaupasa, berbena, jaialdi... nahi dena edo ahal dena. Aldi berean, euskal eskolen aldeko txozna edo tabernak irekiko dira, bertan kanpaina hau dela eta ateratako pegatina, metxero, llabero, kamiseta eta abar salduko direlarik".
Hotza eta elurra nagusi izan ziren lehen Korrika horretan eta hala ere "Nafarroako arduradunek esan zigutenez, giroa bero dago han (...). Dagoenekoz, herri pila bateko parlamentari, alkate, kontzejal, apaiz, maixu, mediku etabarrek eman dute hitza dagokien kilometroa egiteko; horien artean Jesus Bueno eta Rikardo Gonzalez parlamentariek, Kaseda, Zarrakastelu eta Melidako alkateek, Andosillako apaizak..."
Egun Korrikaren funtzionamendua aski ezaguna da, baina 80ko hura lehen aldia izanik, azalpenak ez zeuden soberan: "Pertsonaia famatuetatik aparte nahi duen guztiak parte har dezake, noski kilometro bakoitza lagun batek ez ezik, talde batek ere egin bait dezake. Horretarako dirua emango dutenak behar dira, eta norberak bilatu beharko ditu horiek".

1980ko abenduaren 7an amaitu zen lehenengo Korrika hura eta abenduaren 21eko ARGIAko alean ekitaldiaren balantzea egin zen: "Parte hartzaile asko, diru gutxi" hitzekin hasten zen, eta aurrerago, "agian dirua beste toki batzutatik ateratzeko garaia dela adierazten digu honek". Irtenbiderako proposamena ere luzatzen zen: "Politikoengan jarri beharko genituzke begiak lehenik".
"Ezin uka gauza bitxirik ikusi dugunik" zioen segidan, "Euskararen aitzakia dela eta hor azaldu zaizkigu zazpi probintzien batasunaren etsai amorratuak, Nafarroako UCD eta PSOEkoak, Euskal Herriaren seilu argi eta garbia zeraman kanpainan parte hartzen". Kritikoa zen artikulua jarrera honekiko, baina egun inork imajinatzen al du Miguel Sanz txandala eta petoa jantzita lekukoa eskuan duela?
Artikuluak ez zuen Korrikaren amaiera polemikoaren aipamenik egiten. Gogora ekarri zuen, ordea, Xabier Esenberri gaztearen zorigaiztoko heriotza: "Ez dadila alferrikakoa gerta, zerbaitetarako balio izan dezala"