Gizartea
Ingurumena
Politika
Ekonomia
Kultura
Euskara
Feminismoa
Hezkuntza
Nazioartea
Iritzia
asteartea 2024ko apirilaren 30an
ANDONIREN FORMULA HOBETUA
Zarata atera gabe ekin zioten bideari; apal apal. Eguerdi partean hasieran, gaueko 11etan gero. Zeharo berandu zela ikusita, azken aldian «Gaur Egun»aren ondotik finkatu dute. Ordutegi horretan saioak zeinen erraz sortu eta kentzen diren jakinda, emeki-emeki saioa sendotzen joan da;
«Gure sekretua horretan datza, espektatibarik gabe sortu izanagatik egiten utzi digute
» –azaltzen digu Elixabete Garmendia saioko zuzendariak–
Gure abantaila zapaltzen dugun eremua nahikoa ongi ezagutzea da; eta horrek ziurtasun handia ematen digu jokua zerk ematen ahal digun jakiteko».
Ikusleekin dexenteko harremana lortu dute, Andoniri darion hurbiltasunaz aparte, erreportaje landuak direlakotz.
«Nolanahi ere, zuzeneko ezagutza da gurea, badakigu zein publiko daukagun, eta entusiasmo ukitu hori ez da gezurra, erreportarien jakinmina benetakoa da»
gehitzen du.
ETORRI OHOLTZARA.
Egun, laugarren denboraldiaren erdian daudelarik, eta 40 minutuko iraupenari eutsiz, zenbait berrikuntza sartuko dute, itxuraldaketa baino osagarri gisa hartu daitezkeenak. Nahiz eta orain arteko txokoa bere horretan mantendu, gune berria zabalduko da, kafe antzokiaren tankerako oholtza, «people show» gisakoa bihurtu nahian. Bertan, emanaldi artistikoak ez ezik, mota guztietako erakustaldi eta aurkezpenak ere eginen dira. Elixabeten esanetan,
«oso leku funtzional eta balioanizduna da; izan ere, gu trastezaleak garenez, denetarik sartuko dugu; alegia, poetak, antzezleak, piraguista bat bere piraguarekin, eta abar»
.
IKA-MIKA GEHIAGO.
Bestalde, solasaldiak molde «liskartsuagoa» hartuko du. Binaka etorriko diren pertsonaia ezagunak izango dira, kirol, kultura eta farandula mundukoak, elkarri mokoka aritu gabe ere iritzi kontrajarriak emango dituztenak. Halaber, egunean eguneko martxa, asteburu oparoak barne, hurbilagotik jarraitu ahal izanen da, hiru erreportari gehiago arituko baitira bazterrak harrotzen. Orain arte ENG (kamera mugikorra) bakarrik bidaltzen bazen ere, orain kazetaria joango da erreportajea taxutzera.
«Aisialdiko ekintza ugarien berri emango dugu. Demagun mundu guztia aztoratua dabilela gasolinaren prezioa igo egin dutelako, ba horri helduko dio kazetariak. Edota maiatzeko jaunartze eta ezkontzak direla, kontuan hartuta larunbat arratsalde batean zenbat ezkonberri egoten diren argazkiak ateratzen, ba haiengana hurbilduko da»
.
BIZKAIERATZEN.
Zuzenean bailitzan egiten da programa, «denbora errealean», alegia; nahiz eta arratsaldeko 6etan grabatu, zuzenean ikusten ari garela dirudi. Hain zuzen, toki berean egindako erreportajeak dira; hau da, ez dago ondorengo testurik sartu beharrik irudiak hornitzeko. Beraz, zuzeneko estilo horri atxikiz, aro berri honetan erreportaje gehiago sartuko dituzte, elkarrizketek baino hobeki funtzionatzen baitute nonbait. Ildo horretan, orain arte saioko itzalgune izan den Bizkaia puntatik puntara agertaraziko da.
«Lantaldeko gehienak gipuzkoar edo nafarrak ginenez, Bizkaiko gaiei ez genien merezi bezalako arreta ipintzen. Orain berriz, lantaldea orekatu eta horri esker Bizkaia beste eskualdeak adina izango dugu mintza eta ikusgai».
EZAGUNEN GALERIA.
Berrikuntza modura, Euskal Herriko jende ospetsuaren galeria osatuko da, haien alderdi ezkutua azalduz. Garmendiaren irudiko,
«gero eta jende ezagun gehiago dago euskaraz mintzo dena. Lehen euskaldun ospetsu bakarrak bertsolari eta Euskaltzaindiakoak ziren. Orain zorionez, ezagunak askoz anitzagoak dira, gizartearen arlo guztietan nonahi ditugu aukeran»
Aurpegi publikoa eta bizitza pribatua uztartuko dira txoko honetan. Txutxumutxurik gabe, baina bai jakinmina piztuz; esaterako, Josu Jon Imaz EAJ-ko bozeramalea arrautza frijituak egiten ikustea, eta abar. Halaz ere, saiakera berezia egingo dute gehienbat emakume ezagunak ager daitezen,
«kristalezko sabaiak oraindik hor dirauelako»
. Galeria hori osatzearen ardura Nerea Iriarteren esku egongo da. Halaxe, estudiora Iñaki Leturia eta Kristina Urrutia ohiko kazetariak baino maizago jaitsiko da baina aurkezle izan gabe.
