"KASen edukien funtsa konpondu ez denez, alternatibak indarrean dirau"

1995eko apirilaren 09an

Maitane Intxaurraga, KASeko kideari elkarrizketa
"KASen edukien funtsa konpondu ez denez, alternatibak indarrean dirau"
Maitane Intxaurraga, Koordinadora Abertzale Sozialista-ko kidea
Ezker Abertzaleko aurpegi berrietako bat dugu Maitane Intxaurraga. Oraindik gaztea den arren, ibilbide luze samarra egina du euskal politikagintzan. Garai batean Jarrain jardundakoa, gaur egun Egizan-eko kide eta KASeko bozeramailea da. KAS alternatibaz, bere proiektuaz eta helburuez, komunikabideen zereginaz eta uneotan Euskal Herrian dugun egoera nahasiaz jardun dugu.
KASen kontra dagoen salaketaren oinarri bat, KASen izkribu batek zekarren kazetarien aurkako mehatxua da. Zer zen zehazki idatzi hura?
Lehenik esan nahi dut ez zela KASen dokumentu bat, ezin baitzaio KASen dokumetu deitu pertsonalki militante batek egin duen ekarpenari. Bestalde, KASen dokumentuek ez dute sekula inortxo ere mehatxatu.
Aberri Egunaren inguruan idazkia kaleratuko dugu, non komunikabideek jokatzen duten papera zein den zehazten dugun.
Zer azalduko da idatzi horretan?
Hiru koordenada planteatzen dira. Batetik, Euskal Herriarentzat eta euskal herritarrontzat ez dago informazio alorrean demokrazia eta berdintasunezko tratamendurik. Zentsura sistematikoak jarraitzen du. Bestetik, diskriminazio argia dago euskara erabiltzen duten komunikabideekiko. Eta azkenik, komunikabide batzuk Euskal Herriaren eraikitze proiektuaren aurka daude.
Espainiar eta frantses estatuen proiektu ideologikoa defenditzeko, kazetari batzuek Euskal Herria eta Estatu espainiarraren artean dagoen gatazka erabiltzen dute euren onura ekonomikoetarako, informazio polizialak erabiliz, torturaren bitartez ateratako informazio hori publikatuz, Ezker Abertzalearen inguruan filtrazioak ateraz... Hori guztia Estatuak ordaintzen die diru bereizietatik.
Komunikabideak Ezker Abertzalearen aurkako borrokan ari al dira?
Inork ezin du ukatu gaur egun komunikabideak botere faktiko bilakatu direla. Sekulako boterea daukate gizartearen iritzia moldatzeko. Komunikabide horiek jarrera bat daukate, batzuk askatasun demokratiko eta Euskal Herriaren eskubideen aldekoa eta beste batzuk Espainiaren aldekoa. Hauek, trikimailu antidemokratiko, errepresibo eta polizialak erabiltzen dituzte.
Lor al daiteke bakea komunikabide eta Ezker Abertzalearen artean?
Kontua ez da bakea lortzea. Komunikabideek, bakoitzak bere ildo editoriala mantenduta ere, gauza izan behar lukete gutxieneko arau demokratiko batzuk errespetatu eta profesionaltasunez lan egiteko. Egun gizarteak igerri egiten du tratamendua ez dela berdina izaten gizarteko zati bat eta bestearekiko, eta hori edonork ikus dezake, baita Ezker Abertzalearekinbat egin ez duenak ere.
Zein helbururen atzetik doa KAS?
Koordinadora Abertzale Sozialista, Euskal Herri independente, euskalduna, batua, justuagoa (guk gizarte sozialista deitzen dioguna), gizarte ez patriarkala... lortu nahi duen militante eta erakunde gunea da. KASek duen funtzioa helburu horiek lortzeko jendea dinamizatzea, lanean jartzea eta jendea protagonista sentiaraztea da. KASek ez du protagonista izan nahi, baizik Euskal Herriaren eraikuntza nazionalean jendearen protagonismoa bultzatu nahi du, eraikuntza politiko nazionalari gaurtik eutsiz, landuz eta mamituz.
Oldartzeni egindako «Iratzar» enmiendak HBren barne korrontetzat hartu du KAS.
Hori ez da horrela. Ez gaude ados «Iratzar»en agertzen den uste horrekin. KAS ez da sekula korronte ideologikoa izan, ezta izango ere, hori ez baita bere izaera.
HB ez da alderdi politiko klasikoa, herritar batasuna da eta norbanako bezala eztabaidatu ondoren denen artean hartutako erabakiek egiten dute aurrera. Hori da herritar batasunaren funtsezko ezaugarria eta sakondu beharrekoa, benetako gizarte partehartzailera iritsi nahi badugu.
KASeko militanteak HBn? Badaude, noski, baina norbanako gisa, auzo-elkarteetakoak, intsumituak edo Amnistiaren Aldeko Batzordeetakoak dauden bezala.
Orain arte, KASen ETAk agintzen zuela zioten agintari batzuek, baina azkenaldian ETAn KASek agintzen duela esaten dute.
Mezu aldaketa hori 92tik aurrera dator, Bidarteko erorketaren ondoren. ETA deseginda zegoela eta Ezker Abertzalea iparrik gabe geratu zela esan zuten. Baina ETA hor dago. Alderdi batzuek ez dute ETAren ahalmen politikoa onartu nahi eta horregatik diote KAS dela ETAn agintzen ari dena.
