Euskal Herriko irakaskuntzan atzerriko hizkuntzek duten lekua zein den jakin nahi izan dugu. Ikasleek zein hizkuntza ikasten, zein urtetan hasten diren eta nolako maila lortzen duten galdetu dugu. Ikastola eta hizkuntz akademia ezberdinekin jarri gara harremanetan. Lesakako Tantirumairu Ikastola eta Alegiko San Juan Herri Ikastetxeetako arduradunekin hitz egin dugu. Hizkuntz akademien alorrean berriz Donostiako Inlingua eta Lacunza akademiekin.

Lesakako Tantirumairu Ikastolak 75 ikasle inguru ditu eta bertan Lehen Hezkuntza irakasten da. Ikastola honetan bigarren eta hirugarren hizkuntzak ikasten 8 urterekin hasten dira haurrak, hala ere 6 urterekin hurbilketa bat egiten da eta hizkuntza horretan joku eta abesti batzuk irakasten dizkiete haurrei. Hala ere badira hirugarren hizkuntza 4 urterekin irakasten hasten diren ikastolak, honi eleaniztasun goiztiarra deitu izan zaio. Hizkuntzak gero eta gazteago ikasi orduan eta aiseago ikasteko ahalmena omen du ikasleak. Hau jakinik, Tantirumairu ikastolak horrelako programa batean sartzeko eskaera egin du Hezkuntza Departamentuan. Irailean jasoko dute eskaeraren erantzuna.
Ikastola honetako irakasleen iritziz hizkuntzak txikitatik ikastea abantaila baino ez da. Hizkuntzak berarekin dakar kultura eta hau ezagutzeak pertsonak ikuspegi zabalagoa izatera bultzatzen du.
Haurrek hizkuntza bat baino gehiago ikas dezakete batera elkarren arteko interferentziarik gabe. Honela adierazi du Miguel Siguan adituak EHUk Donostian antolaturiko udako ikastaroetan.

D eredukoa den Alegiko San Juan Herri ikastetxea da hartu dugun beste adibidetako bat. Eskolaurrean ama hizkuntza gaztelera duten haurrei laguntza ematen diete euskararekin. Gaztelera ikasten, berriz, Lehen Hezkuntzako lehenengo mailan hasten dira. Ingelesa ikasten ere maila horretan hasi izan dira orain arte baina ikasturte honetatik aurrera haurrak 4 urterekin hasiko dira ingelesa ikasten.

Donostiako hizkuntz akademia honetan ingelesa, frantsesa, alemana eta atzerritarrentzat gaztelera erakusten dira. Dudarik gabe ingelesak biltzen ditu ikasle gehien (% 60), ondoren frantsesa (% 28), alemana (% 8) eta gaztelera (% 4) daudelarik. 18 urtez beherakoen artean, berriz, ikasleen erdiak ingelesa ikasten du eta laurdenak frantsesa, gainerako hizkuntzak ikaslerik gabe gelditzen dira.
Irakaskuntza metodoari dagokionez Inlingua akademiak bere metodoa du, beraiek «logico-estructural-global» deitzen dutena. Metodo hau ikastalde txikietan gauzatzen da eta ama hizkuntza ezberdinak dituzten ikasleak bilduko dituen metodoa denez, eskoletan, irakasten den hizkuntza da erabiltzen den bakarra. Hizkuntza orok lau ikasketa alor biltzen ditu bere baitan, ulermena, mintzamena, irakurmena eta idazmena. Akademia honek lehenengo biak azpimarratzen ditu; honetarako, ikasten ari diren hizkuntza jatorrizkoa den herrialderen batean denboraldi bat igarotzen dute.
Erabiltzen duten materil didaktikoa, besterik erabiltzen badute ere, gehiena beraiek sortutakoa da.
Inlingua akademiako zuzendari Stephen M. Cryan-en ustez atzerriko hizkuntzen irakaskuntzan ikastetxeen akatsak bi dira nagusiki. Batetik, ikastetxeetako ikastaldeak oso handiak dira eta horrela ezinezkoa da hizkuntzaren aipatu lau alorrak behar bezala sakontzea. Eta bestetik, curriculum edo programa bat bete behar dute, eta horrek ez du kontuan hartzen ikasleen gaitasun eta ikasketa erritmoa.
Adituek diotenez pertsona batek, ama hizkuntzaz gain, hizkuntza bat edo gehiago ezagutzen baditu erraztasun handiagoa duela hizkuntza berri bat ikasteko.
Hizkuntza bat ikasteko arrazoiak ugariak dira egun, arrazoi sozialak, kulturalak eta ekonomikoak. Akademia honetako zuzendariaren iritziz ekonomikoki hain garatua dagoen gurea bezalako herri batean lan mundurako hizkuntzak jakitea beharrezkoa da, baina ez da hau arrazoi bakarra.

Donostian 50 urteko historia duen akademia honetan ingelesa da erakusten den hizkuntza bakarra.
Urte garaiaren arabera ikasle kopuruak gora beherak izaten ditu, ikasturtean zehar, urritik ekainera alegia, 3.000 bat ikasle izaten dituzte. Udan berriz 600 uztailean eta 500 abuztuan.
Junkal Etxezarreta Lacunza akademiako arduradunaren ustez, Europako Batasunean sartzeak eragina izan du hizkuntzen ikasketan, ingelesean batez ere, hau baita hizkuntza internazional nagusia.
Ikastegi honetan 6 urterekin hasten dira haurrak ingelesa ikasten. Adin honetan gurasoak dira hizkuntza ikasten hastea erabakitzen dutenak. Aurrerago ordea, ikasleak dira hizkuntzen beharraz ohartu eta akademiara bere kabuz joaten direnak. Batzuk, ikasketen arabera, lanerako ikusten dute hizkuntzaren beharra, beste batzuk aldiz, bidaiatzeko erabiltzen dute. Hizkuntzak ikastera akademiatara joatea ohitura bihurtu da, ikastetxeetan ikasitakoa ez da nahikoa. Honetarako arrazoiak ezberdinak dira, badira ikastetxeetan erakusten zaiena baina gehiago ikasi bahi dutelako joaten direnak, baina baita eskolako azterketak gainditu ez dituztelako doazenak. Lacunza akademia Gipuzkoan Cambridge-eko azterketak egiteko baimendutako akademia bakarra da, eta azterketa hauek egin nahi dituztenak ere erakartzen ditu bere eskoletara.
Junkal Etxezarretaren ustez elebidunei argi eta garbi ikusten omen zaie hirugarren hizkuntza bat ikasteko erraztasuna. «