«Kongresu aurreko eztabaida sosegatua izan da Euskadin»

2021eko uztailaren 19an

CCOOren seigarren kongresuko eztabaidak
«Kongresu aurreko eztabaida sosegatua izan da Euskadin»
Xanti Bengoa, CCOOren idazkari nagusia EAEn
Seigarren Kongresua izan du oraintsu CCOOek eta ez dira bare bareak izan prexixoki Biltzar barruko eta horren aurreko eztabaidak. Hortzak ongi zorroztuta jo dute Madrila korronte guztiek.
Hauteskunde sindikalen emaitzak ikusirik, CCOO duela lau urte baino sendo edo ahulago dago egun Hego Euskal Herrian?
Hasteko, kontuan izan behar dugu hauteskunde legea aldatu egin dela, eta momentu honetan ordezkari edo delegatu kopuru mugikorra dugula. Zer adierazten digu horrek? Enpresaren bat ixtean hor zeuden delegatuak ez direla ageri jada zenbaketan. Beraz, sindikatu guztiok dugu gaur egun orain lau urte baino ordezkari gutxiago.
Edonola ere, bada datu objetibo bat: bi dezima galdu ditugu ordezkari kopuruan, eta oso datu atsekabea da hori guretzat. Hala eta guztiz ere, bigarren indar sindikala gara bai Euskal Autonomi Elkartean bai Nafarroan. Eta 1982ko hauteskunde sindikalez geroztik ez geunden horren posizio onean.
VI. Kongresu Konfederala izan berria du CCOOk. Barne korronteen -Gutierrezen aldekoak, Morenozaleak, Ezker Sindikalekoak- arteko tirabirak zenbaterainokoak izan dira Hego Euskal Herrian?
Kongresu aurreko prozesua Euskadin sosegatua izan dela esango nuke nik. Eztabaida bizia izan da, eta apustu garbia egin dute ordezkari gehienek Kontseilu Konfederalak onetsitako tesi maioritarioen alde. Hortxe aztertzen dira lan, enplegu, legeria... Alor guztietan, gizarte osoan, izan diren aldaketak.
Eta hortxe daude baita ere gizaldi berriari ekiteko estrategien zirriborroak: enplegu sorrera eta kalitatea, lanorduen murrizketa, ordu estrak kentzea, prekarietatearen aurkako borroka, hezkuntza profesionala bultzatzea... Eta honekin batera, babes sozialerako sistema publikoaren defentsa.
Enplegua aipatu berria dugunez, zer deritzozu Felipe Gonzalezek duela gutxi egindako proposamenari, hau da, lanorduekin batera soldatak murrizteari?
Lanordu gutxiago, horrekin konforme gara, aurrerakuntza tekniko-zientifikoei esker giza-esfortzu ttikiagoa aski baita lehen bezainbat, edo gehiago, produzitzeko. Honenbestez, geuk ere uste dugu lanorduen murrizketa zorrotza egin behar dela enplegu berriak sortu ahal izateko.
Gutxiago irabaztearena? Hori diskutigarriagoa da, zeren eta azken urteotan produktibitatearen hazkundea ia erabat enpresarien irabaziek jan dute, inbertsiora bideratu beharrean. 1992-95 bitartean, Euskadin, benetako inbertsio kopurua negatiboa izan da. Dirulaguntza publikoak inbertsioa bera baino handiagoak izan dira. Beraz, eta hemen daukagun soldata-egituraketa ikusirik, ezin liteke ordu murrizketa-soldata murrizketaz hitz egin. Salbuespenen bat izango da, baina salbuespen modura aztertu beharrekoa.
Bestalde, sarri samar entzun ahal izan da aspaldian sindikatuok erakunde korporatibistak bihurtu zaretela. Alegia, enplegu tinkoa dutenen defenditzaileak, baina langabetuak edo lan prekarioa dutenak bazterrera utziz.
Kritika hori ez dator bat errealitatearekin, eta ñabardura batzuk eranstea komeniko litzateke. Hasteko, edozein giza-erakundetan bezala, eragin handiagoa dute partehartze handiagoa dutenak. Geure sindikatuan, esaterako, partaide gehienak soldatapeko langileak izaki, normala da hauen esku izatea ardura eta eragin zabalena.
Baina beste ikuspegi batetik begiratuta, gogoan izatekoa da azken urteotako bi greba orokorrak elkartasunezkoak izan direla. Hau da, langabetu, jubilatu eta enplegu ez-egonkorra dutenenganako elkartasuna aldarrikatzeko grebaldiak. Horretaz aparte, azken urteotan arreta berezia eskaini diogu langabeziaren arazoari. Hor daude langabetuentzako aholkularitzak, hezkuntza alorra... Bi hitzetan, lanik ez duten langileen arazoa lehen mailan dugu CCOOn.
ELA eta LAB elkarlanean ari dira zenbait alorretan. Eta askoren iritziz, bi esparru nabarmen ageri dira Hego Euskalerriko sindikalgintzan: abertzaleak batetik (ELA-LAB), estatu mailakoak bestetik (CCOO-UGT).
Izurritea bailitzan ari gatzaizkio iheska manikeismo horri, abertzale-estatalista sasi-enfrentamenduari. Estatu plurinazional batean bizi gara; Gernikako Estatutuak eskuduntza zabalak damaizkio Jaurlaritzari... Geuk ere bat egiten dugu Estatutuarekin, eta oso osorik betetzea eskatzen dugu. Estatutuaren eskutik, eta agente sozialengandik dator lan harremanetarako esparru autonomikoa. Negoziazio kolektiboaren, hitzarmen interkonfederalen, Jaurlaritzaren konpetentzien (industria, osasuna...) eskutik ari da osatzen bertako esparru hori.
Sindikatu abertzaleekin dugun eztabaida zera da, esparru autonomikoa `esparru autarkikoa' izan ote litekeen. Erreferentziarik gabeko sindikalgintza behar al dugu, estatu espainiarreko eta Europako gainerako sindikatuekin harremanik gabea? Guk ezetz diogu. Lan eta sozial alorreko legeriak; funtsezko harreman ekonomikoak... horiek guztiak geroz eta gehiago Estatu espainiar mailan erabakitzen dira, baita Europan ere.
UGT eta CCOO sindikatu bakarra, bateratua, izateko aukerarik ikusten al duzu epe labur-ertainera?
Futurologia egiterik ez dut atsegin, baina UGTeta CCOOren arteko ekimen bateratua positiboa da langileentzat. Politika ekonomiko liberalei Espainiako historia modernoan eman zaizkien erantzun zorrotzenak batasun honen eskutik etorri dira. Eta kongresu honek ekimen bateratua sendotzearen aldeko apustua dakar. Ez UGTrekin soilik, baizik eta estatu osoan diren klase-sindikatu demokratiko guztiekin.
XABIER ARANBURU
17-18,19