KASi erasotzeko aitzakia besterik ez da hori. Baina beraien azken helburua ez da KAS, Ezker Abertzaleko borroka desaktibatzea baizik. Oraingoan KAS hartu dute baina hurrengoan beste gune antolatu bat aukeratuko dute. Azken finean, Ezker Abertzalearen aurkako atakea da. Erresistentzia politiko aktiborik ez egotea nahi dute eta horren aurka guztiak balio du, intoxikazioa, atxiloketak, torturak...
Kalean Ertzaintzarekin dagoen enfrentamendua nola ikusten duzue?
Ertzaintzak duen gatazka ez da Ezker Abertzalearekin soilik, langileekin, intsumituekin, euskara munduan lanean ari direnekin, ikasleekin... Ertzaintzak gizarteko sektore zabalarekin du gatazka.
Euskal Herria beste modu batera ulertzen dugun jendeari aurka egiteko errepresioa diseinatu dutenek eta estrategia errepresibo horretan Ertzaintza sartu dutenek daukate horren guztiaren ardura. Hor Euskadi Buru Batzarrak du erantzukizun politikoa, Ertzaintza, interes batzuen pean, polizia politiko bihurtu baitu.
Alderdi batzuek KASek planifikatutako estrategiatzat hartzen dituzte hainbat herritarrek Ertzaintzarekin izandako azken gatazkak.
Hori esatea, dagoen gatazka ez ikusteko begiak zapi batez estaltzea da. Diseinatutako estrategia egon da, bai, baina Estatu espainolak eta EAJk egina. Ezker Abertzaleari estrategia horri aurre egitea egokitu zaio, beste batzuekin batera.
Kalean ahalmen handia dago injustiziei erantzuteko. Gatazka ez da KAS edo Ezker Abertzalearen estrategiaren ondorioa, estrategia errepresiboak eragindako erantzuna baizik.
Enfrentamendu zibilaren eremuan sartu garela esan al daiteke?
Horrela bada, ez da Ezker Abertzalearen borondatez gertatu. Gatazkaren gogortzea eta errealitatearen gordintzea eman da. Ezker Abertzaleak beti egin dio uko enfrentamendu zibilari. EAJ behin eta berriz ohartarazi dugu, baina ez du kasurik egin eta probokatzen aritu da. EAJk nahi duen lekuraino iritsiko da enfrentamendua, berak baitu egoera hau desaktibatzeko giltza.
EAJrekin dagoen liskar-egoera handituz joan da azkenaldian
Madril eta Parisko gobernuek egindako estrategian partehartze aktiboa izatera pasatu direnak badaude, eta hortxe da EAJ. Orain arte zerbitzaria zena patroi izatera igaro da. Hori ez da guk nahi genuelako gertatu, euren borondatez baizik, interes partidista ekonomikoengatik. Egunez egun ari dira Euskal Herria saltzen.
Beti aldarrikatu duzuen irtenbide negoziatua une honetan nola dago?
Estatu espainolak borondaterik agertzen ez duenez, beti egon den bezala dago egoera. Gatazka hau konpontzeko borondate eta ahalmen politikoa dituela erakutsi behar du, batez ere Algerreko prozesuan eman zen antzerkia ikusi eta gero. Nola esan daiteke Algerren Madrilek borondatez jokatu zuela, han izandakoek gero GAL osatu bazuten?
Irtenbindera iristeko zein da oztopoa?
Borondate eza, konponbidea bide polizial-errepresiboekin ez dela etorriko ez ikustea. Euskal Herriari gutxieneko eskubide demokratikoak ezagutzen ez zaizkion bitartean, ez dago irtenbiderik.
Zeintzuk dira zuek proposatzen dituzuen urratsak?
Bi dira. Lehenengoan, Estatuak ETA solaskide gisa onartu, eta Euskal Herria itotzen duten hipoteka antidemokratikoak gaindituko dira. Bigarren urratsean, Euskal Herriak autodeterminazio eskubidea praktikan noiz eta nola ipini erabaki behar du.
ETAk edo Ezker Abertzaleak ez dute sekula planteatu ETA izango denik Euskal Herriaren geroa erabakiko duena.
Elkarri-k antolatutako jarkunaldiek zerbaiterako balioko al dute?
Aspektu positiboak eta negatiboak izan dira. Alderdi ona izan du gauza positiboak planteatu direla: gatazka politikoa dela, autodeterminazioak garantizatuko duela bakea...
Bestalde, Ituneko barne ezberdintasunak berriro ere agertu dira. PSOEren ahultasuna ere ikusi da eta honek EAJn duen eragina. Honetaz gain, Elkarri-k, oharkabean edo ohartun, tresna balio ikaragarria hartu du EAJrentzat.
Elkarri-k, azkenik, neurriz kanpoko dimentsioa eman dio Bake Konferentziari, egoera politikoa gaindituko lukeen itxura emanez, Vascongadetan soilik kokatuz eta Estatu espainola zuzenean ordezkatzen duten PP eta PSE-EE egon ez diren arren garrantzia handia emanez.
KAS alternatibaren formulazioak berdin jarraitzen du?
KAS alternatibak azken batean hau dio: autodeterminazio eskubidea aitortu behar zaiola Euskal Herriari, baita lurraldea batasunez eraikitzeko eskubidea ere; amnistia, eta indar errepresiboek aldegitea ere eskatzen du. Puntu hauen funts eta esanahiak konpondu gabe daude oraindik, zoritxarrez, eta horregatik indarrean dirau KAS alternatibak.
Ertzaintzak nolakoa izan beharko luke?
Ertzaintza desmilitarizatzea eta gorputz bereziak (AVCS, Beltzak...) desagertzea eskatzen du herriak. Azken batean, interes politiko konkretu batzuen menpe egongo ez den Ertzaintza eskatzen da.
ZUAZABEITIA, Ainhara
8-9,10,11

