"Aurreko edizioetan baino filme hobeak aukeratu ditugu".

1995eko irailaren 10an

Diego Galan, Donostiako Zinemaldiaren zuzendariari elkarrizketa
"Aurreko edizioetan baino filme hobeak aukeratu ditugu".
Diego Galan, Donostiako Zinamaldiaren zuzendaria
Bigarrenez hartu du zuzendari kargua Diego Galanek, eta bere hitzak entzunda, bai lehiaketak bai sail ezberdinek gora egingo dute aurten. Marka berriak jartzera dator, beraz.
Aurtengo Zinemaldiak eskema klasikoari helduko al dio?
A kategoriakoak garen neurrian behartuak gaude lehiaketa saila antolatzera, eta Zabaltegi berriz, osagarri gisa antolatzen da; bi sailon artean aurtengo filme onenak eskaintzen saiatuko gara. Honezaz gain, sail paraleloak daude.
Sektore guztientzat zinema eskaintzea dugu helburu, zaletu bakoitzak izan dezala bere aukera eta lekua, horretarako ekartzen dira filme komertzialak, pantailaratzen umeentzako zinema edo atzerabegirakoen saila. Ezertan espezialdu gabe eskaintza zabala osatzera jotzen dugu.
Gauza berriak deskubritzea gustatzen zaigu bestalde, ez gara karta markatuekin jokatu zale, Berlin eta Cannesek egiten duten moduan. Zinemaldi hauetan Buster Keaton eta John Forden atzerabegirakoak eman dituzte, guk ere egin genezakeen Hitchcockena, arrakasta ziurtatuta genukeen, baina sail honetan nahiago izan dugu ezagutzen ez diren autoreengana jotzea.
Zer azpimarratu nahi izan duzue filmeen aukeraketa egiteko orduan?
Beste ezeren gainetik onak izan daitezela, ez? Beti ere dauzkagun aukeren arabera jokatuz, noski. Sail ofizialari dagokionez, eta beste zinemaldietan parte hartutako filmeak aukeratu ezin daitezkeenez, kontuan hartu behar da garai honetan A kategoriako lau zinemaldi egiten direla, eta bakoitzak 20 maisulan aurkeztu nahi izanez gero, beharrezkoak liratekeela 80 filme on egitea urtean zehar. Eta ez daude. Alabaina, aurten aurreko edizioetan baino filme hobeak aukeratu ditugu, besteak beste aspaldiko partez zuzendari ezagunen lanak izango ditugulako gure artean; azken edizioetan lehiaketa zuzendari ezezagunen inguruan antolatu izan da, eta oraingoan ezagunak eta ezezagunak elkarrekin izango ditugu.
Lehiaketari ezagutu izan zaion arrisku mailak behera egingo du beraz?
Nik diot halakorik. Nire ustez zinemaldi baten zereginak arriskuari lotua behar du, areto komertzialetara iristen ez den zinemari ateak zabaldu behar zaizkio, ikusle gehientsuenek lan arrakastatsuak eta ospe handiko izenak nahiago izaten dituzten arren.
Manuel Perez Estremera aurreko zuzendariak ia erabat aldatu zuen filmeen aukeraketa taldea. Jarraitzen al du egun talde horrek, eta zer nolako emaitzak erdietsi ditu?
Ekipoa batik bat bera da, berrikuntza batzuekin, hala nola Jose Luis Rebordinosena. Oso zabala da, anitza, eta partaide bakoitzak bere lana eskaintzen du. Emaitzak berriz, irailaren 24tik aurrera aztertu beharko dira.
Askotan aipatu izan duzue aukeraketa taldeari ez dagozkion akatsak leporatu izan zaizkiola, eta arazoa beste nonbait dagoela, Zinemaldiaren egoera ekonomiko estuan adibidez. Aurten zer nola zabiltzate diruz?
Instituzioek 1990ean eman ziguten diru bera luzatu digute, kopuruak ez dira aldatu denbora honetan eta beheranzko joera antzematen da, esaten zaigunez krisiaren kontua dela medio. Une honetan Zinemaldia %30 autofinantzatzen da eta ez dakit datozen urteetan kopuru honetatik gora egiteko aukerarik izango dugun, baina guztiz aproposa eta egokia litzateke gure askatasuna eta programazioa baldintzatuko ez lukeen diru pribatuarekin funtzionatu ahal izatea.
Beste zinemaldiekin alderatuz gero, behetik dago gure aurrekontua, baina daukagunarekin aurrera egitea dagokigu eta gure mugak zeintzuk diren jakinda ahalik eta ondoen funtzionatzea.
Errentagarria izateko aukerarik ba al duzue?
Zinemaldi errentagarri bakarra Cannesekoa da. Beste guztiek beharrezkoa dute diru publikoa aurrera egiteko. Hala ere, gure asmoa autogestio maila hobetzea litzateke, ez dakit muga non dagoen, baina hiru urtetan %30era iristea ez dago batere txarto.
Zinemaldia bi ahoko ezpata dela aipatu izan da beti zinemagile eta produktoreen artean, luzemetraiak ezagutarazteko aproposa dela, baina era berean kritikak oso gogor jokatzen duela. Jendeak beldurra omen dio etortzeari...
Halaxe da. Estrenatzera doan filme batentzat erabakigarria gertatzen da Donostian jaso dezakeen kritika, eta kritikak aho batez filme txarra dela esanez gero, promozioa erabat okertu daiteke noski, eta alderantziz. Arrisku hau pozik hartzen dute batzuek, beldurrez besteek, eta hainbatek nahiago izaten du ez etortzea. Gutxi batzuk dira ordea, Espainiako zinemari dagokionez behintzat.
Azken bost urteotako lehen sariak espainierazko filmeek jaso dituztelako edo?
Ziurtatu diezazuket epaileak erabat libreak direla eta nahi dutena egiteko aukera dutela. Hala ere, ez nuke sariei dagokienez denbora luzez horrela izatea nahi, ez delako ona Zinemaldiarentzat; badago oso etxekoiak garela esaten duenik... baina kasualitatea da, urte bakoitzak bere historia du.
Imanol Uribek aipatzen zigun, filme europar onenak Cannes eta Veneziara joaten diren moduan, espainiar onenak Donostiara etortzen direla, eta Donostiakoa munduko zinemaldirik onena dela espainierazko filmeentzat.
Saria jaso ondoren esango zuen noski! Zerbait oparitzen dizutenean eskertzekoa izaten da... Ez dizu gauza bera esango Pedro Oleak, bere garaian jaso zuen porrotaren ondoren.
Hala ere, iaz Uriberen «Dias contados» saritzeko erabakia erabatekoa izan zen, eta azkarra, Frantziako epailea bakarrik mintzatu zen dudatan, sari hori ematea Zinemaldiarentzat ona ez zela esanez.
Venezia, Montreal, Tokio... nork egiten dizue min handiagoa?
Venezia, gure datak oso hurbilekoak direlako eta biok Europan gaudelako. Montreal behera etorri da, eta Tokiokoa berriz, urrun geratzen zaigu.
Venezia guztiek ezagutzen dute, ospe handiagoa du eta guztiek parte hartu nahi izaten dute. Donostiak zailagoa du.
Zer eskaintzen dio Donostiako Zinemaldiak Euskal Herriko zinema industriari eta euskal kulturari?
Euskal industriari ezagutzera emateko plataforma bat. Emaitzak aztertuta, ordea, hemengo industria ez dago bere sasoirik onenean. Modu iraunkorragoan funtzionatu beharko luke, eta aurten ez da gauza handirik egin denik ikusi.
Kulturari berriz, antzeko ekitaldi baten bizitasuna eskaintzen dio, nahiz eta gure jarduera iraupen laburrekoa izan, hamar egun guztira.
Hainbatetan Zinemaldiak glamour edo irudikeriaren aldeko apustua egin izan duela aipatu izan da, bere nortasunaren kaltetan. Egun nola jokatzen duzue zentzu honetan?
Glamourraren kontua komunikabideek azpimarratu izan dute. Zinemaldian zehar batik bat hitzaldi eta prentsaurrekoak ematen ditugu eta horiek oso gutxi aipatzen dira. Lana Turner edo izarren bat etorri izan denean ordea, lehen orriak eskaini izan zaizkio. Hain zuzen ere, elkarrizketa gehienetan nor etorriko den galdetzen didate lehenik.
Ohartzen bazara glamourrak oso leku txikia betetzen du eskema orokorrean, baina zera, jende askok eta askok Silvester Stallonek egindako azken lana eta glamourra maite du, eta ez Zabaltegi sailean eskaini dezakegun Nikaraguako azken filmea.
PETRIKORENA, J.J.
37-39

