Estatu Batuetan geroz eta jende gehiago bizi da trailerretan, atoia daramaten kamionetetan edo roulottetan. Lan merkatu amerikarra oso mugikorra da eta horrek eragina du bizimoduan.
Europan ez dirudi oso arrakastatsua izango denik, lurraren jabetza arautzen duten legeak zorrotzagoak baitira. Horren parekoak lirateke kanpina, jabetza anitza edo itsasontziak.

Gazteak etxetik berandu alde egiteak eta "squatter"okupa mugimenduaren gorakadak etxebizitza mota berria ekar dezake. Errentagarria izan dadin, zerbitzuak erdibanatzean legoke gakoa. Bizileku indibiduala txikitzen da, hoteleko gelen antzekoa delarik, eta sukaldea, garbitegia eta jangela handitzen dira, denek erabil ahal ditzaten. Familia bat ere bizi daiteke bertan, halaber, lagunak, artistak, gazteak edo adinduak. Alokairu sistemaren bitartez funtzionatuko lukete.

Izenak dioen bezala etxeak lurpean leudeke. EEBBetan halako eraikin bat egiten ari dira laborategi bat bertan ipintzeko. Ez dirudi Teletubby-en bizilekuen antzeko etxe hauek laster ikusiko ditugunik. Dena den, aipatu behar da lurpeko hiri bat, Alice City eraikitzeko asmoa dutela Japonian. "Seigarren pisuan bizi naiz" esaldia arraroa gertatuko zaio askori, baina agian laster izango ditugu lurpeko galeria komertzialak, bulegoak eta ospitaleak.

Estudioaren antzekoa da, baina ekipamendu teknologiko handiagoa du. Batez beste 30 metro karratukoa da, eta etxe hauetako erabiltzaileak gurasoen etxetik laster alde egin nahi duten ikasleak izan litezke. Adituen arabera, klase diruduna ere interesatua legoke, hirian daudenean operazio base gisa erabiltzeko