BARNE-BATEGITETIK MUGAZ GAINDIKO KONTZENTRAZIORA

  • sortarazi du. 1998a historikoa izan bazen ere, 1999ak bategite berri askorekin ekin zion. Horiek ez dira gainera azkenak izango, prozesua geldiezina izango dela aurreikusten baita.

2021eko uztailaren 20an
Urte berriak Espainiako lehen megabanketxea sortzea ekarri du: BSCH. Ia aldi berean, Frantzian, Societé Générale (SG) eta Paribas banketxeen bategitea iragarri zen. SG Paribas erakunde berria Europako hirugarren bankurik handiena da, eta aktiboz munduko laugarrena. Banku berri honen aktiboak 4,5 bilioi liberakoak dira (679.000 milioi euro). Gertakari hauek biek banketxe bategitearen gaia mahaigaineratu dute, bere lehiakideei gauza bera egiteko bidea irekiz.
Gaur egungo bategiteak Estatu bereko banketxeen artekoak badira ere, akzio trukeak eta atzerriko banketxeekiko aliantzak kontzentrazio transnazionala ari dira prestatzen. Testuinguru horretan, ez da harritzekoa Barclays banketxeko exekutibo goren Martin Taylorrek Ameriketako hiru bategite erraldoiren berri izatean, bere kide europarrei esandakoa: «

elkarlanean jardun ala desagertu
».


Prozesu geldiezina

BBV izan da azken hilabeteotan banketxe sisteman bategite prozesu handia iragarri duena. Hori dela-eta, BS eta BCHren bategitearen ostean, beraiek ere horrelako zerbait egitekotan dira, nahiz eta agian ez duten Botin eta Amusategik bezala jokatuko.
BBV-ko kontseilariorde Pedro Luis Uriartek dioenez, euroa agertzeak eta Estatu arteko mugak desagertzeak barne merkatua hamaika bider handitzea esan nahi du. «

Horren ondorioa, handi ginenok txiki sentituko garenez, kontzentrazioen areagotzea izango da. Bategite, erosketa eta aliantzen ildotik europar finantza sistemaren berregituraketa osoa gertatuko da
».
Espainiako Banketxe Pribatuen Elkarteko lehendakari Jose Luis Leal ere iritzi berekoa da; bere ustetan, datozen urteetan lauzpabost finantza talde handi baino ez dira egongo Europan. Hortik Estatu bereko banketxe eta finantza erakundeen bategitearekin hasi dena kontzentrazio transnazionalean amaituko delako aurreikuspena.
Europako bategite prozesua, analisten hitzetan, Estatu Batuetan duela bost urtetik hona ematen ari denaren antzekoa izango da, baina eragile desberdina izango du. Izan ere, EEBBetan 1994an Estatu desberdinen arteko zabalkundea debekatzen zuen legea baliogabetzea izan zen arrazoia. Europan berriz, Europako Moneta Batasuna.
EEBBetan bategite eragiketa gehienak adiskidantzazkoak izan dira, negoziatuak. Zati txiki bat baino ez da erosketa bidez egin. Aurreikusteko modukoa da Europan gauzak antzekoak izatea. BS eta BCHren bategiteak eta Frantzian sortu berri den SH Paribas banketxeak tesi hori egiaztatzen dute, ez baitago gaur egun horrelako erosketak egiteko adina kapitalik.
Estatu Batuekiko desberdintasuna kontzentraziorako plantila murrizketak dakarren gastuari aurre egin behar izatea da. Izan ere, Europan askoz ere zailagoa eta garestiagoa da langile bat kaleratzea. Hori litzateke, analista batzuen esanetan, Europan banketxe kontzentrazioa astiroago joatearen arrazoietako bat. Baina prozesua geldiezina da jada.
Euskal Herrian prozesu hori duela hamar urte abiatu zen, orduko Banco Bilbao eta Banco Vizcayak BBV sortu zutenean. Aurrezki kutxen kasuan berriz, Euskal Herrian ere izan ziren duela urte batzuk kontzentrazio eragiketak, EAEko lurralde bakoitzeko bi kutxek bat egin zutenean, Bizkaian BBK, Gipuzkoan Kutxa eta Araban Vital kutxa eratuz. Nafarroako bi aurrezki kutxak, NAK eta IUAK, prozesu horretatik at geratu ziren, baina orain lehen pausoak ematen hasi dira.
Ez dirudi, ordea, kontzentrazio prozesua herrialde edo Estatu bakoitzeko muga barruan geratzera doanik. Beraien artean jada bat egin duten banketxeak kontzentrazio transnazionalerantz eramango dituzten aliantza berrien bila ibiliko dira. Litekeena da hori lortuko duen lehen banketxea BBV izatea

