"Musika nahiko intimista du dizkoak eta horrek ez du salmentarik"

2021eko uztailaren 19an

Mikel Errazkinek bere azken diskoari buruz hitzegiten du
"Musika nahiko intimista du dizkoak eta horrek ez du salmentarik"
"Bostak arte" izeneko dizkoa kalean du Mikel Errazkin hondarribitarrak
Hamasei urte zituela sartu zitzaion Mikel Errazkini musikarako zaletasuna; 21 ditu orain. Rock sinfonikoa eta Irlandako musika entzuten ditu gustukoen. Lau urtez Sorotan Belen aritu ostean, arrakasta ezagutuz, belazera joan zen zozoa, eta «Bostak arte» diskoarekin egin zuen hegan maiatzean.
Nondik datorkizu musikarako zaletasuna?
Duela bospasei urte hasi nintzen musikari arreta jartzen eta entzunaren entzunez pizten da zaletasuna. Gehienbat rock sinfonikoa. Sekula ez dut rock gogorra gustuko izan. Ondoren Irlandako musika entzuten hasi nintzen eta horrekin jarraitu nuen. Zaletasunarekin batera instrumentu zenbait, gitarra eta beste batzuekin lardaskatzen hasi nintzen. Gero Hurbil Artolarekin bildu eta hortik hasi zen Sorotan Bele.
Sorotan Belen aritua, zein balorazio egingo zenuke taldearen lanaz?
Oso ona. Orain eta lehen koadrila ginen eta musika egiteko asmoa genuen. Urtea igaro eta kontzertuak eskaintzen hasi ginen; hortik aurrera guztia segidan iritsi zen: maketa, diskoa... Azkarregi joan da guztia eta horrela ez dago disfrutatzeko aukera handiegirik, baina atzera begiratu eta ohartzen zara lau urtetan gauza mordoa burutu genituela.
Folk akustikoa aireratzen hasi ginen baina gerora gure eraginak aldatu egin ziren eta jada folk rockero batzuk gara. Hurrengo diskoa auskalo nolakoa aterako den.
Izan zenuten arrakasta eta hala ere zure diskoa egiteko asmotan zenbiltzan. Zergatik?
Nire diskoan gehien gustatzen zaidan musika sartzeko modua nuen. Disko hau ezin nuen Sorotan Belerekin atera. Oso desberdina da. Talde batentzako kantu bat egiten duzunean, partaide bakoitzak bere eraginak ditu eta sekula ez zara zeharo gustura gelditzen egindakoaz. Banekien diskoa ez zela Sorotan Bele bezain arrakastatsua izango. Musika nahiko intimista da eta honelako gauzak beti salmenta gutxikoak izaten dira.
Maiatzean kaleratu zen «Bostak arte». Disko hau egiteko momentu txarrak eta zure ganbarak lagundu dutela esan duzu. Zer dela eta?
Ganbara da nire lantokia. Estudio txiki modura antolatua dut, sintetizadoreekin eta abar. Bertan osatzen ditut kantuak eta bertan ematen dut denbora guztia. «Bostak arte» izenburua, berriz, goizeko bostak arte lana egiten dudalako ipini diot. Bestalde, aurten momentu txar asko igaro ditut. Honela, behin etxean nintzela, eritetxetik bueltan, gurpildun aulki batean, entzun nuen hasieran disko honetaz egindako maketa eta pentsatu nuen: «Hau derrigorrez bukatu behar diat ba». Lanpetuta egoteak asko lagundu dit une txarretan.
Intimista dela esan diguzu... Zein ezaugarri gehiago ditu diskoak?
Musika oso lasaia, kutsu ezberdinak jasotzen dituena: irlandarra, afrikarra, new age, eta entzuteko oso erraza. Lau kantutan izan ezik, diskoa instrumentala da. Hitzak, berriz, bi Itxaro Bordarenak, bat Jexux Mari Irazurena eta bestea Ruper Ordorikaren bertsio bat.
Zein gaik kezkatuta hasten zara kantuak egiten?
Momentu zehatzez hitz egiten dut. Agian momentu batean triste naiz eta nola sentitzen naizenari buruz idazten dut. Gai orokorrak ez ditut hautatzen, uneen zertzeladak dira.
Ingelesez izenburuak ere badaude konpaktoan...
Kantu tradizionalak dira: irlandarra bat eta eskoziarra bestea. Guztia entzun behar da. Musika euskalduna egiten dut baina kanpoko kutsuak hartzen ditut, hori guztia nahasteko. Ez dut uste honelako kantu pare bat sartzeagatik atzerritarra naizenik.
Euskaldun batek beste hizkuntza batean abestearena nola ikusten duzu?
Euskal Herrian talde edo abeslariek ikuspegi ezberdinak dituzte. Batzuek uste dute erdaraz abesteagatik arrakasta handiagoa izango dutela eta beste batzuk euskaraz abesteagatik `hemengoagoak' direla. Nongoa sentitzen zaren argi izanda, gainontzekoak ez du axola.
Disko honetako estiloak zenbaterainoko lekua du euskal musikaren merkatuan?
Oso mugatua. Jende gehienak irratitik botatzen dutena entzuten du eta honek ez du irratietan kabidarik. Nire kantu bat ipintzen dute irratietan baina abestua delako, disko osoa instrumentala egin izan banu ez zatekeen entzungo.
Jendea kontzientziatu behar da, gauza bat ondo egina baldin badago, musika polita bada, irratietan propaganda egin beharko litzaiokela. Hori, ordea, ez dago musikarien esku. Irratiek enpresa funtzionamendua dute, komertzialtasuna bilatzen dute eta ez dago hori aldatzerik.
Zure diruarekin grabatu duzu diskoa; beste disketxeetatik proposamenik izan al duzu?
Disketxe ezberdinetara joan nintzen maketa aurkeztera eta ezezkoak besterik ez nituen jaso, ez zela komertziala esaten zidaten. Zigilu bat egin nuen eta «Hirusta» izena ipini nion. Irlandako sinboloa da hirusta eta zortearen zeinua.
Zein proiektu dituzu orain eskuartean?
Sorotan Belerako konposatzen ari naiz orain. Estilo ezberdineko kantuak dira: biolinek garrantzi handia hartu dute eta beste instrumentu batzuk gutxitu, xirula, esaterako. Beste zenbait jenderekin baditut proiektuak baina luzera begira. Les Mecaniciens taldeko Ane Irazu abeslariarekin ari naiz lanean.
ARTOLA, Maite
Zigilu propioarekin kaleratu du diskoa.
Sorotan Belerentzat abestiak konposatzen jarraitzen du.
42-43