GaiezPolitikaEuskal HerrTaldeakBesteakKAS
PertsonaiazINTXAURRAG3
EgileezUAZABEITI1Politika

Irakurrienak

Matomo erabiliz

Zapaterok dio Ostiral Santukoaren gisako akordio bat egon zela ETAren amaieran

Xabier Letona Biteri

Lurra taupaka hasiko da

Estitxu Eizagirre

Kanpaldien lehen garaipenak iristen hasi dira Israelekiko boikot akordioekin

Jon Hidalgo Gereñu

"Amorrua, hira eta mendeku nahia emakume baten motorrak ere izan daitezke"

Reyes Ilintxeta

Efemeridea: Jarrairen V. Kongresua bortizki eragotzi zuen Espainiako Poliziak, agindu judizialik gabe

ARGIA

2x17: Amillubi proiektutik: taupaka hasi da lurra | Ane Aranburu eta Miryan Imaz

Bizi Baratzea | ARGIA

Azkenak

2024-05-12 | Urko Apaolaza Avila

Koopfabrika

Kooperatiba eraldatzaileen harrobia

Olatukoopek beste hainbat eragilerekin batera garatu duen proiektu nagusienetako bat KoopFabrika da, ekintzailetza soziala bultzatzeko helburuz 2017an sorturiko programa, eta gaur egun oraindik martxan dagoena.

Hasiera batean, lehenengo ideia izan zen ekonomia... [+]

2024-05-12 | Nerea Menor

Ghayath Almadhoun

"Alemania nagusitasun zuriaren piramidearen gailurrean dago, eta lehen holokaustoa ukatu zutenek orain Nakba ukatzen dute"

Ghayath Almadhoun-ekin hitz egin dugu Alemaniako zentsura sistemikoaz eta horren ondorioez. Siriako Damaskon 1979an jaiotako poeta palestinarra, Suediara joan zen bizitzera eta egun Berlinen bizi da. Bere poesiak, ia 30 hizkuntzatan itzulia, maitasuna, tokialdatzea eta nortasuna... [+]

2024-05-12 | Estitxu Eizagirre

Amillubiren festa maiatzaren 11n

Lurra taupaka hasiko da

Urola ibaiaren meandroan, Zestoako Iraeta auzoan daude Amilibia baserria eta bere lur emankorrak: 5 hektarea baso eta 4 hektarea laborantza lur. Laborantza ekologikoa sustatzen duen Biolur elkarteak baserria eta lurra kolektibizatu nahi ditu Amillubi proiektuaren bidez... [+]

2024-05-12 | Amets Aranguren Arrieta

Pastoral bat Iruñearendako

Herri-antzerki forma bat da pastorala. Sujet edo protagonista bat (hildakoa) hautatu eta bere bizia bertsotan ematen duena. Kantua ere presente dago emanaldian. Taula zuzendaria, taula gainean arituko diren arizaleak eta musikariak aritzen dira pastorala ematen den egunean... [+]

2024-05-12 | Urko Apaolaza Avila

'Ekonomia eraldatzailea(k)' liburua

Ekonomiaren adjektibo guztiak

10. urteurrena kari, Olatukoopek bi liburuxka atondu ditu eta labean ditu jadanik, ekonomia eraldatzailearen eta kooperatibagintzaren ingurukoak biak ala biak. Alde batetik, herri-kooperatiben inguruko eskuorri edo gida bat kaleratuko dute, herri kooperatiba bat zer den... [+]

Eguneraketa berriak daude