Zein zen aurkezle hirukotearen nahasketarekin lortu nahi zena?

Hirukote berezi honek koktel egokia osatzen zuela pentsatzen genuen. Nik, bereganatu dituzten rolak beraien izateko moduarekin loturik daudela esango nuke. Hirurak oso erakargarriak dira ikuslegoarentzat, gainera bakoitzak bere izaera guztiz markatua eta guztiz desberdina dute. Koktel lehergarria lortzen dutela uste dut.

«Aurkezleak ezagunak izan arren, horrek ez du esan nahi arrakasta ziurtatua dagoenik» esan zenigun...

Horrek laguntzen duela zer esanik ez. Baina, horrez gain saioaren edukia berezia izan behar du. ETBko ikuslegoa oso fidela izan ohi da eta fideltasun hori lortu arte oso exijentea izaten da. Baina, ez da erraza eta ondoren, ikuslego hori mantendu behar da.

Klaudiok kaleko inkestekin ez al du jendea gehiegi kikiltzen?

Saioa «Kale gorrian» deitzen da eta izenaren atzean probokazio bat dago jadanik. Kaleko norbait kikildua sentitu daiteke, hala ere, Klaudio Landaren probokazio erakargarriak gehienek pozik erantzuten dituztela uste dut. Probokazioak dira, baina umorea ez da inoiz falta.

ETBk azkenaldian kalearekin harremanak estutzeko joera du saio umoretsu eta zuzenekin?

Mota honetako saioak moda direla uste dut. Beste telebista kateen moduan, ikuslegoa eskatzen duena ematen saiatu behar da. Azken finean, ikuslegoak markatzen baitu zer programa mota eman behar den. Hurrengo egunean mahai gainean audientziak egoten dira eta horren arabera erantzun bat eman behar da. Antza denez, gaueko hamarretan jendeak kaleko istorioak ikusi nahi ditu. ETB bere irudia positiboki aldatzen ari dela uste dut.