GaiezKulturaMusikaMusika modePertsonakMusikoakERRAZKIN1
GaiezKulturaMusikaArgitalpenaDiskoak
GaiezKulturaArgitalgintArgitalpenaDiskoak
PertsonaiazERRAZKIN1
EgileezARTOLA6Kultura

Irakurrienak

Matomo erabiliz

"Torturak ama eta alabarengan sorturiko zauria arintzen lagundu du dokumentalak"

Mikel Garcia Idiakez

Netanyahu eta Hamasen buruzagitza atxilotzeko eskatu du Hagako Auzitegiak

Lander Arbelaitz Mitxelena

Moja faxisten istorio harrigarria

Gorka Bereziartua

'Lurrez estali', laborarien errealitatea oholtzara eramango duen Axut! kolektiboaren obra berria

Gorka Peñagarikano Goikoetxea

'Intensa'

Maialen Arteaga

Euskararen konplizeak Gasteizen

Cira Crespo

Azkenak

2024-05-21 | Axier Lopez

Kolonialismoaren ABDa

2024-05-21 | Alaine Aranburu Etxegoien | Oarso Bidasoko Hitza

Hondarribiko Udalak aitortza egin die Asturiagako hondartzan hildako bi biktimei

Biktimen familiei barkamena eskatu diete ere azken 50 urte hauetan "behar besteko" babesa ez emateagatik. Poeta biktima gisa aitortu duten bezala, Moriko ere hala izatea eskatu du udalak, eta "epe laburrean".

2024-05-21 | Gedar

Hamabi lagun ikertzen ari dira, Castejonen CAF-Trenasaren kontra egindako protesta bat dela-eta

Asteartean deklaratu beharko dute Tuteran, ikertu gisa. Palestinan eraikitzen ari den tranbia-sarearen bidez, CAF "entitate sionistaren kolonizazioan parte hartzen" ari dela ohartarazi dute.

2024-05-21 | Lander Arbelaitz Mitxelena

Surf parkerik ez dute eraikiko Donostiako Antondegin, udal gobernuak atzera egin du

Donostiako Udalak El Diario Vascori filtratu dionez, ez dute olatu artifizialen surf parkerik eraikiko Martutene eta Txomiñenea auzoen artean dagoen Antondegi mendian. Albisteak sorpresa eta poza eragin du mugimendu ekologistan, izan ere, orain arte EAJ eta PSE-EE sendo... [+]

2024-05-20 | Hamaika Telebista

Ar Redadeg Bretainia zeharkatzen ari da, bretoieraren alde

MULTIMEDIA - Albistea

Eguneraketa berriak daude