Donostiak ez du atsedenik hartzen. Zinemaldia amaituta, ustez asetuta utzi ditu zinezaletuak. Ordea, hauei postrea eskaini asmoz hilaren 27an Fantasia eta Beldurrezko Zinemaren XI. Astea jarriko du abian. Azaroaren 4a arte, beldurrezko zeluloide puska apartekin gozatzeko parada izango dute bertara hurbiltzen direnek, terroreak aurtengoan klasikoen ukitua izango baitu.
Hamaika urte bete ditu Espainiako beldurrezko zinema asterik erakargarrienak. Urtero, genero honetan ekoizten diren labur zein film interesgarri eta beldurgarrienak bertan izaten dira gozagai. Antolatzaileek aurtengo edizioari nolabaiteko ezaugarri berezia eman nahi izan diote eta lortu dute beste behin ere xede hori gauzatzea. Izan ere, aurten, Donostiako beldurrezko zinema asteak, Universal produkzio-etxe arras ezagunak 30 eta 40ko hamarkadetan ekoiztutako beldurrezko film klasikoei gorazarrea egingo dio.
Rupert Julian-en "The Phantom of the Opera" (1925), Tod Browning-en "Dracula" (1931) edota Karl Freund-en "The Mummy" (1932) film klasikoak izango dira besteak beste, ikusgai Antzoki Zaharreko zine pantaila erraldoian. Euskal Herriko zinezaletu amorratuenak zuri beltzezko munstro klasikoekin beldurtzeko aukera aparta izango dute.
Bestalde, Fantasia eta Beldurrezko Zinema Asteak, ohikoa den bezala, egungo terrorezko zineari ere tarte zabala eskaintzen dio.
Horrela, Mike Mendez zuzendari estatubatuarrak filmatutako "The Convent" pelikulak irekiko du aurtengo edizioa. Mendez bera, Donostian izango da zintaren aurkezpenean eta bere azken lanari esker Erromako Fantafestival-ean lortutako publikoaren saria ekarriko du beso azpian. Komedia eta beldurra nahasten ditu Mendezek 84 minutuko film honetan eta aipatzekoa da Estatu Batuetako Sundance Film Festival-ean izan zuen harrera bikaina.
Sail Ofizialean Alemania, Korea, Txile, Estatu Batuak, Frantzia, Britainia Handia, Japonia eta Zeelanda Berriko 20 pelikularik adierazgarrienak izango dira ikusgai eta Zinema Astea Kang Je-gyu zuzendariaren "Shiri" filmak itxiko du. Akzio-zientzia fikziozko aipatu zinta Korean estreinatu bezain pronto, izugarrizko arrakasta lortu zuen, James Cameron-en "Titanic" filmak baino diru gehiago bildu zuelarik zine aretoetan. Je-gyu bera ere, Donostian izango da Estatu mailan egingo duen aurkezpenean.

Beldur generoak inoiz urrezko garairik izan baldin badu, sasoi hori 30 eta 40ko hamarkadetan kokatu beharrean gaude. Aitarik ere badu, izan ere, Estatu Batuetan Universal produkzio etxeak, gazte eta landu gabea zegoen generoa hartu eta izarrez josi zuen.
Izar haiek munstro bilakatu zituen Universal-ek, egun, munstro zaharkituak, ohikoak, betikoak, alegia, klasikoak. XXI.mendeak sarrakio garaikidea ezagutuko du, beldurraren ikuspuntu ezberdin bat, psikologikoagoa agian, ezkutuagoa, odoltsuagoa, teknikoki landuagoa. Nolanahi ere, hauek ez dute inoiz, Bela Lugosi, Boris Karloff edota Lon Chaney-k interpretatzen zituzten pertsonaien sentsualitate, misterio eta tentsio bera izango eta gogoz kontra baldin bada ere, onartu beharrean gaude, munstro klasikoen hatzaparretan jauzteko aukera franko dugula.
Fantasiazko eta Beldurrezko Zinemaren Asteak, aipatu Universal produkzio etxeak ekoiztutako lanak omendu nahi izan ditu aurten, eta garaiko bestelako 12 film emango ditu. Besteak beste, Rupert Julian, Paul Leni, Tod Browning, Edgar G. Ulmer, James Whale, George Waggner eta Rowland V. Lee-ren maisulanak izango dira ikusgai, konderik erromantikoena ezagutzeko parada izango da, momiaren mendekurik gupidagabeena, erailketa zentzugabeenak, mamu bakartienaren frustrazioak, otso-gizonik basatiena, hauek guztiek bestelako unibertso batean murgiltzeko aukera emango digute, Universal-en unibertsoan alegia.

David F. Friedman eta Herschell Gordon Lewis dute izena, bata produktorea eta bestea zuzendaria, bikote bereiztezina, hauen filmak ondorengo gore zinea definitu zuten. Horregatik, Zinema Asteko antolatzaileek, gorazarrea egingo die aurtengo edizioan.
"Color Me Blood Red", "2000 Maniacs!" edota "Blood Feast" filmeen egileek, 60ko hamarkadan beldurrezko zine produkzioa erabat iraultzatu zuten. H.G. Lewis eta David Friedman-ek gidoilari, efektu berezien arduradun, zuzendari eta produkzio lanak bikain burutu zituzten. B mailako zinearen bultzatzaileak, aktore talde finkoa mantentzen zuten beraien ekoizpenetan, besteak beste, Rodney Bedell, Jeffrey Allen, Jerome Eden, Bennie Moore, Thomas Wood eta Vicki Miles aktoreak ikus ditzakegu pare honen lanetan. Aurtengo edizioan aurretik aipatutako kultozko hiru filmak izango dira ikusgai.

Urtero legez, aurten ere, Fanzinen IV. Topaketa egingo da eta Estatuko 10 fanzine onenak lehiatuko dira publikoaren saria lortu asmoz. Horrez gain, Zinema Asteko antolatzaileek hiru erakusketa jarriko dituzte abian, bata, efektu bereziak lantzen dituen Colin Arthur-en omenez, Arthur-ek "Conan, the barbarian", "Alien" eta "The Endless history" filmetan hartu du esku, besteak beste.
Bestea, Filmax produkzio etxeko Fantasy Factory-ri eskainia dago. Jada, lehen emaitzak begibistan dira, "Fausto" zintan ikus daitekenez. Eta azken erakusketa M.A. Martin marrazkigilearen lanari eskainia dago, iaz Martinek, Italian, Europako marrazkigile onenaren saria jaso baitzuen.
Zenbait antzerki taldek Donostia ikaraz jantziko du, era guztietako munstro eta deabruak ikus ahal izango dira kaleetan barrena, kontzertuak ez dira faltako eta zazpi egunetan zehar Donostia festa beldurgarri batean bilakatuko da. Izutiek, debekatuta dute sarrera.