HAMARGARRENEAN «...ETA KITTO»RIK EZ

  • aldizkaria kaleratzen hasi zen. Orain, 30 lagunetik gora ari dira astekari bihurtu den agerkarian lanean. Euskara elkarteak ere izen bera du eta Interneten estreinatu dira aurten.

2021eko uztailaren 19an
Hamar urte igaro dira dagoeneko 1988ko abenduan «...eta kitto!» aldizkariak bideari ekin zionetik. Eta hamar urte hauetan bide hori zabalduz joan da aldizkariko kideek eginiko lanari esker.
Hasieran Eibarko Udaletxeko euskara zerbitzuak izan zuen aldizkariaren ardura eta proiektua aurrera atera ahal izateko herriko zenbait gazterekin hitz egin ondoren hasi ziren lanean tabloide formatua izan zuen aldizkarian. Izenaren bila zebiltzala Eibarko alkate izandako Mikel Larrañagak euskara bultzatzeko asmoz kanpaina baterako egin zuen bandoa etorri zitzaien gogora, «...eta kitto!» hitzekin bukatzen zen bando ezaguna. Hasierako aldizkari hura hilabetekaria zen eta banaketa kiosko, taberna eta abarretan egiten zen, hala nahi zuen eibartar orok egunkariarekin batera jasotzeko aukera zuelarik.
Hamar urtetako ibilbidea ez zuten batere gaizki hasi; aldizkaria kaleratu eta urtebetera «...eta kitto!»k Rikardo Arregi kazetaritza saria jaso baitzuen.
1991. urtean lau orrialde besterik ez zituen aldizkariari bigarren pliegoa gehitzen zaio, gazteen gaiak, kultura eta kirola indartzeko asmoarekin eta honekin batera lehenengo aldiz koloretan inprimatuko da. Hemendik aurrera aldizkarian berrikuntza eta hobekuntzak bata bestearen atzetik etorriko dira. Izan ere, urtebete beranduago, 1992an, udaletxeko euskara zerbitzuak sortu berri zen ...eta kitto! euskara elkarteari emango dio aldizkaria aurrera ateratzeko lekukoa. Une honetan, elkarteak 549 bazkide ditu baina 10. urteurrenarekin batera bazkide kanpaina berri bat jarri dute abian. Elkarteak lekukoa hartu eta proiektuaren garrantzia ikusirik, apustu handiago bat egiten du, hilabetekaria hamabostekari bihurtzea, alegia. Hamabostekari bihurtzearekin batera aldizkariari itxura aldatzen zaio, formatu txikiagoan kaleratzen da eta orrialde gehiago eransten zaizkio. Bestetik, eta aldizkaria eibartar guztiengana helarazteko asmoz, lehen kioskoetan eta tabernetan aurki zitekeena hemendik aurrera eibartarrek etxean jasotzen dute. Honetarako aldizkariak hamar bat pertsonaz osaturiko banaketa talde bat du eta talde hau arduratzen da aldizkaria etxeetara eramateaz.
1993. urteko tirada 6.000 alekoa zen eta urte hartan egin zen azterketa soziologiko batek zioenez, irakurleak 14.000 inguru ziren. Ziren esan behar da, egun 24.000 irakurle baino gehiago izatera iritsi baita eta tirada 7.100 aletakoa.
Berrikuntza hauek egin eta urte pare batera apustua handitu eta 1994ko maiatzaren 13an «...eta kitto!» astekari bihurtu zen. Honetarako beharrezkoa den tresneria guztia erosi, eta honela aldizkariaren lan prozesu guztia, inprimaketa izan ezik, elkartean bertan egitea lortzen da, gaur egun duen itxura emanez.
Aldizkariaren egoitza Eibarko Errebal kaleko Merkatu plazan dago, 3. pisuan. Hamar urte hauetan aldizkariak egoitza ezberdinak izan ditu eta oraingoa hamargarren urteurrenarekin batera iritsi da, iazko abenduan estreinatu baitzen.
Aldizkariko lan taldea 30 bat lagunek osatzen du; erredaktoreak, argazkilariak, euskara zuzentzaileak, maketatzaileak, kolaboratzaileak eta banatzaileak. Hamar urte hauetan lan taldea handituz joan da, izan ere, hastapenetan bost kazetari, koordinatzailea eta bi argazkilari baitziren aldizkaria egiten zutenak. Aldizkariaren prozesuaren azken pausoa Oñatin ematen da, hango Gertu kooperatiba baita «...eta kitto!» inprimatzen duena.
Eibarko aldizkaria kaleratzeko behar den dirua bide ezberdinetatik lortzen dute. Aurrekontuaren zatirik handiena aldizkarian agertzen den publizitateak ematen du, baina hau nahiko ez denez, beste bide batzuk ere jorratzen dituzte, dirulaguntzak eta elkartearen aktibitateak, hain zuzen.


