Euskal sindikatuek eta patronalak hitzarturiko akordioaren arabera, 15.000 izan litezke ondorengo 5 urteetan ordezkatuko liratekeen langileak. EAEko Administrazioaren aurreikuspenak hala adierazten du behintzat. Gogora dezagun akordio honek langabezian edota aldi baterako lan-kontratupean dauden gazteek 60 urtetik gorako langileak ordezkatzea ekarriko duela.
Negoziazioetan aipaturiko zenbatekoen arabera, 12,5 milioi pezetakoa (500.000 libera) izango da langile bakoitzak eragingo duen gastua. EAEko administrazioaren aurrekontua 50.000 milioi pezetakoa izango da, patronal eta sindikatuek hitzartutako akordioak iraungo dituen 5 urteetan zehar banatuko direlarik.
Nork ordainduko du gastu hori? Orain euskal eta espainiar administrazioei dagokie akordio hau arrakastatsua izan dadin beharrezkoak diren bitartekoak jartzea. EAEko gobernuak bere baietza eman dio akordioari dagoeneko eta bere finantzaketan dagokion erantzukizuna bere gain hartuko duela esan du.
Administrazio zentrala da, ordea, finantzaketa eta langabezia kontuetan arduradun nagusia. Ikusi beharko da orain zer jarrera hartzen duen langabezi sarien gastuaren aurrean, akordioaren eraginpean diren langileek Gizarte Segurantzarekin egin ditzaketen hitzarmen bereziak izateko aukeraren aurrean edo aldez aurretiko erretiratzeko aukeraren aurrean

ELA, LAB, CCOO eta UGT sindikatuek eta Confebask patronalak Lan Harremanetarako Kontseiluan (LHK), eta urtebete baino gehiago iraun duten negoziazio tirabiratsuen ostean, pasa den 15ean izenpetu zituzten lortutako lehen akordioak. Epe horretan patronala presionatzeko hainbat mobilizazio izan dira. Akordio garrantzitsuenak lanordu estrak desagertzea, 60 urtetik gorako langileak langabezian dauden edo aldi baterako kontratua duten gazteekin ordezkatzea eta Aldi Baterako Lan Enpresetako (ABLE) egoera hobetzearen ingurukoak dira. Era berean, lanordu murrizketaren inguruko elkarrizketa sustatzeko konpromisoa hartu dute alde biek.

- 60 urtetik gorako langileen ordez, eta hauen eskubide ekonomikoen kaltetan izan gabe, langile gazteak kontratatu. Langabezian edo enpresan aldi baterako kontratupean dauden gazteek izan beharko dute ordezko horiek. Kontratuak mugagabekoak eta egun osorakoak izango dira. Akordioak bost urte iraungo ditu.
- Ordezkatutako langileek langabezi saria jasoko dute bi urtetan zehar, bere soldata garbiaren %85 izango delarik. Bi urte horiek igaro ostean, Gizarte Segurantzarekin hitzarmen berezia izango du, 65 urte bete arte edo aldez aurretiko erretiratzea hartu arte. Erretiro-pentsioaren zenbatekoa, 65 urte arte lanean jardun balu jasoko lukeenaren adinakoa izango da.
- Gehigarri ekonomikoak aseguru etxeko poliza bidez estaliko dira.
- Enpresak 5 urtetan plantila ez murrizteko konpromisoa hartzen du. Murriztuko balu, dirulaguntzak itzuli beharra izango luke, administrazio, enpresari eta sindikatuek osaturiko batzorde batek hala erabakiz gero.

- Lanordu estrak ezabatuko dira enpresetan, hiru salbuespenetan izan ezik: ezinbesteko arrazoia izanez gero (neurri batean diruz eta beste neurri batean atseden orduz ordainduko dira), lanordu gutxi eginez gero (denbora librez ordainduta) eta langile aditurik izan ezean (ekonomikoki ordainduta). Aipatu hiru kasuotan, lanordu estrengatik dagokiona baino handiagoa izango da ordainketa.
- Lanordu estrak debekatzea, sektore edo enpresa akordiotan zehaztu beharko da, non lanordu estrak debekatzeaz bestelako konpromiso eta antolamendu aukerak finkatuko diren.
- LHKek (Lan Harremanetarako Kontseiluak) hartuko ditu sor litezkeen desadostasunen inguruko erabakiak.
- Akordioa betearazteko bitartekoak jarri eta zaintzeko eskatzen zaie administrazioei.

- Enpresaren sektorean indarrean dauden lan baldintza eta soldata berdintsuak ezartzen dira ordezko langileentzat.
- Kontratazio aurretiko informazio eskubidea ematen zaie langileen ordezkariei.
- Zerbitzu enpresetan legez kanpoko langile-ematea kontrolatzeko eskatzen zaie administrazioei.
- Azpikontratazioaren, enpresen nortasunaren eta langileriaren Gizarte Segurantza eta lan baldintzen gaineko legeriari buruzko informazio eskubidea ematen zaie langileen ordezkariei