BSCH-ren sorrerak BBV bigarren postura darama
Banco Santander Central Hispano banketxe berriak lehen postua eskuratu du Hego Amerikako banketxeen artean, orain arte lehen postu horretan zen BBV bigarren mailara eramanez. BSCH eta BBV dira orain Hego Amerikan atzerriko banketxerik garrantzitsuenak, partaidetza eta kreditu kontrolari begira Citibank eta Boston Bank estatubatuarrak, eta ABN-Amro holandarra atzean utziz.
BCH eta Santanderrek Hegoamerikan dituzten aktiboak 7,5 bilioi pezetakoak dira, eta BBV-renak 10 bilioira iristen dira ia. Nolanahi ere, bertako finantza erakundeen partaidetzari begira, 620.000 milioi pezetara iristen da BSCH berria, BBV-ren inbertsioak 577.000 milioi pezetakoak direlarik.
Banco Santander Central Hispanok erakunde filialen 1.755 bulego eta banketxe elkartekideen beste 2.500 izango ditu. Guztira 50.000tik gora langile izango ditu Txile, Argentina, Uruguai, Paraguai, Brasil, Venezuela, Kolonbia, Peru, Bolibia, Mexiko eta Puerto Ricon banatuak

Megabanketxe berria industri potentzia ere bada
Banco Santander Central Hispano (BSCH) megabanketxe berriak 39 bilioi pezetako aktiboak ditu, 6.400 bulego Espainian eta beste 2.000 Espainiatik kanpo, eta guztira 106.000 langile. Beraz, aktibo bolumenaz Europako hamargarren banketxea da, eta Hego Amerikako lehen finantza taldea.
Banketxe berri honen ezaugarrietatik agian ez da behar adina azpimarratu bere baitan duen industri ahalmena. BSCH Espainiako industri talde handienen artean kokatu behar da, energia, telekomunikazio eta eraikuntza sektoreetan duelarik partaidetza nabarmenena. BSCH berriak kontrolatzen dituen edo hein batean bereak diren enpresen artean honako hauek ditugu: Cepsa (% 8,15), Endesa (% 2,9), Unión Fenosa (% 9,9), Dragados (% 18,9), FCC (% 2,9), Vallehermoso (% 26), Airtel, Campofrío (% 3), Aceites y Proteínas (% 22,3), Acería Compacta de Bizkaia (% 22,3), Técnicas Reunidas (% 37), Zeltia (% 12) eta Aguas de Valencia (% 16,3). Horiek lirateke BCHren industri partaidetza nagusiak. Banco Santanderrek, bere aldetik, honako industri partaidetzak ditu bere esku: Telefónica (% 3), Cableeuropa (% 26,9), Túnel de Soller (% 14,4), Estacionamientos Subterráneos (% 12,1), Industrias Químicas Textiles (% 48,7), Unión Resinera Española (% 18,2), Superdiplo (% 25) eta abar.
Aktibo hauetako gehienak (332.000 milioi pezetatan zenbatuak, 1.995 milioi euro) BCHkoak dira, zeinak 248.653 milioi pezetako industri partaidetzak zituen 1997 amaieran.
Bategite honen ostean aintzakotzat hartzeko beste kontu bat banketxe hauek biek, bat eginda, Espainiako komunikazio alorrean izango duten garrantzia da. Bigarren komunikazio taldea da orain BSCH Espainian, Airtel, Antena 3, UNI2, Retevisión eta Telefónican baititu partaidetzak. Bategitearekin, Antena 3eko lehen akzioduna izango da, eta Banco Santanderrek Telefónica eta UNI2n zituen partaidetzak BCH-k Retevisión eta Airtelen zituenei batzen zaizkie


Azkenak
Ekofeminismoaz, motozerra eskutan

Duela hilabete inguru, unibertsitateko kide gizonezko baten liburu aurkezpenean ginela, egoera bitxi samarra gertatu zitzaigun. Ekologiari buruzko liburua zen eta erreferentzien artean hainbat pentsalari ekofeminista zeuden. Egileak, baina, inongo momentuan ez zuen aipatu... [+]


2024-06-17 | Jakoba Errekondo
Udaberria jan dezagun mikatzetik

Arabako Errioxako udaberriak ez dauzkat ahazteko. Urte dezentetan harrapatu ditut sasoi horretako loraldi betean hango mahastiak eta harrigarria da; laburra da paisaia berria, baina iraupen motz horretan begien sabaia erretzen du eta ordura artekoak ahantzarazten.


2024-06-17 | Nagore Zaldua
Itsas dortokak lozorrotik esnatu ote dira euskal kostaldean?

Udako solstizioa gerturatzen ari den honetan, euskal kostaldean itsas dortokak ikusteko aukerak ugaritu dira. Gure uretan ezagunena Egiazko kareta (Caretta caretta) da. Ale helduen oskolaren batezbesteko tamaina, 120 cm-ko luzera zuzenera eta 200 kg-ko pisura irits daiteke... [+]


2024-06-17 | Garazi Zabaleta
Lurbizi
Lurraren bankua sortzen, nekazaritzarako oinarrizko baliabidea bermatzekoa

Oiartzunen nekazaritza bultzatzeko eta elikadura burujabetzarako bidean pausoak emateko sortu zen Lurbizi egitasmoa, 2016 urte inguruan. “Herritar talde batek denbora zeraman herrian nekazaritzaren eta lehen sektorearen egoera kaxkarraz hausnartzen”, adierazi du Ibon... [+]


Eguneraketa berriak daude