«TXIKITTO!» ETA «KIROLKITTO!».

«...Eta kitto!» aldizkaria kaleratzeaz gain, proiektu honetako kideek beste zenbait lan ere egiten dute. Duela hiru urte 8tik 12 urtera bitarteko haurrentzat «Txikitto!» hilabetekaria kaleratzen hasi ziren ikastetxeekin elkarlanean. Kirolaren inguruko «Kirolkitto!» ere kaleratzen dute, baita liburuak eta ale bereziak ere. Gainera, eta idatzira mugatu gabe, bi irratsaio ere egiten dituzte, bata Eibarko Radio Estudion eta bestea Arrate Irratian.
Honetaz gain, eta hamargarren urteurrena ospatzeko web orri bat (www.jalgi.com/topagunea/etakitto/) zabaldu dute Interneten. Web orri honetan hasi berriak diren arren, aurrera begira artxibo moduko bat sortzea da asmoa. Honetaz gain, besteren artean, agenda eta aldizkariaren eta elkartearen berri aurki daiteke.
Aldizkariaren hamar urtetako ibilbide honetan hobekuntzak etengabe gertatu arren, aurrera begirako asmoak ere badituzte aldizkariko kideek.
Lau orrialde gehiago eransteko asmoa dute, aldizkariari atal berriak gehitu ahal izateko eta gazteei tarte handiagoa eskaintzeko. Irakurleei ere tartetxo bat egin nahian «Toc, toc ...aurrera!» izena jarri dioten atal bat zabaldu dute, bertan irakurleak bere kezka eta zalantzak ezagutzera emateko aukera izango duelarik.
Bestetik Ermuko «Drogetenitturri» hilabetekariarekin elkarlanean hasiko dira, gai konkretuen inguruan gehigarriak kaleratzeko asmoz


Azkenak
2024-06-25 | Gedar
Desokupazio-enpresa batek su eman dio Tenerifeko Maizterren Sindikatuaren lokalari

Besteak beste biltegi modura erabiltzen dute lokala, oinarrizko hainbat material jasotzeko eta beharra duten pertsonei emateko. Aurretik ere izan dira desokupen mehatxuak.


EuskarAbentura hasteko astebete

Uztaila hasteko astebete falta da, astebete falta da Euskarabentura abiatzeko. Asier Guantes izan dugu telefonoaren beste aldean, espedizioko xerpa, begiralea.


Igari eta Bidankoze arteko errepidea eraiki zuten frankismoaren esklaboei omenaldia egin diete

1939 eta 1941 bitartean Igari eta Bidankoze arteko errepidea eraikitzera behartu zituzten frankismoaren 2.400 esklaboak omendu zituzten larunbatean, Igariko gainean. Errepresaliatu antifaxista haien memoriak gure bidea izan behar duela aldarrikatu zuten omenaldia antolatu zuen... [+]


2024-06-25
Pantxoa Etxegoin
“Euskararen diagnostiko bateratu bat erdietsi nahi dugu Iparraldean euskara biziberritzeko”

Euskararen biziberritzea Ipar Euskal Herrian jardunaldia antolatzen du ostiral honetan Baionan Euskaltzaindiak. Euskararen alde egiten dena eta ez dena eztabaidatzeko mementoa izango da. Eragileak eta politikariak bilduko dira egun osoan.


Eguneraketa berriak daude