GaiezKulturainemainemaldiakDonostiako
PertsonaiazGALAN2
EgileezPETRIKOREN1Kultura

Irakurrienak

Matomo erabiliz

Nire dürüma defendatuko dut

Gorka Bereziartua

“Euskararen borroka gaztetzen ari da, oso azkar”

Onintza Irureta Azkune

EAE: Aldaketa(k) eta une katalana

Asier Blas Mendoza

Voxeko faxisten kontra protesta egin dute Algortan, Azpeitian eta Tolosan

Gedar

"Ez da trantsizioa, espekulazioa da"

Estitxu Eizagirre

Azkenak

2024-04-17 | Maialen Huarte Arano | Euskalerria irratia

Haritu: "Familia batzuek sei hilabete daramatzate hotel batean"

Iruñerriko Etxebizitza Sindikatu Sozialistak eta Harituk Iruñeko Udalak etxegabeentzat eskaintzen dituen baliabideak kritikatu dituzte: "Ogi apurrak dira", adierazi du Martin Zamarbide Harituko kideak. Behin behineko zenbait "aukera" ematen... [+]

2024-04-17 | Mikel Garcia Idiakez

Errendimendu akademikoaren arabera banatuko dituzte ikasleak Ipar Euskal Herrian

Ongi doazen ikasleak talde batean, zailtasunak dituztenak, bestean; maila akademikoaren arabera banatuko dituzte ikasleak datozen ikasturtean, Frantziako Estatuan. Ikasleak sozialki eta akademikoki sailkatu eta bereiztea, desoreka areagotzea eta egoera okerragoan daudenak... [+]

2024-04-17 | Asier Etxenike Ugarte

Analisia

Araba: Zer isla elektoral izango du aldaketak?

Apirilaren 21eko Eusko Legebiltzarrerako hauteskundeetan, EAJren eta EH Bilduren arteko lehia nabarmentzen ari da, Araba erabakigarria izan daitekeen herrialde bihurtuta. Dinamika hori ulertzeko, azken hamarkadan Araban izandako hauteskunde-bilakaera aztertu behar da. Hiru aldi... [+]

2024-04-16 | ARGIA

Ia 15.000 erabiltzaile ditu Puntueus domeinuak, sortu zenetik hamar urtera

Puntueus domeinuak hamarkada bete du apirilaren 15ean, eta EITBren Bilboko egoitzan ospatu du Puntueus fundazioak. Gaur arte lortutakoa goraipatu dute, eta 2024 urterako kanpaina berria iragarri.

2024-04-16 | EHUko Prekarioen Koordinadora

Eta zuk? Zure lana musu-truk egin nahi al duzu?

Eguneraketa berriak daude