SEGURTASUN ARRAZOIEK ZANPATUTAKO BIZITZA


2021eko uztailaren 21an
Hilaren zazpitik aurrera etxean da Esteban Esteban Nieto euskal preso ohi tolosarra. Maite dituenen artean maitasuna dastatuz, emanez eta jasoz. Noiz arte? Galdera ikur mingarria. Minbizia erabat zabaldua du eta medikuen esanetan gaitzak ez du konponbiderik. Askatasunaren une gozoa etorkizun krudelaren mingoztasunaz nahasten da 12 urtez Espainiako kartzeletan preso egondakoaren barrenean.
Gose greba behintzat –beste bat– saihestu dute, hilaren 7an askatu zuten eta askatu izan ez balute iragan igandean, hilaren 11an, gose eta egarri grebari ekingo zion bere bizitzaren azken maldarako duintasun eske.

«Erabaki irmoa zen eta zegoen egoeran epe oso laburrean joan zitekeen»,
diosku Usoak, bere arrebak.
Nekatuta egon arren, ez zuen ongi lo egin espetxez kanpoko lehenbiziko gauean. Hurrengo egunean kalera, alabaina, askatasunari kosk egitera. Txango bat eman. INEMera joan, langabetuen zerrenda gizentzera. Autoa gidatzeko agiria berrateratzeko gogorik ere ez da falta. Bizitzeko gogoa da falta ez dena, noiz eta orain, medikuek hilabeteetako bizitza iragarri diotenean. Galderak tropelean pilatzen dira eta erantzun asko Espainiako Espetxe Erakundeetara begira da, Espainiako Gobernuak euskal presoekiko agertzen duen jarrerari so.


DISPERTSIOAREN ERRUA.

Esteban Esteban Nieto kalean izan balitz ez zuen minbizirik izango? Batek daki. Medikuek berak nahi bezala aztertu izan balute minbizia saihestu ahal izango zuen? Batek daki. Argi dagoena da, behin eta berriro egin beharreko azterketak atzeratu izan ez balira gero erraietan erabat zabaldu zaion minbiziaren aztarnak agertu izango zirela akaso. Aukera hor zegoen eta espetxetik espetxera ibili izanak bere gaitzak aztertzea ukatu du.
1994an hepatitis C zuela jakin zen eta bi urte geroago, 1996an, pankreatitis agutua izan zuen; Cadizeko Puerto Realeko ospitaleko urgentzi sailean bi aste iragan zuen. Behazun zizkua harriz betea zuela eta kendu egin behar zitzaizkiola esan zioten. Baina alta eman eta Salto del Negrora trasladatu zuten, Kanarietara. Esteban Nietok, ordea, ez zuen nahi Gran Kanarian ebakuntza egitea; kontroleko ekografiak bai egin behar zizkioten, baina egin beharreko atarian Valdemorora eraman zuten epaiketa bat tarteko. Valdemorotik Puerto Iera (Cadiz), berriro Valdemorora eta, azkenik, iazko gabonetan 21 irletatik eta Ceuta eta Melillatik penintsularatu zituztenean, berriro Puerto Iera.
Horrela ibili zuten iaz eta espetxe bakoitzean ekografia hori egiteko denborarik gabe, honen tramitazioak denbora eskatzen baitu. Horrez gain, espetxetik ospitalera joateko eguna beti ezezaguna da presoarentzat. Arrazoia?: «segurtasun neurriak», espetxe munduan eta haien inguruan mugitzen direnentzat gaindiezineko harresi ikustezin bezain arbitrarioa.
Aurtengo urtarrilaren 4an bularrean min sakona zuela eta ospitalera eraman zuten eta endoskopia bat egin behar zuela esan zioten. Bestetik, apirilaren 8rako jarria zuen ekografia ospetsua martxoaren 24ra aurreratu zioten eta orduan agertu ziren irudi tumoralak. Ospitalean ingresatua geratu zen, emaitzen zain. Baina gaitzak itxura oso txarra zuen.

«Larunbatean, 27an,
–dio Usoak–

ospitalera bisitan heldu ginenean medikuek argi esan ziguten emaitza ofizialen zain zeudela baina 5 organu hartuak zituela».
Diagnostikoa: «Metastasi anizkoitza birikietan, gibelean, glandula suprarrenalean, adenopatia (gongoilak eraginduak dituela), sabelean eta retroperitonean (sabelaren atzekaldea), barea eta area handituta. Ezin da aurkitu zein den minbizi primarioa. Ez du tratamendurik eta bizitzaren iraupena sei hilabetetik beherakoa da». Geroak esango du, baina gorrarra bezain erreala.
Ospitalean ezin zen ezer egin eta alta eman zioten baina Puerto Ien ez zuten nahi horrelako gaixorik espetxean eta, ospitalarekin han gera zedin negoziatu zuten. Lau egun gehiago egin zuen Estebanek ospitalean, gero alta boluntarioa hartu zuen. Espetxean erizaindegira eraman zuten eta han egon da Iñaki de Juanarekin batera askatu duten arte. Hori bai, Auzitegi Nazionaleko Fungairiño fiskalaren ikuspuntuaren aurka, honen ustez presoaren gaitza eta espetxea bateragarriak baitira. Itsaso Idoiaga bere konfiantzazko medikua ere hilaren 6an abiatu zen Cadizera, baina Espetxe Erakundeetako baimen barik –«segurtasun arrazoiak»– nahiz, azkenean, espetxe zaintzarako epaitegiak baimena eman zion. Konfiantzazko mediku baten bisita ukatzen denetik –espetxe arautegiak baimentzen du– presoen osasun eskubidea bortxatzen da. Galdera ugari da airean eta erantzukizunak ere bai