GaiezEkonomiaSindikalginSindikatuaCCOO
PertsonaiazBENGOA1
EgileezARANBURU6Ekonomia

Irakurrienak

Matomo erabiliz

Moja faxisten istorio harrigarria

Gorka Bereziartua

Surf parkerik ez dute eraikiko Donostiako Antondegin, udal gobernuak atzera egin du

Lander Arbelaitz Mitxelena

Lau, hiru, bi, bat… Gora Olatukoop! Ekonomia eraldatzailearen festa Donostian

Urko Apaolaza Avila

Hamabi lagun ikertzen ari dira, Castejonen CAF-Trenasaren kontra egindako protesta bat dela-eta

Gedar

"Torturak ama eta alabarengan sorturiko zauria arintzen lagundu du dokumentalak"

Mikel Garcia Idiakez

Hauek dira Ziburuko 5. Euskal Liburu eta Disko azokan aurkeztuko diren liburuak

Estitxu Eizagirre

Azkenak

2024-05-22 | Mikel Garcia Idiakez

Futbolari gay-ak zergatik ez dira ausartu azkenean armairutik ateratzera?

Alemaniako gizonezkoen futbol profesionalean ari diren hainbat futbolari armairutik ateratzekoak ziren maiatzaren 17an. Sekretuan eta kluben bizkar biltzen ari ziren jokalariak, baina espektatiba altuak ezerezean geratu dira, ez da inor armairutik atera. Futbol maskulinoaren... [+]

2024-05-22 | Imanol Satrustegi Andrés

Genozidio ahaztuak

2024-05-21 | Gorka Peñagarikano Goikoetxea

Urdaibaiko Guggenheima konkretatu gabe, Juan Ignacio Vidartek utzi egingo du zuzendari kargua

Urtearen amaieran utziko du ardura postua. Zuzendaritza berritzeko prozesua jarriko dute martxan. Vidartek 32 urte pasatu ditu Bilboko Guggenheim museoko zuzendaritzari lotuta.

2024-05-21 | ARGIA

Nafarroan epaitu gabe gelditu den bortxaketa bikoitza aztertuko du Estrasburgok

2016an bi emakumek bortxatuak izan zirela salatu zuten, Iruñean. 2018an auzia artxibatu zuten eta ez zen epaiketarik egin. Espainiako Poliziak, Fiskaltzak eta Nafarroako Auzitegiak ikerketan egindako irregulartasunak salatu ditu biktimen abokatuak. Espainiako Estatuak... [+]

2024-05-21 | Steilas sindikatua

Itxaron zerrendak Nafarroako Hezkuntzan, aniztasunari arreta emateko alorrean

Eguneraketa berriak daude