INTERNETEN IRRISTATZEN.
Aipatu kontuez gain, beste hiru txoko berezi izango ditugu; hala nola: zinema estreinaldien errepasoa irudiz hornitua, lehiaketa berritua eta Internetari eskainiko dioten tartea;
«Kurtso hasieran posta elektroniko bat jarri genuen, ea zer gertatzen zen, baina garrantzirik eman gabe. Hara non orain mezuak purrustaka iristen zaizkigun»
. Hori ikusita, zerbitzu modura eta aditua izan gabe, Oihana Elortzak Internet miatuko du aipagarri den zernahi atzemateko.
TITIRITERO IZAERA.
Haize freskoa ematearren edo, Donostiako Aquarium eta Durangoko azokatik egin izan dute saioa; berriki Arantzatik eman dute, bertan euskararekiko dagoen jarreragatik. Emisioa gauzatu ahal izateko ia hogei teknikari aritzen badira ere, merezi du, saio askoz epelagoa ateratzen delako.
«Esperientzia polita da, jendeari ilusioa egiten dio, eta ez diogunez txalorik eskatzen, somatzen den giroa bene-benetakoa da
». Titiritero fazeta horrekin jarraiki, kurtso honetan beste bisita batzuk aginduta dauzkate.
IKUILU ETA HIRIAN EROSO.
Gauza franko leporatu izan dizkiete. Onak bistan dira; txarrak ere ez dira falta. «Agrogeriatriko» deitu izan diote saioari. Garmendiak erdizka onartzen du hori: «
Egia da baserri girotik abiatu ginela. Alde batetik, izadia eta ohiturak biziki maite ditugu, etnografia, azken finean. Hasiera batean asko egin genuen horretatik, bai, harrera ona jasoz ordea. Bestetik, hizkuntzak dexente mugatzen gintuen
». Denboraren poderioz ordea, euskara hirian gero eta erosoago dagoela nabaritu dute. Kontuak kontu, hirian barrena behiak jezten bezain aise mugitzen dira,
«orain lotsagabetu egin gara zentzu onean»
diosku Elixabetek.
AKABO ILUNALDIA.
Horren haritik, hemengo egoera kinka hitsetan zegoela, zuriegi jokatu izana egotzi izan zaie. Azken hilabeteotan bizi dugun giroak aldiz, gauzak onera aldarazi ditu. Halaxe, saioak ere horren ispilu izan nahi luke, alderdi alaiak nahiz serioagoak tartekatuz, beti ere ezeren aurrean makurrarazi gabe.
«Garai batean gatazka oso gaiztotua zegoela, nahita saiatzen ginen euskal munduan egon zitezkeen gai «zuriak» plazaratzen, nolabait arantzatik ihesi. Orain, gauzak pixka bat baretu direla, lehen ukitzen ez genituen gizarte eta politika arloei ere lotu gatzaizkie. Distentsio hori lagun dugula, ikusmira zabalagoa ematen ari gara
»
Irakurrienak
Matomo erabiliz
#1
Gorka Bereziartua
#2
Mikel Garcia Idiakez
#3
Gorka Peñagarikano Goikoetxea
Azkenak
2024-04-30
ARGIA
Netanyahuk dio Rafah inbadituko dutela su-eten akordioa "egon zein ez egon”
34.000 palestinar baino gehiago hil ditu Israelek urriaren 7az geroztik Palestinan, eta beste milaka dira desagerturik edota larri kolpaturik. Jarraipena egiten ari gara.
2024-04-30
Zigor Olabarria Oleaga
Netanyahuk dio Rafah inbadituko dutela su-eten akordioa "egon zein ez egon”
Israelek 40 eguneko su-etena eta preso trukea eskaini dio Gazari, baina akordioa lortu edo ez Rafah inbadituko dutela adierazi du Netanyahu lehen ministroak. AEBk eta Erresuma Batuak Hamas presionatzen ari dira Israelen eskaintza onar dezan. Astelehenean 47 palestinar hil zituen... [+]
Hil egin da Artzentalesen zauritu zen basogintzako langilea
Langilea larri zauritu zen apirilaren 24an, eta astelehenean, hilak 29, hil da. 22 urte zituen eta sektorean bi hilabete soilik zeramatzan lanean. 2024 urtean hildako 22. langilea da.
2024-04-30
ARGIA
Eneko Bidegainen 'Bichta éder' eleberriak jaso du 111 Akademiaren Saria
Karmele Jaioren Maitasun kapitala-rekin lehiatu da finalean. 2023ko “libururik gogokoen” izendatu dute Bidegainen “bihurgune askotako” thriller politikoa 111 Akademia osatzen duten literaturazaleek.
Eguneraketa berriak daude