Tratamenduaren zain dauden presoak
Kepa Miner Aldabalde.
Hernaniarra da eta Caceres Ien dago. Arnas gutxitasuna du eta berez 92. artikulua (gaitz larriagatik kaleratzeko indarrean jartzen dena) eskatzeko moduan dago. Trasladoa eskatu du Martutenera baina Barne Ministerioak ukatu egin dio eta Alcala IIra trasladatzea eskaini dio.

Jose Antonio Fernandez Hernando.
Santurtziarra da eta Puerto I espetxean dago (Cadiz). C motako hepatitisa du eta tratamendua irailean jarri behar bazitzaion ere, oraindik zain dago.

Koldo Aparicio Benito.
Ugaokoa da eta Soto del Realen dago. Sudurreko ebakuntzaren zain urtebetez. Kaledoskopia (diagnosia egiteko froga bat) bat egiteko ere beste urtebete zain dago. Basaurirako trasladoa eskatua eta ukatua.

Josune Onaindia Susaeta.
Muxikarra da eta Valladoliden da. Nerbio kubitalaren (ukondotik pasatzen den nerbio bat) zanpaketa du. Ebakuntza behar du. Langraitzera eskatu du trasladoa baina ukatu egin zaio.

Enrike Letona Biteri.
Arrasatearra da eta Murtzian dago. Orkatila bihurritua du eta bihurria behin eta berriro agertzen zaio (gazteleraz `esguince recidivante'). 95ean ebakuntza aholkatu zioten eta 98ko ekainaz geroztik ebakuntza egiteko zain dago. Martutenera trasladoa eskatu du eta ukatu egin zaio.

Raul Alonso Alvarez.
Bilbokoa da eta Puerto Ien dago. Aurrekoaren kasu berdina da eta ebakuntzaren zain dago. 98ko azaroan Basaurira trasladoa eskatua eta oraindik ez du erantzunik jaso.

Julen Perez.
Cadreitakoa, Valladolideko espetxean dago. Prostataren hipertrofia eta puxikaren hipertrofia ditu. 98ko abuztutik ebakuntzaren zain. Iruñera trasladoa eskatua eta ukatua.

Koro Egibar Mitxelena.
Donostiarra da eta Almerian dago. 1992an tinpanoplastia bat egin behar zioten (tinpanoa zulatua dagoelako ebakuntza) eta urte hauek guztietan zain dago. Tarte honetan hamalau otitis izan ditu eta entzumena ere galdu du. Trasladoa eskatuta Martutenera baina ukatua.

Jesus Mari Mendinueta Flores.
Sakanakoa da eta Malagan dago. Hernia inginala (izterrondoan) eta hernia diskala ditu. 1997tik ebakuntzaren zain dago. Trasladoa Iruñera eskatua eta ukatua.

Mikel Azurmendi Peñagarikano.
Beasaindarra da eta Sevillan dago. Iaz Sevillan atxilotu zutenetik oinean mina du eta espetxeko medikuak erradiografiak behar dituela esana du baina Auzitegi Nazionaleko fiskaliatik ez zaio baimenik ematen


Azkenak
Armada sionistak “geldialdi taktikoak” hasi ditu Gazako errepide nagusian, Netanyahuren iritziaren aurka

UNRWAk salatu du erasoek jarraitzen dutela Rafah-n eta ez direla aldatu operazio militarrak. Netanyahuk gerra kabinetea desegin du, dimisioen ondorioz.


2024-06-18 | ARGIA
Frantziako 200 kirolarik manifestu bat sinatu dute eskuin muturraren kontra

L'Ëquipe kirol egunkariak argitaratu du manifestua igandean. Besteren artean, Jo-Wilfried Tsonga eta Marion Bartoli tenislari ohiak eta Marie-José Perec atleta ohiak daude sinatzaileen artean.


21 urteko fisioterapeuta bat atxilotu dute Bilbon, emakume bati sexu erasoa egitea leporatuta

Atxilotuak astelehen goizean, ekainaren 17an, egin zuen sexu erasoa, pazientea belauneko lesio batetik artatzen ari zela, emakumeak salatu duenez. Atxilotua ertzain-etxera eraman zuten eta aske utzi zuten, Bilboko Guardiako Epaitegiaren esku geratu ondoren.


2024-06-18 | Mikel Aramendi
ANALISIA
Benetako espioia ote da ba Ewan Gerxkovitx kazetari estatubatuarra?

Errusiako epaileek leporatzen diote, besteak beste, Armata errusiar tanke modernoenaren ekoizlea den Uralvagonzavod enpresako dokumentu klasifikatuak gainean zeramatzala harrapatu zutela. 20 urteko zigorra jaso dezake. Baina benetako espioia ote zen? Zoritxarrez, ezetz esango... [+]


Eguneraketa berriak daude