Baikor bezain arduratsu agertu dira Irulegiko Irratia, Gure Irratia eta Xiberoko Botza irratietako langile nahiz laguntzaileak Donapaleun bildu ondoren. Alde batetik, goraipatu dute azken urtean egin lana Plangintzaren sendotzeko, neurri desberdinak bideratu baitira, hala nola, 400 oreneko formakuntza sailaren garapena, erredaktore buru koordinatzaile lanpostuaren sortzea, Intranet sare baten plantatzea eta abar. Era berean, nabarmendu dute 1997-1999 artean ezarri plangintzak (lau oren amankomunean uhineratu, igandeak elkarrekin taxutu, formakuntza planaren abiatzea, tresnen digitalizazioa) azken urtean ukan duen indartzea. Horri segida eman nahian, urratsak ematea erabaki dute Baiona, Donibane Garazi eta Maule arteko erredakzio bakarraren alde. Irratietako langile eta laguntzaileen artean izan den gaztetzea ere nabarmendu dute. Baita Departamenduko Prefeturak azkenean Gazte Enpleguen txostena bideratzea onartu izana. Halaber, Mediametrie etxeak argira eman datuetan ageri denez, entzuleriaren kopurua bikoiztu egin da eta hiru irratiek inoiz baino entzule fidelagoak atxiki dituzte.
Bestetik, ezin ahantzi alde ezkorra ere badela. Gure Irratiak ez du baimenik jaso frekuentzia osagarrien bidez Hendaia, Azkaine-Urruña, Sara-Ainhoa eta Hazparne aldean diren entzumen ilunguneak estaltzeko. Gainera, Proiektuaren iraunkortasuna bermatzeko Hautetsien Kontseiluarekin hitz emaniko ahal gehigarriak ez dira oraino heldu. Horri lotua, dirulaguntzak, aldian aldiko laguntzak izateko partez, proiektuaren iraunkortasun politika batean sar daitezen eskatu dute. Emaniko urratsak beraz, aise ezabatu eginen dira, hizkuntza politiko orokor bat finkatu ezean. Horren kariaz, Euskal Irratiak elkarteak Deiadar kanpainarekin bat egin du ekainaren 10ean Baionan izanen den manifestaldian parte hartzeko, hizkuntza politika erabakiorra behingoz arautu dadin